Dem hohwirdigen vnserm gna^edigen herren bischof Hainrich von Costentz¹ enb(ieten) wir Egelolf der Blarrer, Hainrich vnd Goschman die Spiser gebrůder burger ze Costentz vnd || Johans vnd Hainrich Snewisse gebrůder, die ze Triboltingen² sesshaft sint, vnsern willigen dienst vnd sendent v´ch vff an v´wer hant vnd mit disem brief bi Gerwig dem Blarrer || burger ze Costentz disv´ gu^eter, dv´ hie nach geschriben stant, a^ellv´ dv´ reht, dv´ vnser iegelicher svnderlich an den selben gu^etern hatt, dv´ a^ellv´ von v´ch vnd von v´werm gotzhus lehen sint, || das ist der hof vnd der zehend ze Nideren Ahe³, der hof ze Owenhouen⁴ bi Svmbri⁵, der hof ze Sa^eklerhůb⁶, der hof ze Aicha⁷, der zehend ze Lengwile⁸, der hof ze Schernlên⁹, der zehend ze Ffrassnaht¹⁰, dv´ waide ze Mettenberg¹¹ bi Na^engersriet¹², zwo schůpussen ze Ratzenwile¹³, der hof ze Heuenhouen¹⁴ vnd ain gu^etli haist der Bv´rgenderinen gůt¹⁵, vnd haben v´ns och alle mit gůtem willen verzigen in v´wer hant alles des rehten, so wir gemainlich ald svnderlich an den selben gu^etern hatten, mit dem gedinge, wes die pfleger vnd der maister des hailigen gaistes der dv´rftigen des spitales ze sant Gallen¹⁶ von der selben gu^eter wegen an des spitals stat mit v´ch v´berain koment, das ist v´nser aller gůter wille^a). Vnd des ze warem vrkv´nd geben wir die obgenanten Egelolf der Blarrer, Hainrich der Spiser vnd Johans Snewiss v´nserv´ insigel an disen brief, vnder dv´ selben insigel wir Goschman Spiser vnd Hainrich Snewiss v´ns bindin aller dirre dinge mit disem brief, vnd hab och ich der vorgenant Gerwig der Blarrer och min aigen insigel gehenket an disen brief zainer warhait, das ich mich och aller der lehenschaft, so ich an den selben gu^etern hatt, in des selben mins herren des bischoffes hant in dem selben reht verzih vnd verzigen hab. Der brief ist ze Costentz geben, do man von Cristes gebúrt zalt drv´zehenhvndert jar, darnach in dem aht vnd ffv´nfzigosten jar, an sant Lawrentyen abende.

Source Fulltext: Chartularium Sangallense VII, Nr. 4552, S. 397-398.