Allen, die disen brief ansehent, lesent oder ho^erent lesen, kúnd vnd vergih ich herr Swigger von Griffenstain kuster || des gotzhus ze sant Gallen¹ fur mich vnd fur alle min nahkomen, das ich nút vernomen han, das ab dem houe ze Kapfe² || ob No^eggers Egge³, der des spitals ze sant Gallen⁴ ist, me gange denne ain sto^vf wîns aller ia^erlich vnd zwai vier||tal kernen sant Galler messes. Ich hab ouch nút vernomen, das ab dem houe in den Geran⁵, der ob Wîdan⁶ lit vnd ouch des selben spitals ist, me gange denne drisseg schilling pfenning Kostentzer múnse aller ja^erlich. Ich vergih ouch, das ich die selben nutze aller ia^erlich han în genomen von den selben ho|uen vnd gu^etern vnd nút me, vnd das mir der spital ouch nút me schuldig ist von dehainem iare alles, des er mir^a) ia^erlich geben solt von den selben ho|uen vnd gu^etern, sid das ich kuster wart vntz vf disen hutigen tag. Ich hab ouch nút vernomen, das ie dehainem kuster me worden sie, der vor mir gewesen ist, denne als hie vorgeschriben ist, ald das im me solti werden von den selben gu^etern. Vnd ze ainem waren vrkúnd vnd ze ainer sta^etun sicherhait der selben dinge henk ich min insigel an disen brief. Dirre brief wart geben, do man zalt von gottes geburt druzehenhundert jar, darnah in dem viervnddrissegosten jâr, ze vsga^entem abrellen.

Source Fulltext: Chartularium Sangallense VI, Nr. 3543, S. 185.