Wir^a) Wenczlaw von gotes gnaden Romischer kunig zu allen czeiten merer des reichs || vnd kunig zu Beheim embieten dem burgermeister rate vnd burgern gemeinlichen || der stat zu sand Gallen vnsern vnd des reichs lieben getrewen vnser gnade vnd alles gute. || Lieben getrewen, vmb die gewonlich stewre, die ir vns vnd dem reiche alle jar vff sand Merteins tag pflichtig seit zugeben, heissen vnd gebieten wir euch ernstlich vnd vesticlich bey vnsern vnd des reichs hulden, das ir Hansen von Bodmen⁴ vnserm diener vnd lieben getrewen dieselbe stewre des jares, als man czelet noch Cristes geburt dreyczenhundert jar vnd newnczig jare, vf sand Merteins tag desselben jares genczlichen von vnsern vnd des reichs wegen richtet vnd beczalet. Wann so ir das getan habet, so sagen wir euch derselben sand Merteins tag stewre des egenanten jares genczlich vnd gar qweit ledig vnd loze. Mit vrkunt dicz brieues versigelt mit vnserr kuniclichen maiestat insigel. Geben zu Prage noch Cristes geburt dreyczenhundert jar vnd dornach in dem sibenvndachczigisten jaren, an dem montag in der crewcz wochen, vnserr reiche des Beheimschen in dem viervndczweinczigisten vnd des Romischen in dem eynleften jaren.

Source Fulltext: Chartularium Sangallense X, Nr. 6183, S. 383-384.