Wir Karl von gots gnaden Romischer keiser zu allen zeiten merer des reichs vnd kunig zu Behem embiten || dem burgermeister rat vnd burgern gemeinlich zu sante Gallen vnsern vnd des reichs liben getrewen || vnser genad vnd alles gut. Vmb die gewonlich stewr, die ir vns vnd dem reiche vff sante Merteins tage || iarlich pflichtig seit zu geben, empfelhen vnd gebiten wir ewren trewen ernstlich bei vnsern vnd des reichs hulden, daz ir die selben stewr Rudger Manes burgermeister zu Czurich³ vnserm vnd des reichs liben getrewen vff sante Merteins tage, der schirest kumpt, genczlich gebet vnd beczalet on widerrede vnd hindernusse, vnd wenn ir das also getan habt, so sagen wir euch vnd dieselben stat zu sante Gallen von dem egenanten sante Merteins tage genczlich quit ledig vnd los. Mit vrkund dicz briues versigelt mit vnser keiserlichen maiestat insigel. Geben zu Mencz nach Cristus geburte drewczenhundert jare, dornach in dem viervndsibenczigstem jare, an dem nehsten freitag nach aller heiligen tage, vnser reiche in dem newnvndczwenzigsten vnd des keisertums in dem czwenczigstem jare.

Source Fulltext: Chartularium Sangallense IX, Nr. 5421, S. 96-97.