Ich^a) Eglolf von Altstetten der elter³ tůn kunt vnd vergich offenlich mit disem brieue || allen, die in sehent lesent oder ho^erent lesen, daz fúr mich kam ze der Núwen Altstetten⁴ || an dem tag, alz dirre brief ist geben, V^olrich Knelle der elter, der min aigen ist von dem || libe, vnd veriach offenlich vor mir fúr sich fúr alle sin erben vnd nachkomen, daz er mit gůter vorbetrahtung mit den ersamen Bartholome dem Blarrer, V^olrich Ru^edger vnd mit Herman Spanhart phleger der siechen dez spittals ze sant Gallen⁵ an dez selben spittals stat lieplich vnd gu^etlich v´ber ain komen wa^er, daz er daz holtz, daz man nemmet an den Rúntellen⁶, der selb bodem, da daz selb holtz vff stůnd, an der lengi wa^er wol vierzehen klafter lang, der selb bodem ainhalb stosset an dez vorgedahten spittals wingarten, den man nemmet der Senne, vnd stôsset vnnan vf an hern V^olrich Burgo^vwers⁷ wingarten, ab geho^vwen vnd geswent hetti gantzlich vnd gar vnd daz er noch dehain sin erben noch nachkomen, in dero hant der selb bodem, da daz vorgedaht holtz vff gestanden wa^er, iemer kumpt, enkainer lay bo^vm holtz noch studen vff dem selben bodem niemer mêr súllent lassen wahsen noch fúrkomen, daz dem vorgedahten spittal an dem vorgeschribenen sinem wingarten scha^edlich sie, vnd hett o^vch darumb von den vorgenemten phlegern willeklich genomen vnd enphangen ain phunt vnd aht schilling phenning gůter vnd gena^emer Costentzzer múnse, die an sinen offenn nutz komen vnd bekert wa^erint. Bescha^ech aber, daz hinnenhin vff dem vorgeschribenen bodem dehainer lay holtz vf gieng vnd fúrbaz wahsen wo^elt, daz dem vorgedahten spittal scha^edlich wa^er, wenn er danne oder sin erben ald nâchkomen von den vorgenemten phlegern oder von iren nâchkomen ald von ir botten ald mit ir brieuen darumb ermant werdent ze hus ze hof oder vnder o^vgen, so sont sv´ daz selb holtz vnuerzogenlich ab howen vnd wu^esten gantzlich vnd gar, alz dik ez darzů kumpt, ân alle geua^erde. Ta^etint sv´ daz niht, so hant die vorgenemten phleger oder iro nachkomen vnd iro helffer, wer die sint, an dez vorgedahten spittals stat friies vrlob vnd vollen gewalt ie dar nach, wenn sv´ wellent, daz selb holtz ab ze ho^vwenn vnd ze wu^estenn, alz dik ez darzů kumpt, vnd sol in daz nieman werren noch vor sin mit dehainen dingen, ân alle geua^erde. Vnd ze vrkúnd der warhait aller der vorgeschribenen dinge vnd vergiht so han ich Eglolf von Altstetten da vorgenemt von ernstlicher bet wegen dez vorgenanten V^olrich Knellen, won er aigens insigels niht hat, min insigel fúr in fúr alle sin erben vnd nachkomen offenlich gehenkt an disen brief. Der geben ist ze der Núwen Altstetten an dem na^ehsten fritag nach inga^entem brachot, do von Cristus gebúrt warent drúzehenhundert jâr, ahtzig jar vnd darnach in dem dritten jâre.

Source Fulltext: Chartularium Sangallense X, Nr. 5955, S. 126-127.