Allen^a) den, die disen brief ansehent lesent oder ho^erent lesen, kúnden wir die nâchgenemten V^olrich vnd Cůnrat genant von Meldegg gebrůder vnd veriehen || offenlich mit disem brieue fúr v´ns fúr alle v´nser erben vnd nachkomen, daz wir mit gůter vorbetrahtung vnd von v´nser redlicher nôt wegen vnd o^vch nâch || v´nser frúnde vnd nâch ander erber lút rât daz hûs hofstat vnd hofraiti gelegen ze Oberndorf in dem dorf, die bo^vmgarten die garten die hofstett || vnd die akker alle gelegen ze Oberndorf, die wir zv^o v´nsern handen gehept vnd genossen habent vntz her vff disen húttigen tag, alz dirre brief ist geben, vnd die wisun gelegen in dem Wissholtz¹, die man nemmet Ba^echlis² wis, mit allen rehten nútzzen vnd gewonhaiten vnd mit allem dem, so von reht ald von gewonhait darzů vnd darin geho^ert, wâ ez gelegen ist ald wie ez genemt ist, redlich vnd reht verko^vft vnd ze ko^vffenn geben habent den ersamen hern Burkart von Ainwîlle ritter vnd Albreht von Ainwille sinem êlichen sun baiden gemainlich vnd vnuerschaidenlich vnd iren erben, ob sú enwa^erint, vmb zehen phunt phenning gůter vnd gena^emer Costentzzer múnse, der wir gantzlich von in gewert sient vnd enphangen habent vnd an v´nser baider offenn gemainen nutz bewendet, daz selb vorgeschriben hûs hofstat hofraiti bo^vmgarten garten hofstett akker vnd o^vch die wis v´nser reht lehen wârent von dem êrwirdigen gotzhûs ze sant Gallen, dannen wir in o^vch daz selb hûs hofstat hofraiti bo^vmgarten garten hofstett akker vnd o^vch die wisun mit allen rehten vnd mit aller zv^o geho^erde reht vnd redlich geuertgot vnd zv^o iren handen braht habent, alz reht sitte vnd gewonlich waz vnd alz ez kraft vnd maht sol vnd mag han. Vnd darumb so habent wir vns willeklich verzigen vnd verzihent vns mit disem brieue gantzlich vnd gar fúr v´ns vnd fúr alle v´nser erben dez vorgeschribenen hûs hofstat hofraiti bo^vmgarten garten hofstett akker vnd o^vch der wisun mit aller zv^o geho^erde aller aigenschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so wir oder v´nser erben, ob wir enwa^erint, an dem zv^o dem vnd von dez vorgeschribenen hûs hofstat hofraiti bo^vmgarten garten hofstett akker vnd wisun wegen ie gehept habent ald hie nâch iemer gehaben oder gewinnen mo^ehtint, vnd daz wir noch v´nser erben, ob wir enwa^erint, noch nieman andre an v´nser stat noch von v´nsern wegen die vorgenemten hern Burkart von Ainwille noch Albreht sinen sun noch dehain iro erben noch nachkomen von dez vorgeschribenen hûs hofstat hofraiti bo^vmgarten garten hofstett akker noch wisun wegen niemer súllent noch wellent ansprechen vf triben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân geriht noch mit enkainer lay ander sache ân alle geua^erde. Wir habent o^vch baid vnuerschaidenlich gelobt mit v´nseren trúwen vnd lobent mit disem brieue fúr v´ns vnd fúr alle vnser erben, dez vorgeschribenen hûs hofstat hofraiti bo^vmgarten garten hofstett akker vnd o^vch der wisun mit aller zv^o geho^erde vnd dez ko^vffes reht wem ze sinne nach dez landes reht vnd o^vch die vorgenemten hern Burkart von Ainwille vnd Albreht sinen sun vnd iro erben, ob sú enwa^erint, darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wâ vnd wie dik sú darumb an gesprochen geschadgot oder vf getriben werdent mit dem rehten. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nâch reht darzů gehortent ald ho^eren soltent vnd nôtdurftig warent vnd alz ez kraft vnd maht sol vnd mag han. Vnd ze vrkúnd der wârhait aller der vorgeschribenen dinge vnd gedinge so habent wir die vorgenemten V^olrich vnd Cůnrat von Meldegg gebrůder fúr v´ns vnd fúr alle v´nser erben v´nserú insigel gehenkt an disen brief. Der geben ist ze sant Gallen an sant Gregorien tag in dem jâr, do man zalt von Cristus gebúrt drúzehenhundert jâr, sibenzig jâr vnd darnâch in dem sehsten jâre.

Source Fulltext: Chartularium Sangallense IX, Nr. 5496, S. 166-168.