Allen^a) den, die disen brief ansehent lesent oder ho^erent lesen, kúnd ich Wercz von Menbreswile¹, der gesessen ist ze dem Friendorf², vnd vergich des offenlich || mit disem brief, das ich mich erkennt han von der sto^esse wegen, so ich hatt mit dem spittal der^b) siechan ze sant Gallen³ vnd o^vch mit sinen phlegern von || des gůcz wegen, das der Gerbolten was, das ich ko^vfft han vnd zů minen handen braht han, vss dem selben gůtz o^vch ja^erlich dem spittal der siechan || ze sant Gallen zwen mut beder korn vesan vnd haber sant Galler messes gat an^c) allen sinen schaden, des ich mich gespert hat ze gebenn. Dar vmb so han^d) ich mich erkennt vnd han o^vch von erberen lúten gůt kuntschafft ingenomen, dz die vorgeschribenn zwen mut beder korn vss dem vorgenemten gůt ja^erlich gant vnd gan sont vnd dem vorgenemten spittal von reht werden sont vnd ich vnd alle min erben, ob ich enwa^er, ald wer denn dz selb gůt inhencz het ald niessent wa^er, die selben zwen mut beder korn ja^erlich vnd eweklich gen sont dem spittal der siechan ze sant Gallen an allen fúrzug vnd wider rede vss dem vorgeschribenn gůt. Vnd hant o^vch mir die spittals maister die gnad getan, won ich mich des tugentklich erkennt han, als vor geschriben stat, wa^er dz ich dehainist die vorgeschribenn zwen mut korns abko^vffen wo^elt von dem selben spittal, wenn sich das fůgti, dz der selb spittal von ieman korn gelt ko^vffti, was sich denn zwen mut beder korn an dem ko^vff angezúhet, dz gelt sol ich dar geben vnd weren, ob ich die selben zwen mut beder korn gern abko^vffen wo^elt. Vnd wenn das bescha^ehe, dz ich die zwen mut beder korn ganczlich vergult, so son mir dannen hin die selben zwen mut beder korn, die dem egenemten spittal ja^erlich gant vss dem vorgeschriben gůt, ganczlich vnd gar mir vnd allen minen nachkomen^e) eweklich ledig sin, vnd sol mich vnd all min nachkomen der vorgedaht spittal noch sin phleger vmb die zwen mut beder korn niemer me angesprechen noch bekrenken noch vff getriben weder an gaistlichem noch mit weltlichem gericht. Vnd alle die wil das nit beschehen ist, dz ich die selben zwen mut nút abko^vfft han, so^f) ich vnd min erben, ob ich enbin^g), ald wer denn das gůt niessent ist, aller ja^erlich tugentklich geben vnd weren an fúrzug vnd widerrede dem vorgedahten spital. Vnd des ze ainem offem waren vrkúnde vnd gantzer sicherhait aller der vorgeschribenen dinge vnd gedinge so han ich der vorgenempt Wercz von Menbreswile min insigel gehenkt an disem brief fúr mich vnd alle min nachkomen. Der geben ist ze sant Gallen an sant Jacobs tag des zwelfbotten, do man zalt von Cristus gebúrt drúzehenhundert jar vnd dar nach in dem ain vnd sibenczigosten jar.

Source Fulltext: Chartularium Sangallense VIII, Nr. 5287, S. 484-485.