Allen den, die disen brief an [sehe]nt^a) lesent oder ho^erent lesen, kúnden wir dis nâchgenemten Cůnrat vnd Hainrich die || Maiger von Obrendorf¹ geb[rů]der^a) vnd Elsbetha vnd V^edilhilt die Maigerinen iro swo^estran vnd veriehen offenlich || mit disem brief vmb das v[ic]h^a), so wir vorgenemten gebrůder disen nâchgenemten Růdolff Ro^echlin, Cůnrat dem || Brunner vnd Johansen Toppelstain burgern ze sant Gallen genomen haben, das wir vorgenemten geswústrit a^ellú vierú vnuerschaidenlich vnd v´nser ieklichs besunder gelopt vnd gelêrt aid ze den hailgen gesworn haben mit v^fgehabnen handen fúr v´ns vnd v´nser erben, den selben Růdolff Ro^echlin fúnf pfunt pfenning, Cůnrat Brunner fúnf vnd drissig schilling pfenning vnd Johansen Toppelstain drú pfunt pfenning alles gůter vnd gena^emer Costentzer múnse fúr das selb ir vich vnd fúr iren schaden gantzlich vnd gar ze gebenn vnd ze rihtenn^b) ald iren erben, ob sú ensint, hinnant ze sant Johans tag des To^vffers ze sunnwendi, der schierost kumt nach dem tag, als dirr brief ist geben, ân allen fúrzug vnd widerrede. Wa^er aber, das wir vff den selben na^ehsten sant Johans tag inen das selb gelt nit hettint ze gebenn vnd sich des der burgermaister vnd der rât ald die besorger ze sant Gallen ald der mêrtail vnder in erkandi, so mugent die selben ra^et ald die besorger ze sant Gallen dannanhin, als dik es sú notdurftig dunkt, v´ns darvmb fúrbass tag vnd frist geben, v´ns an v´nsren aiden vnd den vorgenemten iren burgern an iren rehten gantzlich vnscha^edlich. Wa^er aber, da vor got sie, das wir inen das vorgeschriben gelt niht rihtint vnd ga^ebint ze den ziln, als v´ns ie dann tag geben werdent, vnd es ân tag liessint stân, so sont vnd mugent die vorgenemten ir burger vnd ir erben vnd ir helffer v´ns darvmb angriffen vnd pfenden mit geriht vnd ân reht ân klag vnd ân zorn in stetten vnd vff dem lande, wâ vnd wie sú es getůn mugent, vntz das si der vorgeschribnen pfenning vnd des schaden, so darv^f dann gangen ist, es sie von zerung von klag mit botten mit brieuen oder von dehainen andren sachen, wie sich das fůgti, vnd o^vch des schaden, in den sú vnd ir helffer von dirr pfandung vnd angriffenns wegen koment, gantzlich gewert vnd v^sgeriht werdent ân allen ir schaden, vnd sol v´ns noch v´nser erben noch v´nser lút noch gu^eter da vor niht schirmen enkain frihait noch gewonhait enkain buntnust noch enkain reht weder gaistlichs noch weltlichs gerihtes noch enkain ander sach noch fúrzug. Vnd des alles ze offemm wâr[. . .v]rkúnde^a) vnd gantzer sicherhait aller vorgeschribnen dinge vnd gedinge so haben wir die obgenant[en]^a) Cůnrat vnd Hainrich Maiger von Obrendorf vnd Elsbetha vnd V^edilhilt die Maigerinen iro swo^est[ran]^a) v´nsrú insigel offenlich gehenkt an disen brief fúr v´ns vnd v´nser erben. Der ist geben ze sant Ga[llen]^a) an dem na^ehsten fritag vor sant Valentins tag, do man von Cristus gebúrt zalt drúzehenh[u]ndert^a) jâr vnd darnach in dem drú vnd sibentzigosten jâre.

Source Fulltext: Chartularium Sangallense IX, Nr. 5338, S. 5-6.