Allen^a) den, die disen brief ansehent lesent oder ho^erent lesen, kúnd ich Walther Blârrer von sant Gallen vnd vergich dez offenlich mit disem brieue, daz fúr mich kam ze || sant Gallen der beschaiden kneht Berhtolt Broger von Wartense¹, der min lehen ist von dem erwirdigen gotzhus ze sant Gallen, vnd veriach offenlich vor mir fúr sich || fúr alle sin erben vnd nâchkomen, daz er mit wolbedahtem můt vnd gůter vorbetrahtung den zehenden von dem ab dem vnd vsser dem gůt ze Grimatzhusen² gelegen || enzwischen Niderwîlle³ vnd Gebraswille⁴, der selb zehend von mir sin lehen wa^er, mit allen rehten nútzzen vnd gewonhaiten vnd mit aller zv^o geho^erde vnd mit namen mit der lehenschaft dez selben zehenden redlich vnd reht verko^vft vnd ze ko^vffenn geben hett den êrsamen Bartholome Blârrer, Johansen Blârrer Gerwigs sun vnd Johansen an dem Bolle phleger der siechen dez spittals ze sant Gallen⁵ an dez selben spittals stat vnd zv^o sinen handen vmb vier phunt phenning gůter vnd gena^emer Costentzzer múnse, der er gantzlich von in gewert wa^er vnd enphangen hett vnd an sinen offenn nutz bewendet, vnd wo^elt vnd so^elt in o^vch den selben zehenden fúr ain reht ledig aigen vertgen vnd zv^o iren handen bringen, vnd bat mich, daz ich im dez gundi vnd daz ich mich der selben manschaft vnd lehenschaft dez vorgeschribenen zehenden verzigi gen den vorgenemten phlegern vnd gen dem vorgedâhten spittal ze sant Gallen, daz ich o^vch tet von siner ernstlichen bet wegen, vnd gab o^vch do der selb Berhtolt Broger den vorgeschribenen zehenden von dem vnd ab dem vorgeschribenen gůt ze Grimatzhûsen willeklich v^f an min hant, darnâch do gab ich offenlich an dez richs strâsse willeklich vnd frilich reht vnd redlich den vorgeschribenen zehenden fúr ain reht ledig aigen v^f in der obgenanten phleger vnd zv^o dez selben spittals handen, also daz sú den selben zehenden von den vnd ab den gu^etern ze Grimatzhusen, die dez vorgedâhten spittals reht aigen sint, hinnenhin iemer mêr fúr ain reht ledig aigen mit allen rehten vnd mit aller zv^o geho^erde gantzlich vnd gar innemen haben niessen besetzzen vnd entsetzzen sont. Vnd darumb so han ich vnd o^vch der obgenant Berhtolt Broger v´ns willeklich verzigen vnd verzihent v´ns mit disem brieue gantzlich vnd gar fúr v´ns vnd alle v´nser erben dez vorgeschribenen zehenden ze Grimatzhusen mit aller zv^o geho^erde aller aigenschaft aller manschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so wir oder v´nser erben, ob wir enwa^erint, an dem zv^o dem vnd von dez vorgeschribenen zehenden wegen ie gehept habent ald hie nâch iemer gehaben oder gewinnen mo^ehtint, vnd daz wir noch v´nser erben, ob wir enwa^erint, noch nieman andre an v´nser stat noch von v´nseren wegen die vorgenemten phleger noch dehain iro nâchkomen noch den vorgeschribenen spittal ze sant Gallen daran niemer súllent noch wellent ansprechen v^f triben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Wir die vorgenemten Walther Blârrer vnd Berhtolt Broger habent o^vch bald vnuerschaidenlich gelobt mit v´nseren trúwen vnd lobent mit disem brieue fúr v´ns vnd alle v´nser erben, dez vorgeschribenen zehenden fúr ain reht ledig aigen vnd dez ko^vffes reht wer ze sinne nâch aigens reht vnd o^vch die vorgenemten phleger vnd iro nâchkomen vnd den vorgeschribenen spittal ze sant Gallen darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wâ vnd wie dik sú darumb an gesprochen geschadgot oder v^f getriben werdent. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nâch reht darzů gehortent ald ho^eren soltent vnd nôtdurftig wârent vnd alz ez kraft vnd maht sol vnd mag han. Vnd ze ainem wâren vrkúnde vnd gantzzer sicherhait aller der vorgeschribenen dinge vnd gedinge so han ich Walther Blârrer da vorgenemt fúr mich vnd fúr alle min erben min insigel gehenkt an disen brief. Ich Berhtolt Broger da vorgenemt vergich ainer gantzzer wârhait aller der dinge, so von mir an disem brief da vorgeschriben stânt, vnd ze mêrer sicherhait der selben dinge so han ich erbetten den êrsamen Bilgrin Spiser burger ze sant Gallen, daz er sin insigel fúr mich vnd alle min erben gehenkt hât an disen brief, won ich aigens insigels niht han. Ich Bilgri Spiser da vorgenemt vergich, daz ich von ernstlicher bet wegen dez vorgenanten Berhtolt Brogers, won er aigens insigels niht hât, min insigel fúr in vnd alle sin erben gehenkt han an disen brief mir vnd allen minen erben gantzlich vnscha^edlich. Diz beschach vnd ward dirre brief geben ze sant Gallen an sant Thomas abent dez zwelfbotten vor wihenna^ehten in dem jâr, do von Cristus gebúrt wârent drúzehenhundert jâr, sibenzig jâr vnd darnâch in dem andern jâre.

Source Fulltext: Chartularium Sangallense VIII, Nr. 5331, S. 521-523.