Wir diz nâchgenempten Go^eswin von Hohenfels¹ vnd frow Elzbeth sin êlichi hûsfrow hern Burkartz sa^eligen von Wartensêw² ritters wilunt êlichi tochter tu^egint kunt vnd veriêhint offenlich mit disem brieue fúr vns vnd alle vnser || êrben vnd nâchkomen allen den, die in sehent lesent oder ho^erent lesen, daz wir baidú vnuerschaidenlich vnd ainhelleklich mit gůter vorbetrachtunge von vnser rêdlichen nôt wegen den obern hof vnd den vndern hof ze || Bregentzdorf³ mit hûs mit hof mit wingarten mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit wasser mit wasserflússen mit gengen mit allen rechten nútzzen vnd gewon||haiten vnd mit allem dem, so von recht ald von gewonhait dârzů vnd dârin geho^erent vnd vntz her geho^ert hant, es sie benemptz ald vnbenemptz besůchtz ald vnbesůchtz wissentz ald vnwissentz, rêdlich vnd recht verko^vfft vnd ze ko^vffenn geben hant dem êrbern wolbeschaiden Johans Eggrich Bartholome Eggrichs êlichen sun burger ze sant Gallen vnd sinen êrben, ob er enist, vmb zwai hundert phunt vnd vmb fiertzig phunt phenning gůter Costentzer múnse, der wir gantzlich vnd gar von im gewert sient vnd an vnser baider offenn nutz bewendet hant, die selben vorgeschribenen ho^ef baid ze Bregentzdorf vnser recht êrblêhen wârent von dem êrwirdigen gotzthûs ze Salmanswiller⁴, dannen wir im o^vch die selben vorgeschribenn ho^ef den obern hof vnd den vndern hof ze Bregenzdorf mit allen rechten vnd mit aller zůgeho^erde, als da vor geschriben stât, recht vnd rêdlich geuêrtigot vnd zů sinen hannden vfgeben vnd bra^vcht hant, als da recht sitte vnd gewonlich waz vnd als es nâch dem rechten wol kraft vnd macht sol vnd mag han. Die selben vorgeschriben ho^ef baide habent wir im dafúr vnd in den rechten ze ko^vffen geben vnd geuêrtigot, daz da von noch dâr ab niht gât noch gân sol dann aller ja^erlich der grosse zehent vnd ain fierdung wachs von dem obern hof vnd ain fierdung wachs ab dem vndern hof ze Bregenzdorf an daz vorgeschriben gotzhus ze Salmanswiller vnd niht anders, vnd dâr vmb so haben wir vns willeklich verzigen vnd verzihent vns mit disem brieue fúr vns vnd alle vnser êrben gantzlich vnd gar der vorgeschribenn ho^ef dez vndern hofes vnd dez obern hofes ze Bregenzdorf mit aller zůgeho^erde aller aigenschaft aller manschaft aller lêhenschaft aller kuntschaft aller gewêr lút vnd brief alles gaistlichen vnd weltlichen rechtes aller vordrung vnd ansprâchen aller recht vnd rechtunge, so wir oder vnser êrben an den zů den vnd von der vorgeschribenn ho^ef wegen ze Bregentzdorf ie gehebt habent ald hienâch iemer mêr gehaben oder gewúnnen mo^echtint, vnd daz wir noch vnser êrben noch niemant andre an vnser statt noch von vnsern wegen den vorgenempten Johansen Eggrich noch sin êrben noch nâchkomen von der vorgeschribenn ho^ef wegen ze Bregentzdorf noch von dehainer iro zůgeho^erde wegen niemer mêr súllent noch wo^ellent ansprechen vftriben bekúmberren bekrenken noch in dehain wise beswa^eren weder mit gaistlichem noch mit weltlichem gerichte noch ân gerichte noch mit dekaynerlay ander sache ân gefa^erde. Wir habent o^vch baidú vnuerschaidenlich mit v´nsern trúwen an gesworner ayde stett gelobt vnd lobent mit disem brieue fúr vns vnd alle vnser êrben, der vorgeschribenn ho^ef vnd gu^eter ze Bregenzdorf mit aller zůgeho^erde vnd dez ko^vffes recht wern ze sinne nâch dez landes recht, vnd habent im vnd sinen êrben dârúber zů vns ze mêrer sicherhait ze rechtem wern geben vnd gesetzt den êrbern wolbeschaiden Bernhart Blârer⁵ miner obgenanten Elzbethen von Hohenfels êlichen sun burger ze sant Gallen, der mit vns gelobt hât mit siner trúwe an aines geswornen aydes statt, der vorgeschribenn ho^ef vnd gu^eter ze Bregenzdorf mit aller zůgeho^erde vnd dez ko^vffes recht wer ze sinne nâch dez landes recht vnd den egenempten Johansen Eggrich vnd sin êrben dâr vmb ze versprechen vnd ze versta^enne an allen stetten gen aller ma^englichem ân allen iro schaden, wenn wâ ald wie dik sú dâr vmb angesprochen vfgetriben geschadgot ald genotgot werdent mit dem rechten. Ta^etint wir dez nút, so hât der obgenant Johans Eggrich vnd sin helffer oder sin êrben vnd iro helffer, wer die sint, fryes vrlo^vb vnd vollen gewalt, nâch dem vnd sú von der vorgeschribenn ho^ef vnd gu^eter wegen ald dehainer ir zůgeho^erde wegen in dehain wise angesprochen oder vfgetriben werdent mit dem rechten, dâr nâch wenn sú wo^ellent vns vnd vnser êrben vnd den vorgenempten wern dâr vmb ze phendenn ze no^eten ze heften vnd an zegriffen an lúten vnd an gůte an ligendem vnd an varendem gůte vff dem lande vnd in den stetten mit gaistlichem vnd mit weltlichem gerichte vnd ân recht ân klag vnd ân zorn, wie vnd wa ald wahin sú daz getůn mugent, als vil vnd als dik, vntz daz sú von der selben ansprâch vnd o^vch von dem schaden, in den sú da von komen wa^erint, vnd o^vch dez schaden, in den sú von dez selben phenndens no^etens hêfftens vnd angriffens wegen komen wa^erint, gantzlich vnd gar entrigen erlo^est vnd entschadgot werdent, vnd sol vns noch vnser êrben nach den egenempten wem noch vnser noch dez selben wern lút noch gůt ligendes noch varendes hie vor noch hie wider niht schirmen noch gůt sin kain fryhait kain gewonhait kain lantfrid kain buntnusse kain burgrecht noch burgerrecht noch dekain ander recht noch gesetzt dez landes noch der stett gaistlichs noch weltlichs gerichtes noch dekainerlay ander sach noch fúrzug. Gienge o^vch der obgenant wer abe von todes wegen ald daz er suss von dehainen andern sachen vnnútz wurde inwendig dem zil vnd in den tagen, als man der vorgeschribenn gu^eter vnd ko^vffes nâch dez landes recht wer sin sol, wenn ald wie dik daz bescha^ech vnd wir denne von im von sinen poten ald mit sinen brieuen dâr vmb ermant werdent ze hus ze hof oder vnder o^vgen, so súllent wir im oder sinen êrben, ob er enwa^er, dâr nâch inrent den na^echsten fiertzehen tagen ainen andern wern geben, der als gůt vnd als gewúss sie vnd in allen den rechten alz der waz, der ab gegangen ist. Ta^etint wir oder vnser êrben dez nút, so hât der obgenant Johans Eggrich oder sin êrben vnd iro helffer, wer die sint, frijes vrlo^vb vnd vollen gewalt, dâr nâch, wenn sú wo^ellent, vnser lút vnd vnser gůte an zegriffen ze gelicher wise vnd in allen rechten, als vor mit worten vndeschaiden^a) ist, vnd so^ellent vnd mugent daz als vil vnd als dik tůn, vntz inen ain andre gewisser vnd gůter wer gesetzt vnd geben wirt vnd o^vch vntz daz inen alle die schaden abgelait vnd vsgericht werdent, in die sú da von komen wa^erint, ân gefa^erde. Wir habent o^vch dem obgenanten wern baidú vnuerschaidenlich mit vnsern trúwen gelobt vnd lobent im fúr vns vnd alle vnser êrben, von allem dem schaden ze helffen vnd ze lo^esen, in den er kumpt von diser vorgeschribenn werschaft vnd gelúbte wegen, vnd habent im vnd sinen helffern o^vch dar vmb erlo^vbt, vnser lúte vnd vnser gůte an ze griffen ze gelicher wise vnd in allen den rechten als dem obgenanten Johansen Eggrichen selber, vntz daz er gantzlich vsgericht wirt von allem dem schaden, in den er komen wa^er von der vorgeschribenn gelúbte vnd werschaft wegen. Vnd ze offenem wâren vrkúnde vnd sta^eter sicherhait aller dirre vorgeschribenn dinge vnd gedinge so haben wir ob genanten Go^eswin von Hohenfels vnd fro^vw Elzbeth sin êlichi wirtinne baidú vnsrú insigel fúr vns vnd alle vnser êrben offenlich an disen brief gehenket. Dâr nâch vergich ich obgenanter wer Bernhart Blârer ainer gantzen wârhait aller dirre vorgeschriben dinge vnd gedinge, so von mir an disem brief da vor geschriben stând, vnd ze mêrer sicherhait der selben dinge vnd gedinge so han ich o^vch min insigel offenlich an disen brief gehenket. Der geben wart ze sant Gallen in dem jâre, do von Cristus gebúrt wârent drútzehenhundert vnd achtzig jâr vnd dâr nâch in dem sibenden jâre, an dem na^ehsten zinstag nâch sant Agten tag.

Source Fulltext: Chartularium Sangallense X, Nr. 6167, S. 366-368.