Wir Wenczlaw von gotes gnaden Romischer kunig ze allen zeiten merer des reichs vnd kunig zu Behem bekennen vnd tun kunt offênlich mit disem brieue allen || den, die yn sehen oder horen lesen, das wir haben angesehen stete getrewe vnd nutcze dienste, die die burgermeister rate vnd burger gemeinlich der stat zu sant || Gallen vnsere vnd des reichs liben getrven vnsern vorfarn an dem riche Romischen keisern vnd kunigen vnd mit namen dem allerdurchluchtigsten fursten vnd herren hern Karlen || Romische(n) keiser zu allen ziten merer des richs vnd kunig zu Behem vnserm lieben herren vnd vater offte getrewlich vnd nucelich getan haben vnd vnsselber tegelichen tun vnd noch furbas tun sullen vnd mogen in kunftigen ziten, vnd darumb von geheisse des egenanten vnsers lieben herren vnd vaters haben wir sie mit rechter wissen mit kuniglicher mechte volkummenheit vnd auch rate vnserr vnd des reichs lieben getrewen gefreyet vnd begnadet freyen vnd begnaden mit crafft dicz brieues, also das eyn apt oder pfleger des goczhus zu sant Gallen den egenanten burgern vnd der stat zu sant Gallen geswornes gerichtes vor irem richter gestaten sol vber alle schulden vnd sachen, die von alter her fur einen statammann daselbs gewonlich gehoren, also das der burgermeister vnd der rat oder die besorger derselben stat zu sant Gallen vff ire eyde vnd truwe von iren mitburgern etwemenigen darzu kiesen sullen vnd mugen, die mit demselben irem richter sweren zu den heiligen gelert eyde, vor demselben irem richter vrteil zu vellen vnd zu richten vnd niemants anders, vber alle vorgeschriben schulden vnd sachen, so verre sie es kunnen, dem armen als dem reichen vnd dem reichen als dem armen burgern gesten vnd allermeinclichen an geuerde. Wolte aber yn der egenant apt oder pfleger des vorgenanten geswornes gerichtes nicht hengen noch gestaten, als vorgeschriben stet, so geben wir den obgenanten burgern zu sant Gallen vollen gewalt macht vnd recht, das^a) dasselb gesworn gericht ordenen beseczen vnd furen sullen vnd mugen in aller der masze vnd weyze, als vorgeschriben stet, vnd sol auch das egenant gesworn gericht in aller der crafft vnd macht seyn besteen vnd beleiben an widerrede vnd hindernu^ezz allermeinclichs, als das gericht, das die vorgenanten burger bisher von dem vorgenanten apte gehabt haben, gewesen vnd bestanden ist, an alles geuerde. Auch von besundern gnaden so geben wir yn die freyheit vnd gnade, das sie alle die leute, es seyn man oder frawen freyen vnd auch ander leute, die vff dem lande gesessen seyn, die zu dem goczhus zu sant Gallen gehoren, zu burger empfahen sullen vnd mugen, vnd auch dieselben leute vnd ir leiberben, die sie also zu burger empfahen, mugen mit husrowche sessehaft beleyben bey yn oder vff dem lande oder wo sie wollen vnd yn das fugelich ist, doch so sullen dieselben leute vnd ir leiberben, die also zu burgern empfangen sein oder hernach werden, desselben burgerrechtes geniessen vnd in der vorgenanten burger schirme vnd rechten mit allen friheiten diensten vnd gewonheiten ruweklich vnd vollenklich beleiben an geuerde vnd hindernusse allermeinclichs in aller der masse vnd wyze, als ob sie bey yn in der egenanten irer stat zu sant Gallen huslich heblich sessehafft vnd wonhafft weren vnd ire eygen husrowche bey yn da hetten. Darumb gebieten wir allen fursten geistlichen vnd werltlichen grauen freyen herren dienstluten rittern knechten lantfogten vogten richtern amptluten steten gemeinden vnd allen andern vnsern vnd des reichs getrewen vnd vndertanen vesteclich bey vnsern vnd des reichs hulden, das sie die vorgenanten burgermeister rat vnd burger gemeinlich der offtgenanten stat zu sant Gallen wider diese vnsere gnade vnd freyheit nicht hindern yrren dringen oder besweren in dheineweis, sunder sie dabey getrewlich behalten vnd darzu schutzen vnd schirmen sullen gen allermeinclich, als liep yn sey vnsere swere vngenade zu vermeiden. Wer aber yemant, wer der were, der wider diese vnsere gnade vnd freiheit freuelichen tete, der sol in vnser vnd des reichs vngenade vnd darzu eyner rechten pene dreissig mark lotiges goldes, als offte der dawider tut, swerlich verfallen seyn, die halb in vnser vnd des reichs camer vnd das ander halbteyl den offtgenanten burgern zu sant Gallen, die also vberfaren werden, on alles mynnernu^ezz sullen genauen. Mit vrkunt dicz brieues versigelt mit vnserr Romischen kuniglichen maiestat ingesigel. Der geben ist zu Prage nach Cristus geburte dreyczehenhundert jar, darnach in dem acht vnd sibenczigsten jare, an sant Margarethen tag, vnserr reiche des Behemischen in dem sechczehenden vnd des Romischen in dem dritten jaren.

Source Fulltext: Chartularium Sangallense IX, Nr. 5656, S. 333-334.