Ich^a) Johans von Rosnegg¹ ain fryer herre der hochgebornen fúrsten der hertzogen von O^ester. miner gna^edigen herren || lantrichter in ir grafschaft ze Thurgew tůn kunt mit disem brief, daz ich ze der Lo^vben² vff dem lantag || an dem nechsten fritag nach vsgander phingstwuchen an derselben miner herren statt offenlich ze gerichte sazz, || vnd kamen da in gerichte der erbern wisen lúten des burgermeisters des rates vnd der burgere gemainlich der statt ze sant Gallen gewisse botten vnd zo^eigten derselben statt offenn brief vnd vrkúnde³, die ich gesehen han besigelt mit des hocherbornen des Ro^emschen keyser Karlen magestatt ingesigel, der also bewiste, daz in der obgenant kayser Karle die gnad getan hat vnd in die frihait vnd rechtunge gegeben hat vnder andern gnaden, sunderlich daz er wil gesetzet vnd o^vch beste^attiget hat mit sinen kayserlichen gnaden, ob daz were das ieman kain ansprach oder klag hette oder gewunne zů den selben burgern ze sant Gallen, von welerlaye sache daz were, der sol si niendert anders weder fúr lantgerichte noch kain ander gerichte vswendig der statt noch fúr sin hofgerichte laden ansprechen noch beclagen danne vor irem richter in der statt ze sant Gallen, da man o^vch recht von in nemen sol, als denne daselbs geurtailet erlanget oder erteilt wúrdet^b). Dazů setzet vnd erkennet er o^vch, swas anderswa vnd vor andern gerichten vff si erteilt oder erclegt we^are oder hernach erclegt oder erteilt wurde, das sol alles ze mal kain kraft macht noch vestenunge haben noch gewinnen, es were denne, daz iemanne, der da clegte, das recht versait oder wider recht vnd gewonheit verzogen wurde, so mo^echte der kleger si vff des kaysers hofgerichte vnd o^vch anderswa laden, da es billich ist, vnd da sin recht sůchen vnd eruolgen. Vnd davon so gebútet o^vch derselb kayser Karle mit sinem kayserlichen gewalt aller menklichem, daz nieman die obgenanten den . . burgermeister . . den rat noch . . die burgere gemainlich der statt ze sant Gallen wider die vorgeschriben sin kayserlich gnad beste^attigunge vnd confirmacion hindern noch schadgen so^elnt in dehain wise, wer aber da wider te^atte, der sol fúnftzig mark goldes rechter pen veruallen sin, vnd dieselben sullent halb siner kayserlichen kamer vnd daz ander halbtail den, die daz vnrecht lident, gentzlich geuallen. Vnd darvmbe won ich ir friheit also vor offem gerichte gesehen han, so hab ich in nach rechter vrteil, won in mit gesamnoter vrteil erteilt ist, daz si der gnade frihait vnd rechtunge geniezzen súlnt, disen brief besigelten gegeben mit des lantgerichtes ingesigel in Thurgew. Der geben wart an dem obgeschriben lantag in dem jare, do von gots gebúrte waren drútzehenhundert vnd sibentzig jaren vnd darnach in dem andern jare.

Source Fulltext: Chartularium Sangallense VIII, Nr. 5319, S. 509-510.