Allen^a) den, die disen brief ansehent lesent oder ho^erent lesen, kúnd ich V^olrich Ru^eschis von Bernang¹ vnd vergich offenlich an disem brief fúr mich vnd fúr alle min erben vnd nach||komen, daz ich mit beda^vhtem můt verko^vfft vnd reht vnd redlich ze ko^vffenn geben han vnd gib mit disem brief den fromen beschaidnen Bartholome Blârrer, Johansen Blarrer, || V^olrich Ko^echler pflegern des spitals des hayligen gâistes ze sant Gallen² vnd iren nachkomen ze des selben spitals handen darnach vrôn Vrsullun von Wîlla³ vnd Margaretun || wîlunt Johansen Bertschis sêligen êlicher hûsfro^vwen vnd iren erben, ob sú enwa^erint, alle die bo^{v^} m, die da stand vff der egerten ze Zaissenried⁴ vntz vff die mittledi des gro^vssen nussbo^vms vnd ainhalb sto^vzzet an die Hell⁵ vnd andrunt an des von Ho^ehst⁶ sêligen gůt, dú selb egert min lêhen ist von dem erbern beschaiden Johansen von Magelsperg⁷, also mit der beschaidenhait, daz ich vnd alle min erben vnd nachkomen, in dero hand dú vorgenant egert ze Zaissenried iemer kunt, die vorgeschriben bo^{v^}m alle, die vff der selben egerten ze Zaissenried vntz vff mitledi des gro^{v^}ssen nussbo^vms stand vff disen húttigen tag, vnuerzogenlich wu^esten vnd abho^vwen súllent âne alle widerred, vnd daz o^vch ich noch min erben, ob ich enbin, noch nieman anders von minen wegen noch an miner stat noch der oder die, wer die sint, in dero hand hinnenhin dú vorbenemt egert ze Zaissenried iemer kunt, hinnenhin niemer mê kainen bo^{v^}m vff der selben egerten ze Zaissenried vntz vff die mitledi des gro^vssen nussbo^vms setzen noch zúgen súllent in dehainen weg mit dehainen sachen âne geuerde. Wurdint aber nû ald hie nach vff die vorgeschriben egerten ze Zaissenried vntz vff die mitledi des gro^vssen nussbo^vms dehain bo^vm von ieman gesetzet oder gezúgot ald ob bo^vm dehainost da wu^echsin von selbwachsens wegen, die selben bo^vm, als vil der dann wa^er, sond vnd mugent die vorbenemten pfleger vnd ir nachkomen ze des obgenanten spitals handen vnd o^vch die êgenanten vrô Vrsull von Willa vnd Margarett wîlunt Johansen Bertschis sêlig êlichi wirtinn vnd ire erben, ob sú enwa^erint, wu^esten swainnen vnd abho^vwen âne alle widerred. Vnd sol ich noch min erben noch nieman anders von minen wegen noch der oder die, wer die sint, in dero hant hinnenhin dú êgenant egert ze Zaissenried iemer kunt, sú daran in kain wîse nit sûmen noch irren in dehainen weg mit dehainen sachen âne geuerde, daz ich o^vch alles mit miner trúwe fúr mich vnd fúr alle min erben vnd nachkomen vest vnd sta^et gelo^vpt han ze habenn vnd lo^vben mit disem gegenwúrtigen brief. Vnd han darumb von inen enpfangen drú pfunt pfenning gůter Costentzer múns, die sú mir darumb geben hant vnd gantzlich von inen gewert vnd bezalt bin, vnd han mich o^vch hier vber frilich willeklich vnd vmbetwungenlich fúr mich vnd fúr alle min erben vnd nachkomen verzigen vnd verzihe mich mit disem brief aller vordrung rehtung vnd ansprach, so ich an den zů den vnd von der vorgeschribenen bo^vm vff der egerten ze Zaissenried vntz vff die mitledi des gro^vssen nûssbo^vms iê gehattont ald hie nach iemer gehaben mo^eht in dehainen weg mit dehainen sachen âne geuerde. Vnd des ze ainem wâren vrkúnd so han ich erbetten die beschaiden Johansen von Magelsperg, mit des gůtem willen o^vch der vorbenemt ko^vff beschehen ist, vnd o^vch Herman Abhûsen⁸ amman ze Bernang, daz sú baid irú insigel fúr mich vnd min erben gehenkt hant an disen brief, won ich âigens insigels nit enhat. Ich Johans von Magelsperg da vorgenant vergich, das der vorgenant ko^vffe mit miner wissent gůtem willen vnd gunste vollefu^ert vnd beschehen ist vnd daz ich min aigen insigel vnd o^vch ich der vorbenemt Herman Abhûsen baid v´nsri insigel von ernstlicher bette wegen des obgenanten V^olrich Ru^eschis gehenkt habint an disen brief. Der geben ist an dem na^ehsten ma^entag vor sant Georyen tag, do man zalt von Cristus gebúrt drútzehenhundert iâr, sibentzig iâr vnd darnach in dem sibenden jâre.

Source Fulltext: Chartularium Sangallense IX, Nr. 5576, S. 245-246.