Allen^a) den, die disen brief an sechent oder ho^erend lesen, tu^egin wir dis nachbenempten Chůnrat Herr wilen Hansen Herren von sant Gallen elicher || svn vnd Vrsell des selben Hansen Herren wilent elichi wirtin vnd alli irú kint sú sigent knaben oder to^echtren vnd o^vch Chůnrat der To^vbler || von sant Gallen der vorgeschriben kint vogt kúnden vnd vergehen offenlich mit vrkúnd dis briefs fúr v´ns vnd fúr all v´nser erben vnd || nach komen, dz wir recht vnd redlich willeklich vnd vnbetwngenlich mit vorbedachtem můt vnd mit gůter vorbetrachtung vnd nach ra^vt vnser frúnd ze ko^vffen geben haben vnd geben mit disem brief disen nach geschriben wingarten in den Lúchern¹, der obnan ab stosset an Chu^enis Cumers vnd an Chu^enis Sa^enften wingarten vnd ainhalb an Sta^ehelins wingarten, der wilend des Túrsten selgen was, den selben obgeschriben wingarten Hans Herr selig von sant Gallen an vns bracht ha^vt, der wolbeschaiden fro^vwen Margreten Schneiterinen von Altlikon² hern Hansen kellerin von Bvx³ vmb achtzehen phfunt phfenning als gůter vnd genemer Costentzer múns, der wir aller von ir gewert vnd bezalt nach vnserm willen sigen vnd wirs in vnsren redlichen nutz bewent ha^vnt, vnd geben ir den ebnempten wingarten mit grund mit grat mit reben mit holtz mit veld mit zwy mit wasen mit wasser mit wasserflússen ob erd vnd vnder erd vnd allen rechten nútzen vnd gewonhaiten, so von alter dar zů ho^erend vnd geho^eren mugend, als wir in inne gehebt hant vntz vff disen hútigen tag, als dirr brief geben ist vnd als in Hans Herre selig an vns bracht ha^vt. Wir vnd vnser erben so^ellent och vnd all vnser nach komen des vorgeschriben ko^vffs vnd wingarten der ebenempten fro^vwen Margreten der Schnaiterinen recht wem ze sin an allen den stetten, do sú sin iemer notdvrftig wirt, es si an gaistlichem oder an weltlichem gericht nach des ho^vfs ze Alstetten⁴ recht vnd gewonhait, vnd haben vns och willenklich entzigen vnd entziehen vns mit disem gegenwirtigen brief aller aygenschaft aller lechenschaft vnd aller kuntschaft aller recht vnd rechtung aller gewer lút vnd brief vnd aller vordrung vnd ansprach, so wir vnd vnser erben vnd nach komen zů dem vorgenanten wingarten ie gehebt haben oder hie nach iemer gehaben oder gewinnen mugen. Wir haben och willenklich gelo^vpt, die vorgeschriben fro^vwen Margreten vmb den obgenanten ko^vff vnd och wingarten ze verstend an allen den stetten, da si dar vmb iemer vf getriben wirt, a^vn allen iren schaden. Wir so^ellen och noch enwellen noch vnser erben vnd nach komen noch nieman von vnsren wegen noch an vnser statt die vorgenanten fro^vwen Margreten von des vorgeschribnen ko^vfs vnd och wingarten wegen niemer an gesprechen noch vf getriben noch bekúmern noch bekrenken noch in kain wis beswa^eren weder mit gaistlichem noch mit weltlichem gericht noch a^vn recht a^vn all geuerd. Es ist och berett, won die vorgenanten kint ze iren tagen nit komen sint, dz wir der vorgenanten fro^vwen Margreten ainen weren geben haben zů vns, vntz die vorgeschribni kint alli ze iren tagen komen, wenn och die obgeschribenú kint ze iren tagen komen vnd dikbenempten fro^vwen Margreten den obgenanten wingarten geuertgot hant, so sol der selb wer, den wir ir denn geben haben, gentzlich ledig vnd los sin. Wir haben och willeklich gebetten den wolbeschaiden Chůnraten Heriso^vwe⁵ burger ze sant Gallen, dz er die vorgedachten werschaft von vnser ernstlicher bett wegen vff sich genomen vnd gelo^vpt ha^vt, fúr die vorgeschribnú kint die vorgenanten fro^vwen Margreten ze verstend vnd ze versprechen, als hie vorgeschriben sta^vt. Wer och, dz der vorgenant wer ab gieng, dz er vnnútz ze weren wer, von weler hand sach sich dz fůgti, so súllen der ebenempten fro^vwen Magreten^b) ainen andren weren an des obgenanten wa^eren statt geben in den nechsten vierzehen tagen, wenn er an vns geuordert wirt, ta^etin wir des nit, wie sin denn die ebenempt fro^vw Margret des ze schaden kern, den selben schaden sont wir ir gar vnd gentzlich ab tůn vnd vnschadhaft machen a^vn all geuerd. Vnd ist och dirr ko^vf vnd dirr wingart vor gericht geuertgot vnd vollfu^ert mit allen den worten vnd werchen, als es craft vnd macht sol vnd mag han nu vnd hie nach. Wer och disen brief inne ha^vt, es sigen fro^vw oder man gaistlich oder weltlich, der mag vnd sol bi disem ko^vff vnd wingarten beliben vnd si gen im ze glicher wis vnd in allen den rechten gebunden, stet ze hend vnd ze vollfu^eren als der vorgenanten fro^vwen Margreten. Vnd des ze vrkúnd vnd gantzer steter sicherhait, won ich der vorgenant Chůnrat Herr vnd och Vrsel min elichi můter Hansen Herren selgen elichi wirtin aygens ynsigels nit enhaben, so haben wir erbetten den vesten junkherren Eglolfen von Alstetten⁶, dz er fúr vns vnd vnser erben vnd nach komen sin aygen ynsigel gehenkt ha^vt an disen brief, vnder dz wir vns willenklich verbunden haben vnd binden vns mit disem brief, wa^vr vnd stet ze lassen alles dz, dz von vns hie vor an disem brief geschriben sta^vt. Ich Eglolf von Alstetten vergich och offenlich mit disem brief, dz ich von ernstlicher ba^ett wegen Chůnrat des Herren vnd Vrselun siner elicher můter wilent Hansen Herren selgen von sant Gallen elichi wirtin min ynsigel gehenkt han an disen brief, won sú aygens ynsigels nit enhant, mir vnd minen erben a^vn schaden. Ich Chůnrat Tobler burger ze sant Gallen der vorgeschriben kint vogt vergich och ainer gantzer wa^vrhait aller dirr vorgeschribner ding vnd geding, vnd ze vrkúnd so henk ich min aygen ynsigel an disen brief. Ich Chůnrat von Heriso^vwe burger ze sant Gallen vergich och ainer gantzer wa^vrhait aller der vorgeschribner ding vnd geding, so von mir hie vor an disem gegenwirtigen brief geschriben sta^vt, vnd ze merer sicherhait so henk ich min aygen ynsigel an disen brief. Ich Walther der Sitt burger ze Alstetten vergich och, dz ich der vorgenanten fro^vwen Vrselen wilent Hansen Herren selgen von sant Gallen elichi wirtin vogt was ze den ziten, do dirr obgeschriben ko^vff geschach vmb den vorgenanten wingarten, vnd ze merer sicherhait so henk ich min aygen ynsigel an disen brief. Der geben ward des ja^vrs, do man zalt von gottes gebúrt drú zehen hvndert ja^vr, dar nach in dem sechs vnd sybentzgosten ja^vr, an sant Nycla^vs tag.

Source Fulltext: Chartularium Sangallense IX, Nr. 5545, S. 216-218.