Allen^a) den, die disen brief ansehent lesent oder ho^erent lesen, kúnden wir Cůnrat vnd Hainrich die Maiger von Obrendorff || gebrůder vnd veriehen offenlich mit disem brief, das wir baid vnd ietwedre besunder mit gůter vorbetrahtung vngebunden || vnd vngeuangen gelêrt aid ze den hailgen gesworn haben mit v^fgehêpten vingern vmb die vanknust, als v´ns die fúrsich||tigen wîsen der burgermaister vnd die burger ze sant Gallen in ir stat gehaimot vnd geuangen hattent von des wegen, das wir iren burgern ir vich genomen hattent, des selben burgermaisters vnd der burger aller gemainlich ze sant Gallen vnd aller dero, die an der selben vanknust dehain schuld gehept hant, lûter vnd gůt frúnd ze sinne vnd die selben getât vnd vanknust gen inen noch gen niemann, wer daran dehain schuld gehept hat, niemer ze a^eferrenn weder mit worten noch mit werken weder mit geriht noch ân reht noch in kain wîs vnd inen frúnd ze frúnden darvmb ze gewinnenn ân alle geua^erde, vnd haben inen hierúber ze mêrer sicherhait zůtz v´ns ze wern geben dis nâchgenemten v´nser o^ehen Bartholomen Blârrer vnd Hainrich, Fridrich vnd Blârrer die Blârrer gebrůder, Hainrich den Scherer vnd Cůnraten sinen sun, alle burger ze sant Gallen, die hânt inen gelopt, wa^er, davor got sie, das wir v´nser ait v´bersehint vnd die selben vanknust vnd getât iemer a^efertint ald ieman von v´nsren wegen vnd dis geswornen frúntschaft bra^echint in dehain wîs, das sú danne ir vientschaft an v´ns legen vnd vff v´ns stellen sont mit allen den dingen vnd in aller der wîse als die selben burger ze sant Gallen. Vnd des alles ze offemm wâren vrkúnde vnd ze ainer sta^eten sicherhait aller vorgeschribnen dinge vnd gedinge so haben wir Cůnrat vnd Hainrich die Maiger von Obrendorff da vorgenemt v´nsrú insigel offenlich gehenkt an disen brief. Darnach veriehen wir die vorgenemten Bartholome Blarrer, Hainrich, Fridrich vnd Blârrer die Blârrer, Hainrich Scherer vnd Cůnrat sin sun wern, alz vorgeschriben stât, offenlich, das alles das wâr ist, das von v´ns da vorgeschriben stât an disem brief. Vnd des ze mêrer sicherhait so haben wir o^vch v´nsrú insigel gehenkt an disen brief. Der ist geben ze sant Gallen an dem na^ehsten samstag vor sant Valentins tag, do von Cristus gebúrt wârent drúzehenhundert jâr vnd darnach in dem drú vnd sibentzigosten jâre.

Source Fulltext: Chartularium Sangallense IX, Nr. 5339, S. 6-7.