Ich^a) Jacob Růpreht, den man nemmt der Lo^ew, statamman ze sant Gallen¹ tůn kunt vnd vergich offenlich an disem brieff allen den, die in || sehent oder ho^erent lesen, das fúr mich kam ze sant Gallen in der stat an dem na^ehsten ffritag nâch sant V^olrichs tag, do ich offenlich || ze geriht sass, die beschaiden tohter Elsbeth Arnoltin, Hainrich Arnoltz sa^eligen wîlunt burgers ze sant Gallen êlichi tohter, vnd die nam ze || fúrsprechen Hainricen Garnleder o^vch burger ze sant Gallen, der offnote vnd veriah offenlich vor mir in dem geriht von ir wegen vnd an ir stat vnd sprach, si wo^elt êtwas offnung vnd vergiht vor mir in dem geriht tůn, vnd batt mich mit dem selben irem fúrsprechen ze erfarenn an ainer vrtail, wie si das tůn so^elt vnd mo^eht, das es kraft hett. Do frâgte ich vorbenemter amman vrtail vmb vnd wart ertailt mit gemainer vrtail, das si das mit irem rehten erbornen vogt tůn so^elt vnd das das dann wol kraft hêtt vnd haben so^elt vnd mo^eht nâch dem rehten. Vnd do ze stêtt do offnote vnd veriah da die obgenant Elsbetha Arnoltin mit dem beschaiden Laurentzen Arnolt, der ir rehter erborner vogt was, frilich vnd willeklich mit wolbedahtem můt vor mir offenlich in dem geriht, das ir die erber fro^vw Adelhait Kilchouerin, die man||
nemmt Beggelhubin, Růdolffs Kilchouers sa^eligen, den man nammt Beggelhub, o^vch wilunt burgers ze sant Gallen êlichi wirtinne, vnd ir sun Cůnrat lieplich gantzlich vnd gar vnd êrberlich widerrechnot widergeben vnd geantwurt hettin alles ir gůt, es wa^erint pfenning win korn husgera^et oder dehainerlay ander ding, was das wa^er ald wie es genemt wa^er, das die fromen wîsen der burgermaister vnd der rât ze sant Gallen dem vorbenemten Růdolff Kilchouer sa^elgen, den man nammt Beggelhub, die wil er in lip wa^er, von ir wegen vnd zů ir handen beuolhen vnd geantwurt hettin als irem getrúwen vogt vnd phleger, won si ir den selben Růdolff den Kilchouer, do er in lip wa^er, ze ainem vogt vnd phleger zůgeben hettint, vnd liesse o^vch do die selb Elsbeth Arnoltin mit dem vorbenemten irem rehten erbornem vogt offenlich vor mir in dem geriht frilich vnd willeklich die obgenanten Adelhaiden Kilchouerinen, die man nemmt Beggelhubin, des obgenanten Růdolfs Kilchouers sa^elgen, den man nammt Beggulhub, wilunt elichen wirtinnen vnd Cůnraten irn sun vnd ir erben, ob si ensint, vnd o^vch die vorgedahten . . den burgermaister vnd den rât vnd die burger gemainlich der stat ze sant Gallen vnd alle iro erben vnd nâchkomen vmb das selb vorgedaht gůt aller ding gantzlich quit ledig vnd los fúr sich vnd ir erben, vnd lobte o^vch do ze stett die selb Elsbeth Arnoltin mit ir vnd mit des obgenanten ir rehten erbornen vogtes handen offenlich vor mir in dem geriht mit ir trúwen frilich vnd willeklich vnd lobet mit disem brief, das si noch ir erben noch ieman andre von ir wegen noch an ir stat die obgenanten Adelhaiden Kilchoferinen, die man nemmt Beggelhubin, noch Cůnraten ir sun noch kain iro erben, ob sú enwa^erint, noch die vorgedahten den burgermaister den rât noch die burger gemainlich der stat ze sant Gallen noch kainen burger von sant Gallen besunder noch ir erben noch nâchkomen vmb das vorgedaht ir gůt noch von des selben gůtes noch von der selben vogtye ald phlegnust wegen niemer weder nv noch hienach so^ellin noch wellint ansprechen v^fftriben bekúmberren noch bekrenken noch in kain wîse beswa^eren weder mit gaistlichem noch mit weltlichem geriht noch ân reht noch mit kainen andern sachen. Vnd ist dis alles beschehen vnd vollfu^ert reht vnd redlich mit allen den worten vnd werken, so darzů gehortent vnd geho^eren soltent vnd als mit gemainer vrtail nâch miner frâg ertailt wart, das es billich kraft vnd maht nu vnd hienach haben so^elt. Vnd des alles ze offemm wâren vrkúnde han ich der obgenant Jacob Růpreht statamman ze sant Gallen min insigel nâch rehter vrtail offenlich gehenkt an disen brief,vnd wir die obgenanten Elsbeth Arnoltin des obgenanten Hainrich Arnoltz sa^elgen wilunt êlichi tohter, Laurentz Arnolt ir vogt vnd Hainrice Garnleder ir fúrsprech als vorgeschriben stât veriehent offenlich ain gantz wârhait aller der dinge, so von v´ns da vorgeschriben stât an disem brief, vnd des ze merer sicherhait so habent wir o^vch v´nsrú insigel gehenkt an disen brief. Dis beschah vnd wart dirr brief geben ze sant Gallen an dem vorgedahten fritag in dem iâre, do man zalte von Cristus gebúrt drúzehenhundert jar vnd darnach in dem fúnf vnd ahtzigosten jâre.

Source Fulltext: Chartularium Sangallense X, Nr. 6087, S. 272-274.