Allen^a) den, die disen brief ansehent lesent oder ho^erent lesen, kúnd ich Oswalt in der O^vwe ab Gais¹ vnd vergich offenlich mit disem brie||ve fúr mich vnd fúr alle min erben, daz ich mit gůter vorbetrahtung von dem erbern wolbeschaidenn V^olrich dem Ko^echler burger ze sant || Gallen reht vnd redlich enphangen han vmb ainen sta^eten zins die waid halb ze Rietli² gelegen in der Nortswendi³, die ich geko^vffet han || von V^olrich Hagen vnd von Adelhaiten siner elichen wirtinnen V^olrich Hayders sa^elgen wilunt êlichen tohter, ze ainem rehten sta^eten erblehen mit solicher beschaidenhait vnd in dem rehten, daz ich vnd alle min erben, ob ich enbin, die vorgeschribenne waid halb in eren vnd vnwůstlich haben vnd niessen sont vnd súllent dem obgenanten V^olrich Ko^echler vnd allen sinen erben vnd nachkomen von der selben halben waide aller ja^erlich ie ze sant Gallen tag zehen schilling phenning gůter vnd gena^emer Costentzzer múnse vnd ain viertail gůtes vnd vngeuârliches schmaltzzes sant Galler messes ze rehtem ja^erlichem zins ân fúrzug vnd ân allen iren schaden geben vnd rihten, weles jares aber wir daz niht ta^etint, wie oder welen weg dann ie der obgenant V^olrich Ko^echler oder sin erben ald nachkomen nach dem vorgeschribenen sant Gallen tag dez selben zinses ze schaden koment, ez sie von phandung wegen von zerung von klag mit botten mit brieuen oder von dehainen andern sachen, von dem schaden súllent wir sv´ o^vch gantzlich lo^esen vnd ledig machen, alz ich im mit miner trúwe fúr mich vnd min erben gelobt han. Ez ist o^vch mit namen bedingot vnd berett, wa^er daz ich oder min erben, ob ich enwa^er, dehaines jares von v´nseren rehten der vorgeschribenen halben waid gân vnd die verko^vffen wo^eltint, daz wir danne die selben v´nserú reht dem obgenanten V^olrich dem Ko^echler oder sinen erben ald nachkomen dez ersten vail bieten vnd vor ma^englichem ze ko^vffenn geben sont, ob sv´ sie ko^vffen wellent vnd v´ns darumb alz vil geben wellent alz ander lút, wo^eltint aber sv´ sie niht ko^vffen, so mugent wir dannenhin die selben v´nserú reht wol ze ko^vffenn geben, wem wir wellent, inen an iren rehten gantzlich vnscha^edlich. Wa^er o^vch, daz der egenemt V^olrich Ko^echler oder sin erben ald nachkomen dehaines jares von iren rehten der vorgeschribenen waid halber vnd dez zinses gan vnd die verko^vffen wo^eltint, so sont sv´ v´ns o^vch die selben irú reht dez ersten vail bieten vnd vor ma^englichem ze ko^vffenn geben, ob wir sv´ ko^vffen wellent vnd in darumb alz vil geben wellent alz ander lút. Wo^eltint ald mo^ehtint aber wir sv´ niht ko^vffen, so mugent sv´ dannenhin die selben irú reht wol ze ko^vffenn geben, wem sv´ wellent, v´ns an v´nseren rehten gantzlich vnscha^edlich. Bescha^ech o^vch, daz sich befund vnd kuntlich wurd, daz ich oder min erben die vorgeschribenne halben waide niht in êren vnd wůstlich hettint, wenn daz bescha^ech, so hat der obgenant V^olrich Ko^echler oder sin erben ald nachkomen gewalt darnâch, wenn sv´ wellent, die vorgeschribenne halben waid ze besetzzenn vnd ze entsetzzenn vnd da mit ze tu^enne, waz sv´ wellent vnd in nutzlich ist, vnd súllent wir sv´ daran niht sumen noch ierren. Vnd ze vrkúnd der warhait aller der vorgeschribenne ding vnd gedinge so han ich erbetten den ersamen Hûgen Růpreht amman ze Trogen⁴, daz er sin insigel fúr mich vnd alle min erben gehenkt hat an disen brief, won ich aigens insigels niht han, im vnd allen sinen erben gantzlich vnscha^edlich. Diz beschach vnd ward dirre brief geben ze sant Gallen an dem na^ehsten samstag nach sant V^olrichs tag, do man zalt von Cristus gebúrt drúzehenhundert jar vnd darnach in dem ain vnd ahtzigostem jare.

Source Fulltext: Chartularium Sangallense IX, Nr. 5855, S. 516.