Wir Wenczlaw von gotes gnaden Romischer kunig zu allen czeiten merer des reichs vnd || kunig zu Beheim embieten dem burgermeister rate vnd burgern gmeinlichen der stat || zu sand Gallen vnsern vnd des reichs lieben getrewen vnser gnade vnd alles gute. Lieben getrewen, || vmb sache gewonlicher stewer, die ir vns vnd dem reiche ierlichen pflichtig seit zu geben, empfelhen vnd gebieten wir euch erenstlichen vnd vesticlichen bey vnsern vnd des reichs hulden, das ir dieselbe stewer dem hochgebornen Leupolden herczogen zu Osterreich zu Steyern vnd zu Karnten⁴ etc. vnserm lieben swager vnd fursten uff sand Merteins tag, der schirst komet, gebet vnd beczalet ie für sechsczenhalben schilling haller einen guidein, als ir das vor beczalet habt, vnd wenn ir das also getan habt, so sagen wir euch derselben stewer von vnsern vnd des reichs wegen als von disem jare queit ledig vnd loze. Mit vrkunt dicz brieues vorsigelt mit vnserr kuniclicher maiestat insigel. Geben zun Petleren⁵ noch Crists geburd dreiczehenhundert jar vnd dornach in dem dreivndachczigisten jare an sand Bartholomes tag vnserr reiche des Behemischen in dem eynundczweinczigisten vnd des Romischen in dem achten jaren.

Source Fulltext: Chartularium Sangallense X, Nr. 5965, S. 138.