Wir die nâchgenemten Johans vnd Albreht von Haydelberg gebrůder hern Johansen sa^elgen von Haydelberg ritters wîlunt êlichen sún¹ tu^en kunt || vnd veriehent offenlich mit disem brieue fúr v´ns vnd alle v´nser erben allen, die in sehent lesent oder ho^erent lesen, daz wir lieplich vnd gu^etlich v´ber||ain komen vnd verriht sigent gantzlich vnd gar mit den êrberen vnd wolbeschaidnen Bartholome Blârrer, Johansen Blârrer vnd Johansen am || Bolle phleger der siechen dez spittals ze sant Gallen² an dez selben spittals stat vmb alle die sto^esse misshellung vnd ansprâchen, die wir mit in ald zv^o in gehept habent vntz her vff disen húttigen tag, alz dirre brief geben ist, von der nâchgeschribenen ho^ef gu^eter schůppůssen vnd zehenden wegen, der hof, den man nemmet Sôrndal³, die múli da bi gelegen, der hof, den man nemmet der Bůba hof⁴, gelegen ze Zilschlaht⁵, die schůppůss an den Kúben⁴, zwô schůppůssen ze Bintzen⁴, die in den selben hof geho^erent, der hof, den man nemmet dez Ômen hof, o^vch gelegen ze Zilschlaht, der hof ze Vesersegge⁴, den man nemmet Hindernegg⁴, der hof am Lên⁶ gelegen an dem Riet⁷, der zehend ze Râtzzenwille⁸, der da gât ab dez Schenken hof von Kasteln⁹, vnd alle die ho^ef gu^eter schůppůssen vnd zehenden, die sú oder iro vordem an dez vorgedahten spittals stat vnd zv^o sinen handen von dem obgenanten hern Johansen von Haydelberg v´nserm vatter sa^elgen ie ko^vft hânt vntz her vff disen húttigen tag, alz dirre brief ist geben, sú wa^erint dez vorgenanten v´nsers vatters ald v´nser můter sa^elgen, wâ sú gelegen sint ald wie sú genemt sint, daz wir noch v´nser erben, ob wir enwa^erint, noch nieman andre an v´nser stat noch von v´nsern wegen die vorgenemten phleger noch dehain ir nâchkomen noch dehain ir buwlút noch hindersa^etzzen noch den vorgeschribenen spittal ze sant Gallen von der vorgedahten ho^ef múli gu^eter schůppůssen noch zehenden wegen niemer mêr súllent noch wellent ansprechen v^f triben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde, vnd habent o^vch fúr die selben sto^esse misshellung vnd ansprâchen von den obgenanten phlegern willeklich genomen vnd enphangen ahtzig phunt phenning gůter vnd gena^emer Costentzzer múnse, die an v´nsern offenn nutz komen sint vnd bewendet. Vnd darumb so habent wir baid gemainlich vnd vnuerschaidenlich gelobt mit v´nseren trúwen vnd lobent mit disem brieue fúr v´ns vnd alle v´nser erben, der vorgedâhten ho^ef múli gu^eter schůppůssen vnd zehenden vnd der vorgeschribenen rihtung reht wern ze sinne vnd o^vch die vorgenemten phleger vnd iro nâchkomen vnd o^vch den vorgedâhten spittal ze sant Gallen darumb ze versprechenn vnd ze versta^enne gen V^olrichen von Haydelberg¹⁰ v´nserm brůder vnd gen allen v´nseren geswistriden, ez sigent fro^vwen tohtren oder knaben, an allen stetten ân allen iren schaden, wenn wâ vnd wie dik sú darumb von in allen gemainlich ald von dehainem vnder in besunder angesprochen geschadgot oder v^fgetriben werdent mit geriht oder ân geriht. Wir die vorgenemten Johans vnd Albreht von Haydelberg gebrůder habent o^vch gesworn ietwedre besunder willeklich ainen gelêrten ait ze den hailigen mit v^f gehabenen vingern, bescha^ech, daz got niht welle, daz wir ald dehain v´nser geswistrit ald ieman andre an v´nser ald der selben vnser geswistrit stat ald von v´nsern wegen die vorgenemten phleger ald dehain ir nâchkomen ald dehain ir buwlút oder hindersa^etzzen ald den vorgeschribenen spittal ze sant Gallen von der vorgeschribenen ho^ef múli gu^eter schůppůssen ald zehenden wegen aller ald in dehainem tail v^f tribint oder anspra^echint ald sú daran sûmtint iertint oder schadgotint, ez wa^er mit geriht ald ân reht, wenn ald wie dik daz bescha^ech, wenn wir danne von den vorgenemten phlegern ald von ir nâchkomen, weli danne dez selben spittals phleger sint, ald von dehainem vnder in besunder ald von ir gewissen botten ald mit ir brieuen darumb ermant werdent vnder o^vgen, daz wir v´ns darnâch inrent den na^ehsten vier wochen ân allen fúrzug bi dem ait, den wir gesworn habent, antwúrten súllent gen sant Gallen ald gen Wîl¹¹ ald gen Arbon¹² in der driger stett ain, in weli dann ietwedre vnder v´ns wil, vnd súllent vss der selben stat noch fúr die selben mûren niemer komen noch varn won mit der vorgedahten phleger willen, weli dann ie dez selben spittals phleger sint, ê daz sú von der selben ansprâch vnd von dem schaden, in den sú da von ka^emint, gantzlich entrigen erlo^est vnd entschadgot werdent. Vnd ze ainem wâren vrkúnde vnd gantzzer sicherhait aller der vorgeschribenen dinge vnd gedinge so habent wir die vorgenemten Johans vnd Albreht von Haydelberg gebrůder fúr v´ns vnd alle v´nser erben v´nserú insigel gehenkt an disen brief. Darzů so habent wir erbetten die êrsamen junkher Wilhelm von Enne¹³ friien, hern V^olrich von A^emptz¹⁴ ritter vnd Haintzzen von Stainach¹⁵, die o^vch diz vorgeschribenen rihtung zwischen v´ns verta^edingot vnd gemachot hânt, daz sú ze ainer gezúgnust der vorgeschribenen dinge irú insigel ze v´nseren insigeln gehenkt hânt an disen brief. Wir die vorgenemten drige Wilhelm von Enne friie, V^olrich von A^emptz ritter vnd Haintz von Stainach veriehent offenlich mit disem brieue, daz wir von ernstlicher bet wegen der obgenanten Johansen vnd Albrehtz von Haydelberg gebrůder ze ainer gezúgnust der vorgeschribenen dinge vnd rihtung, die wir o^vch zwischen in vnd den obgenanten phlegern verta^edingot vnd gemachot habent, v´nserú insigel zv^o iren insigeln gehenkt habent an disen brief. Der geben ist ze sant Gallen an dem na^ehsten fritag vor sant Laurencis tag in dem jâr, do man zalt von gottes gebúrt drúzehenhundert jâr, sehszig jâr vnd darnâch in dem núnden jâre.

Source Fulltext: Chartularium Sangallense VIII, Nr. 5185, S. 355-356.