Ich^a) Johans Go^essler vogt ze sant Gallen¹ von des hailgen riches wegen tůn kunt vnd vergich offenlich an disem brief allen den, die in sehent || lesent oder ho^erent lesen, das fúr mich kame ze sant Gallen in der stat an der na^ehsten mitwochen vor sant Vitus vnd sant Modestus tag, do ich || vff des riches offner strâsse von des hailgen richs gewaltes wegen offenlich ze geriht sass, V^olrich Midensun der mêtzger burger ze sant Gallen || vnd offnote vnd veriah da der selb V^olrich Midensun offenlich frilich vnd willeklich vngebunden vnd vngeuangen vor mir in dem geriht mit sinem fúrsprechen von der vanknust wegen, als in die fromen wisen der burgermaister vnd der rat gemainlich ze sant Gallen gehaimot vnd in ir vanknust vnd banden hattent vmb das, das er V^olrichen Eggis burger ze sant Gallen vff gottes vart sines libes wolt entsêtzt han vnwissenter dinge vnwidersait vnd vnverschult, v´ber das, das er vormals offenlich vnd willeklich vor dem rât ze sant Gallen gesworn hatt ainen gelêrten ait zů den hailgen, dem selben V^olrich Êggis ân reht niht ze tůnde. Vnd won aber in die selben der burgermaister vnd der rât ze sant Gallen durch siner frúnd vnd biderber lút bett willen vsser der selben vanknust lêdig gelâssen hêttint, so wo^elti er sich aller diser nâchgeschribnen sachen willeklich vnd gern verbinden, als hie nach beschaiden ist an disem brief. Des ersten do swůr der selb V^olrich Midensun offenlich vor mir in dem gerihte frilich vnd willeklich vngebunden vnd vngeuangen gesunt libes vnd můtes mit gůter vorbetrahtunge ainen gelêrten ait liplich zů got vnd zů den hailgen mit v^fgehabnen vingern, vmb die vorgedâhten vanknust der vorgedahten des burgermaisters des râtes vnd aller burgerr gemainlich von sant Gallen vnd iro ieklichs besunder vnd mit namen aller ma^englichs, wer an der selben siner vanknust dehain schuld in dehain wise gehept hât ald des râtent ald helffent gewesen ist ald darzů gehaft was, lûter gantz vnd gůt frúnde ze sinne vnd alle sin frúnd inen darumb ze frúnd ze gewinnenn ân allen fúrzug vnd die selben vanknust vnd getât niemer ze andenn noch ze a^eferrenn weder mit gaistlichem noch mit weltlichem geriht noch ân reht noch in kain wîse noch ieman von sinen wegen ân alle geua^erde. Er nam o^vch in den selben ait vnd swůr, das er die vorgedahten den burgermaister den rât noch die burger gemainlich der stat ze sant Gallen noch ir dehainen besunder vmb dehainerlay sache, so vntzher vff disen húttigen tag, als dirr brief ist geben, v^f geloffen wa^er oder hinnanhin v^fstu^endi oder v^fluffi, niemer so^elle noch welle ân reht bekúmberren angriffen noch beschadgen weder an iren liben lúten noch an iren gůten. Der selb V^olrich Midensun nam o^vch in den selben ait vnd swůr, wa^er das er zů den selben dem burgermaister dem rât ald besorgern oder zů den burgern gemainlich von sant Gallen oder zů ir dehainem besunder iht ze sprechenn hêtt oder ze sprechenn gewunne, vmb welherlay sach das wa^er vnd wâ er denn sesshafft wa^er, das er ie darvmb reht vordern vnd reht von in nemen sol ze sant Gallen in der stat vor dem geriht daselbs vnd niendert anderswa, es wa^er denn, das er in der stat ze sant Gallen rehtlos gelâssen wurdi vnd das das kuntlich wurdi vor ainem burgermaister vnd dem rât ald besorgern gemainlich ze sant Gallen, ob da nit râtes wa^er, so sol vnd mag er sin reht anderswa sůchen, da es im fůgklich ist. Wa^er aber, das er ald ieman von sinen wegen darúber der vorgeschribnen stuk dehaines v´berfu^eri vnd sinen ait vnd das sich des ain burgermaister vnd der rât ald besorger gemainlich ze sant Gallen, ob da nit râtes wa^er, ald der mêrtail vnder in vff ir trúw vnd êr erkantint, das er den vorgeschriben sinen ait v´bervaren hêtt, wenne oder wâ das bescha^eh, das denne die selben der burgermaister der rât ald besorger vnd die burger alle gemainlich der stat ze sant Gallen ald iro ieklicher besunder ald wer in des helffen wil den selben V^olrich Midensun haimen vnd vâhen sont vnd mugent ân alles reht vnd ân allen zorn vff dem lande in do^erffern vff wasser ald in stêtten oder wâ si in ergriffen mugent, vnd das si den selben V^olrich Midensun danne fúr ainen scha^edlichen verschulten vnd vertailten man verdêrben vnd von dem libe tůn sont vnd mugent âne alles reht vnd âne vrtail. Des hât sich der vorgenemt V^olrich Midensun mit namen offenlich vor mir in dem gerihte frilich vnd willeklich mit bedâhtem můt vngebunden vnd vngeuangen gesund libs vnd můtes gebunden vnd das in da vor noch dawider niht schirmen sol enkain frihait noch gewonhait enkain reht weder gaistlichs noch weltlichs gerihtes enkain gesetzt nocht buntnust der hêrren noch der stêtte enkain burgreht noch lantreht noch der stêttreht noch enkainerlay ander sache noch schirm, won er sich mit namen verzigen hât aller helffe aller gnâden alles v^szugs alles schirmes vnd alles des, damit er sich wider die vorgeschriben sach vnd buntnust iemer gesetzen ald dawider gereden ald gewerben kundi oder mo^ehti in dehain wîse. Darnach batt mich der selb V^olrich Midensun mit sinem fúrsprechen, das ich erfu^eri an ainer vrtail, ob er die vorgeschriben sach vnd vergiht vnd das vorgeschriben verbinden getan vnd vollfu^ert hêtt, das es kraft hêtt vnd haben mo^eht nâch dem rehten. Do frâgte ich vorbenemter rihter vrtail vmb vnd wart ertailt mit gemainer vrtail, das der obgenant V^olrich Midensun die vorgeschriben vergiht vnd sach vnd das vorgedâht verbinden mit sa^emlichen worten vnd werken getan vnd vollefu^ert hêtt, das es billich krafft vnd maht haben so^elt vnd mo^eht nâch dem rehten ietzo vnd hienâch. Vnd des alles ze offemm wâren vrkúnde so han ich Johans Go^essler der vorgenemt vogt min insigel nâch rehter vrtail offenlich gehenkt an disen brief, won es mit gemainer vrtail ertailt wart, das ich es tůn so^elt. Darnach vergich ich der obgenant V^olrich Midensun ain gantz wârhait aller der dinge, so von mir da vorgeschriben stât an disem brieff, vnd des ze mêrer sicherhait so han ich o^vch min insigel offenlich gehenkt an disen brief, darzů han ich erbetten den beschaiden Jacob Růprehten, den man nemmt der Lo^ew, ze disen ziten statamman ze sant Gallen², das er sin insigel ze ainer zúgnust aller vorgeschribnen sache o^vch gehenkt hât an disen brief, won er o^vch bi allen vorgeschribnen sachen ze gegen gewesen ist, des och ich der selb Jacob Růpreht statamman als vorgeschriben stat vergich offenlich mit vrkúnd dis brieues mir âne schaden. Dis beschach vnd wart dirr brief geben ze sant Gallen an der vorgeschribnen mitwochen in dem iâre, do man von Cristus gebúrt zalte drúzehenhundert jar vnd darnach in dem fúnf vnd ahtzigosten jâre.

Source Fulltext: Chartularium Sangallense X, Nr. 6083, S. 265-267.