. . Officialis curie Constanciensis omnibus presencium inspectoribus || subscriptorum noticiam cum salute. Noverint presentium inspectores || universi, quod constituti coram nobis proxima feria quarta post dominicam || qua cantabatur Invocavit sub anno domini M°. trecentesimo quadragesimo septimo iudicii in figura Elizabeth, Prida et V^olricus germani liberi Hainrici dicti Priner de Amergeswile¹ renuntiaverunt omni iuri sibi conpetenti in decima possessionum seu agrorum sitorum in Obernstetten² in parrochia Hennowe³, quibus ab uno latere confinantur campus seu agri^a) ville Swartzenbach⁴, ab uno vero latere agri villanorum in Nidernstetten⁵, ab uno vero latere agri villanorum in Hennow et ab uno latere agri villanorum in Abelgershuser⁶, pridem per predictum Hainricum patrem ipsorum vendita . . provisori seu pauperibus hospitalis in sancto Gallo⁷ ad manus . . provisoris et pauperum hospitalis predicti, et corporale prestiterunt sacramentum coram nobis, quod numquam contra premissam renuntiacionem veniant verbo vel facto per se vel per alios publice vel oculte dolo et fraude in premissis penitus circumscriptis, adhibitis in premissis verborum et gestuum sollempnitatibus debitis et consuetis. In quorum testimonium sigillum curie nostre Constanciensis ad peticionem dictorum germanorum presentibus est appensum. Datum Constancie anno et die predictis, ind. quintadecima.

Source Fulltext: Chartularium Sangallense VI, Nr. 4009, S. 533-534.