Wir^a) dez hailigen Ro^emschen riches stette, die die bvntnv´st haltent vmb den Se¹, Costentz, Lindow², Rauenspurg³, V´berlingen⁴, || Wangen⁵ vnd Bůchorn⁶ tůnt kvnt vnd vergehin offenlich mit disem gegenwúrtigen brief allen, die in ansehent alder ho^erent || lesen, als wir alle ainberlich mit gůter vorbetrahtvnge durch gemainen frid vnd nûtze vnser vnd des landes vns vor || lang ziten von gebett vnd och haissens wegen des aller durlúhtigosten ffúrsten dez Ro^emschen kayser Karlen sa^eligen vns ze samen gelobt verbunden vnd gesworn hattent, den selben bvnde wir aber nv^ gestrekket vnd gesworn haben ze haltent vntz vff sant Georyen tag dem nehsten, der nv^ hin ist, vnd dannanhin zehen gantzv´ jar dv´ nehsten nach anander ze zellent, anander getrúlich vnd frv´ntlich ze râtent vnd ze helfent, als der brief vo^elleclicher wiset, den wir darv´ber mit v´nser stetten insigeln besigelt hant, in der selben bv^ntnúst vnd gelúbd och alle zit bi v´ns gewesen sint vnser lieben aidgenossen von sant Gallen, won aber die von etlicher vnmůs wegen, do wir die lengervng des selben bvndes tatent, nit zů vns komen mohtent, vnd si aber nv^ die lengervng dez bvndes mit v´ns gelobt vnd gesworn hant ze haltent die selben zehen jar vngeuarlich, als der brief, dên si darv´ber mit ir stette insigel besigelt hant, lûtet vnd sait, darvmb so haben och wir inen gelobt bi den aiden, die wir von des selben bvndes wegen gelobt vnd gesworn hant, daz wir die selben den burgermaister den rate vnd burger alle gemainlich der stat ze sant Gallen bi dem selben vorbenenten v´nserm bv^nd dv´ selben zehen jar vollenss getrúlich frv´ntlich vnd vngeuarlich haben vnd halten so^elint mit allen bv´nden stukken pûncten vnd artikeln, als der obgenant bvntbrief vmb die lengrv^ng dez bvndes der zehen jarn wiset, vngeuârlich. Vnd des alles ze warem vnd offeme vrkv´nd vnd sta^eter sicherhait aller dirre vorgeschriben dinge so hant vnser aidgenossen von Costentz von vnser aller haissens wegen ir stette insigel gehenket an disen brief. Der ist ze Costentz geben, do man^b) von Cristes gebúrt drúzehenhvndert^c) jar, darnach in dem ain vnd ahtzigosten jar, an sant Vitis vnd Modestis tag.

Source Fulltext: Chartularium Sangallense IX, Nr. 5844, S. 497-498.