Officialis curie Constanciensis omnibus presentes litteras intuentibus subscriptorum noticiam cum salute. Noverint presencium inspectores universi, quod constituti coram nobis sub anno domini M°CCC°XLVII° feria secunda ante festum assumpcionis beate Marie virginis proxima tamquam iudicii in figura Růdolffus dictus Suter de Arbona¹ et Elsina filia quondam Heinrici dicti Koser uxor legitima ipsius Růdolffi ex una, Eglolffus et Alberchtus dicti Blarer fratres ex parte altera, prefatus Růdolfus et Elsina uxor sua fatebantur in iure coram nobis se sponte et libere bona deliberacione prehabita et tractatu sollempni premisso vendidisse et vendendo tradidisse iusto vendicionis tytulo pro se et heredibus suis prefatis Eglolffo et Alberchto dictis Blarer fratribus decimam in Lenggenwile² sitam in parrochia ecclesie in Arbona iuxta curiam dictam Achzenholtz³ feodalem a reverendo in Christo patre ac domino V^olr. dei gracia episcopo Constanciensi⁴ nomine episcopatus Constanciensis, ad cuius manus dicti vendentes predictam decimam libere resignarunt predictis fratribus racione vendicionis et tradicionis predict(e) conferendam, cum omnibus iuribus et pertinenciis suis pro quadraginta tribus libris denariorum Constanciensium, quas dicti coniuges se ab eisdem fratribus fatebantur recepisse et in usus ipsorum utiles ac necessarios et evidentes convertisse et conversas fore, transferentes et resignantes omne ius sibi competens in predicta decima iurium et pertinenciarum eius pure et simpliciter et integraliter libera voluntate sine dolo et fraude ipsorum et heredum suorum nomine per resignacionem debitam et sollempnem in predictos Eglolffum et Alberchtum fratres ac ipsorum heredes seu successores de consensu et voluntate prelibati domini V^olrici episcopi ipsis fratribus dictam decimam cum omnibus iuris^a) et pertinenciis suis ad requisicionem et resignacionem predictorum coniugum vendencium conferentis omni eo iure, sicut predicti vendentes eandem decimam tenuerunt et possiderunt. Renunciantes pro se et suis heredibus et specialiter predicta Elsina corporali prestito sacramento per eram^b) specialiter prestito in premissis excepcioni doli mali circumvencionis et decepcionis quarumlibet et excepcioni ultra dimidiam iusti precii, peccunie non numerate non tradite non solute, beneficio cuiuslibet restitucionis in integrum, litteris, graeiis, iuris^a) et consuetudinibus universis editis et edendis omnique suffragio canonum atque legum, quibus mediantibus ea, que premissa sunt, in toto vel in aliqua sui parte vicari^c) seu inpungnari possent seu quomodolibet anullari. Caruerunt et caruere^d) promiserunt predicti vendentes pro se et suis heredibus de quolibet evictionis periculo, constrenendo^e) se warandos predicte decime in Lengenwile, prout iuris et^f), adhibitis in premissis omnibus et singulis verborum et gestuum sollempnitatibus debitis et consuetis. In quorum omnium et singulorum firmitatem et robur ac testimonium sigillum curie nostre Constanciensis ad peticionem predictorum coniugium^g) seu vendencium duximus presentibus appendendum. Datum et actum Constancie anno et die predictis, ind. quintodecima.

Source Fulltext: Chartularium Sangallense VI, Nr. 4044, S. 556-557.