Wir Růdolf von gottes gnaden byschof ze Costentz vnd gemainer pfleger an gaistlichen vnd weltlichen sachen des gotzhus || ze sant Gallen¹ tu^egin kunt vnd veriehin offenlich mit disem brieue, daz fúr vns kom ze Veltkilch², da wir ze gerihte sassent, || div ersam frow Katherina des frumen ritters her Hainrichs seligen von Altsteten³ wilunt elichú wirten vnd batt vns ze || eruarend mit vrtail vor gerihte, wie si daz gůt ze Grůnow⁴ vnd waz dar zů geho^eret mit allen rehten, nútzen vnd gewonhaiten, daz si von vns vnd vnserm gotzhus ze sant Gallen ze lehen hatti, gemainlich bringen mo^ehti in des frumen vnsers lieben getrúwen gewalt Haidens von Emtze vnd Annen⁵ siner elichen wirtenn ir tohter. Do wart ertailt mit gesameneter vrtail, daz wir ir ga^ebint ainen fúrsprechen, do gabent wir der selben Katherinen vor gerihte ze fúrsprechen den frumen ritter vnsern lieben getrúwen her Růdl. von Roschach⁶. Do wart o^vch ertailt, daz wir ir ga^ebint ainen vogt, do gabent wir ir den frumen ritter her Hainrich von Celle⁷, vnd also gieng div selbe Katherina mit ir vogt, als ertailt wart vnd reht was, fúr vns vnd gab vns vf an vnser hant willeclich^a) daz vorgeschriben gůt ze Grůnow mit allen rehten, nútzen vnd gewonhaiten, so dar zů geho^erent, daz von vns vnd vnserm vorgenanten gotzhus ze sant Gallen lehen ist, vnd batt vns daz selbe gůt ze Grůnow, als vor geschriben ist, lihen gemainlich dem vorgenanten Haiden von Emtze vnd Annen siner elichen wirtenn ir tohter. Do erhorten wir der selben Katherinen bett vnd nament daz vorgeschriben gůt vf an vnser hant von dem frumen ritter her Hainr. von Celle, der ir vogt was, vnd von ir, als reht was, vnd lihent^b) das selbe gůt ze Grůnow vnd waz dar zů geho^eret dem vorgenanten^c) Haiden von Emtze vnd Annen siner elichen wirten gemainlich, vnd lihint mit disem brieue vnd habint daz getan mit offenung vnd sicherhait, worte vnd werke, so dar zů notdúrftig warent von reht ald von gewonhait. Vnd ze ainem vrkúnde so henkin wir vnsers gotzhus ze sant Gallen insigel an disen brief. Wir Hainrich von Celle ritter vnd Katherina div vorgenanten henkin o^vch vnserú insigel ze ainem vrkúnd vnd meren sicherhait zů des erwirdigen vnsers genedigen herren byschof Růdl. von Costentz vnd pflegern des gotzhus ze sant Gallen insigel an disen brief. Der geben ist ze Veltkilch, do man zalte von Cristus geburt drúzehenhundert jar, in dem drú vnd drissigostem jare, an dem sunnentag nah sant Gregorientag.

Source Fulltext: Chartularium Sangallense VI, Nr. 3509, S. 151-152.