Wir^a) Cůn von gottes gnaden abt des gotzhus ze sant Gallen¹, dz an alles mittel zů geho^eret dem stůl ze Rom, veriehent mit disem || brief, dz fúr v´ns kam ze Appenzell² vff v´nsers gotzhus vesti der beschaiden kneht V^olrich Zimberman vnd zogt v´ns ain offenn brief mit Joh. Blar||rers von Cost(entz) insigel versigelt, an dem vnd mit dem selben brief v´ns der selb Joh. Blarer vf sant vnd gab an vnser hand sinen wingarten gelegen || ze Altstetten hinderm Vorst, der stosset vndan an des spitals von sant Gallen wingarten vnd obnan an Grůnow, der von v´ns vnd vnserm vorgenanten gotzhus ze sant Gallen sin reht lehen wa^eri, vnd bitt an dem v´ns der selb Hans Blarrer vnd mit dem selben brief, won er von rehter ehaffter not wegen fúr^b) nit komen moht, das wir den selben vorgenanten wingarten lihin den beschaiden Ru^edi Zimberman von Ba^vlga vnd V^olrichen sinem elichen sun, won er inen vnd iren erben den selben wingarten ze koffenn geben hetti ze rehtem lehen baiden gemainlich vnd vnuerschaidenlich, vnd also batt v´ns do der selb V^olrich von sinen vnd Ru^edis Zimbermans sines vattern wegen. Darvmb erhorten wir do baider tail bett vnd lihent vnd sendent den selben vorgenanten wingarten dem selben Ru^edin Zimberman ze Balga vnd V^olrichen sinem elichen sun baiden gemainlich vnd vnuerschaidenlich ze rehtem lehen vnd ze ainer rehten gemaind mit disem brief, wz wir inen durch reht lihen so^ellent, v´ns vnd vnserm vorgenanten gotzhus an allen vnsern rehten gantzlich vnscha^edlich. Vnd ist dis alles beschehen vnd redlich vollfu^ert nach vnsers gotzhus gewonheit vnd reht, alz es kraft vnd maht haben sol vnd mag ietz vnd hienach. Vnd des ze warer vrkúnd haben wir abt Cůn vnser insigel offenlich gehenkt an disen brief. Der geben ist an dem nehsten zinstag vor sant Fitz tag in dem jar, do man zalt von Cristi gebúrt tusent drúhundert ahzig vnd fúnf jar.

Source Fulltext: Chartularium Sangallense X, Nr. 6082, S. 264-265.