Allen den, die disen brief ansehent lesent oder ho^erent lesen, kúnd ich Bartholome Blârrer burger ze sant Gallen vnd vergich || offenlich mit disem brieue fúr mich fúr alle min erben vnd nâchkomen von des nâchgeschribenen wingarten vnd halben akkers || wegen, der wingart gelegen ze Lúchingen, der wilunt der . . Vedrer was vnd ainhalb sto^vsset an minen wingarten vnd an||derthalb an Herman Brunners wingarten, vnd der akker halbe, den man nemmet die Gebrait, gelegen bi der stat ze Altstetten, der o^vch wilunt der . . Vedrer was, den selben wingarten vnd o^vch halben akker ich ko^vft han von den nâchgenemten V^olrich Zo^ebellin dem amman, Oswalt Rainolt vnd von Růdolf sinem brůder, als der brief wol bewiset, den ich darumb von in han, daz ich den selben wingarten vnd o^vch den halben akker von minem gůt mir noch minen erben niht ko^vft han vnd daz ich sú durch got den siechen lúten ze sant Gallen an dem Linsibu^el¹, der trager vnd pfleger ich bin, mit irem gůt vnd niht mit minem geko^vffet vnd vergolten han, vnd darumb so han ich mich willeklich entzigen gantzlich vnd gar vnd entzieh mich mit disem brieue fúr mich vnd alle min erben vnd nachkomen gen den vorgeschribenen siechen lúten ze sant Gallen an dem Linsibu^el vnd gen allen iren nâchkomen aller aigenschaft, aller lehenschaft, alles rehten, aller vordrung vnd aller ansprâch gaistlichs vnd weltlichs gerihtes, so ich vnd min erben, ob ich enwa^er, vnd min nâchkomen an dem vorgeschribenen wingarten vnd an dem akker halben von reht ald von gewonhait hattent ald hie nach iemer gewinnen mo^ehtint. Vnd ze ainem wâren vrkúnde vnd ze ainer sta^eten sicherhait aller der vorgeschribenen dinge vnd vergiht so han ich Bartholome Blârrer da vorgenemt fúr mich fúr alle min erben vnd nâchkomen min insigel gehenkt an disen brief. Der geben ist^a) ze sant Gallen in der stat an dem na^ehsten donstag vor dem hailigen tag ze phingsten in dem jar, do man zalt von gottes gebúrt drúzehenhundert jar, fúnfzig jâr vnd darnach in dem núnden jâre.

Source Fulltext: Chartularium Sangallense VII, Nr. 4599, S. 437.