Allen^a) den, die disen brief ansehent lesent oder ho^erent lesen, kúnd ich V^edelhilt Nycolausen dez Maiiers sa^elgen || von Oberndorf êlichi tohter vnd vergich offenlich mit disem brieue fúr mich fúr alle min erben vnd nachkomen, daz || ich mit gůter vorbetrahtung vnd von miner redlicher not wegen minen tail vnd minú reht, daz ist der hof halbe gelegen || ze Oberndorf, den man nemmet der Maiier hof, daz hus hofstat vnd hofraiti halbs gelegen ze Oberndorf, die hofstett die garten vnd die zins halb ze Oberndorf vnd anderswa, die darzů vnd darin geho^erent, daz gůt halbes in den Grúnden mit hus mit hof mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit wasser mit wasserflússen vnd gengen mit allen rehten nútzzen vnd gewonhaiten vnd mit aller zv^o geho^erde, alz ez der obgenant min vatter sa^elig vntz an sinen tode gehept vnd genossen hât, ez sie genemptz oder vngenemptz, wissentz oder vnwissentz, redlich vnd reht verko^vft vnd ze ko^vffenn geben han den êrsamen hern Burkart von Ainwille ritter vnd Albreht von Ainwille sinem êlichen sun baiden gemainlich vnd vnuerschaidenlich vnd iren erben vmb ahtzig phunt vnd vmb drithalb phunt phenning gůter Costentzzer múnse, der ich gantzlich von in gewert bin vnd an minen offenn nutz bewendet, der selb vorgeschriben hof hus hofstett gelt vnd gu^eter ha^elbú min reht lêhen wârent von dem êrwirdigen gotzhus ze sant Gallen, dannen ich in o^vch den selben minen tail vnd minú reht reht vnd redlich gevertgot vnd zv^o iren handen brâht han, alz reht sitte vnd gewonlich waz vnd alz ez kraft vnd maht sol vnd mag han. Vnd darumb so han ich mich willeklich verzigen vnd verzich mich mit disem brieue gantzlich vnd gar fúr mich vnd alle min erben dez vorgeschribenen hofes dez hûs hofstett geltes vnd gu^eter vnd waz darzů geho^ert aller aigenschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so ich oder min erben, ob ich enwa^er, an den zv^o den vnd von dez vorgeschribenen hofes hûs hofstett geltes vnd gu^eter wegen ie gehept han ald hie nach iemer gehaben oder gewinnen mo^ehtint, vnd daz ich noch enkain min erben noch nieman andre an v´nser stat noch von v´nseren wegen die vorgenemten hern Burkart von Ainwille noch Albreht sinen sun noch dehain iro erben noch nâchkomen von dez vorgeschribenen hofes hûs hofstett geltes noch gu^eter wegen niemer súllent noch wellent ansprechen vftriben bekúmberren bekrenken noch in kain wis beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Ich han o^vch gelobt mit miner trúwe vnd loben mit disem brieue fúr mich vnd fúr alle min erben, dez vorgeschribenen halben hofes, den man nemmet der Maiier hof, dez hûs hofstett hofraiti geltes vnd gu^eter halber mit aller zv^o geho^erde vnd dez ko^vffes reht wer ze sinne nach dez landes reht vnd o^vch die vorgenemten hern Burkart von Ainwille vnd Albreht sinen sun vnd iro erben, ob sú enwa^erint, darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wâ vnd wie dik sú darumb an gesprochen geschadgot oder vf getriben werdent mit dem rehten. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nâch reht darzů gehortent ald ho^eren soltent vnd nôtdurftig wârent vnd alz ez kraft vnd maht sol vnd mag han. Vnd ze vrkúnd der wârhait aller der vorgeschribenen dinge vnd gedinge so han ich V^edelhilt Mairin da vorgenemt fúr mich vnd fúr alle min erben min aigen insigel gehenkt an disen brief. Der geben ist ze sant Gallen an dem na^ehsten fritag nach sant Gregorien tag in dem jâr, do von Cristus gebúrt warent drúzehenhundert jâr, sibenzig jâr vnd darnach in dem sehsten jâre.

Source Fulltext: Chartularium Sangallense IX, Nr. 5498, S. 168-169.