Allen^a) den, die disen brief ansehent lesent oder ho^erent lesen, kúnd ich Hainrich Satler Johansen Satlers sa^elgen wilunt burgers ze sant Gallen êlicher || sun vnd vergich offenlich mit disem brieue fúr mich vnd fúr alle min erben, daz ich mit wolbedahtem můt nach miner frúnde vnd nâch ander erber lút || rât zehen schilling phenning gůter vnd gena^emer Costentzzer múnse ja^erliches geltes in margtzreht ab dem vnd von dem hus hofstat vnd hofraiti || gelegen ze sant Gallen in der stat an Můlter gassen², daz Hainrich Haswillers o^vch burgers ze sant Gallen ist, das selb hûs hofstat vnd hofraiti ainhalb stosset an Cunrat Kammers hus vnd anderthalb an Růdolf Lyrers hûs, redlich vnd reht verko^vft vnd ze ko^vffenn geben han den ersamen gaistlichen fro^vwen der priorinen vnd dem conuent gemainlich sant Katherinen closters gelegen bi der stat ze sant Gallen³ vnd allen iren nâchkomen vmb siben phunt phenning gůter vnd gena^emer Costentzzer múnse, der ich gantzlich von in gewert bin vnd enphangen han vnd an minen offenn nutz bewendet. Darzv^o so han ich mit gůter vorbetrahtung luterlich durch got vnd durch miner vordern sêlen hailes willen ze ainem rehten sta^eten vnd êwigen almůsen willeklich vnd frilich den vorgedahten minen fro^vwen der priorinen vnd dem conuent gemainlich dez vorgeschribenen sant Katherinen closters reht vnd redlich geben vnd gib inen vnd allen iren nâchkomen mit vrkúnd diz brieues ain phunt phenning gůter vnd gena^emer Costentzzer múnse ja^erliches geltes o^vch in margtzreht ab dem vnd von dez Varnbu^elers berg, der wîlunt Hermans dez Kechen sa^elgen waz, gelegen ze sant Gallen an sant Mangen berg⁴ vnd ab allem vnd von allem dem, so darzů vnd darin geho^ert, vnd han in o^vch die vorgeschribenen zehen schilling phenning geltes ab dez vnd von dez vorgenemten Hainrich Haswillers hus hofstat vnd hofraiti vnd o^vch daz phunt phenning geltes von dez vnd ab dez vorgedahten Varnbu^elers berg reht vnd redlich geuertgot vnd zv^o iren vnd zv^o dez selben closters handen braht, alz reht sitte vnd gewonlich waz vnd alz ez kraft vnd maht sol vnd mag han, mit so^elicher beschaidenhait vnd gedinge, daz die vorgedahten min fro^vwen ze sant Katherinen closter vnd alle iro nachkomen daz vorgeschriben phunt phenning geltes von dem vnd ab dem vorgedahten berg aller ja^erlich ie ze sant Gallen tag vnd die zehen schilling phenning geltes von dez vnd ab dez vorgenanten Hainrich Haswillers hûs hofstat vnd hofraiti aller ja^erlich ie ze sant Martis tag innemen haben vnd niessen sont. Vnd darumb so han ich mich willeklich verzigen vnd verzieh mich mit disem brieue gantzlich vnd gar fúr mich vnd fúr alle min erben der vorgeschribenen drissig schilling phenning geltes in margtzreht von dem vnd ab dem vorgeschribenen berg hus hofstat vnd hofraiti mit aller zv^o geho^erde aller aigenschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so ich oder min erben, ob ich enwa^er, an den zv^o den vnd von der vorgeschribenen drissig schilling phenning geltes wegen ie gehept habent ald hie nâch iemer gehaben oder gewinnen mo^ehtint, vnd daz ich noch enkain min erben noch nieman andre an v´nser stat noch von v´nsern wegen die vorgedahten min fro^vwen die priorinen noch den convent gemainlich dez vorgeschribenen sant Katherinen closters ze sant Gallen noch dehain iro nachkomen von der vorgeschribenen drissig schilling phenning geltes wegen niemer súllent noch wellent ansprechen vf triben bekúmberren bekrenken noch in kain wis beswa^eren weder mit gaistlichem noch mit weltlichem geriht noch ân reht noch mit enkainer lay ander sache ân alle geua^erde. Ich han o^vch gelobt mit miner trúwe vnd loben mit disem brieue fúr mich vnd fúr alle min erben, der vorgeschribenen drissig schilling phenning geltes wer ze sinne nach der stat ze sant Gallen reht vnd gewonhait vnd o^vch die vorgedahten fro^vwen in sant Katherinen closter vnd iro nachkomen darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wâ vnd wie dik sv´ darumb an gesprochen geschadgot oder vf getriben werdent mit dem rehten. Vnd ze vrkúnd der wârhait aller der vorgeschribenen dinge vnd vergiht so han ich erbetten den ersamen Bartholome den Blârrer burger ze sant Gallen, daz er sin insigel fúr mich vnd fúr alle min erben gehenkt hât an disen brief, won ich aigens insigels niht han. Darzv^o so han ich erbetten die erbern Blarrer Sta^ehellin vnd Johansen Sporer o^vch burger ze sant Gallen, daz sv´ o^vch irú insigel zv^o dez obgenanten Bartholome Blarrers insigel ze ainer gezúgnust aller der vorgeschribenen dinge gehenkt hant an disen brief inen vnd allen iren erben gantzlich vnscha^edlich. Darnach vergich ich Hainrich Haswiller da vorgenemt offenlich mit disem brieue, daz alles daz, so von mir an disem brief da vorgeschriben stât, mit minem gůten willen vnd gunst beschehen vnd vollefu^ert ist. Vnd ze merer sicherhait der selben dinge so han ich o^vch fúr mich vnd fúr alle min erben vnd nâchkomen min aigen insigel gehenkt an disen brief. Der geben ist ze sant Gallen an sant Markus abent dez hailigen ewangelisten in dem jâr, do man zalt von Cristus gebúrt drúzehenhundert jâr vnd darnach in dem a^eht vnd sibenzigostem jare.

Source Fulltext: Chartularium Sangallense IX, Nr. 5643, S. 320-321.