Wir Karl von gotes gnaden Romischer keyser zu allen zeiten merer des reichs vnd kunig zu Be||heim embieten den burgermeister rate vnd burgern gemeinlich der stat zu sant Gallen vn||sern vnd des reichs lieben getrewen vnser hulde vnd alles gut. Vmb die gewonliche steure, die ir || vns vnd dem reiche jerlichen pflichtig seit zu geben auff sant Mertins tag, gebieten wir euch ernstlichen vnd vesteclichen bey vnsern hulden, das ir dieselbe steure dem vesten Rudiger Mannes³ von Czúrich vnserm lieben getrewen gebet in aller der maße, als ir ym die vormals nach ander vnser brieue laute gegeben habt, vnd wann ir das also getan habt, so sagen wir euch der vorgenanten steure ase von diesem jare quijt ledig vnd lozz. Mit vrkunt dicz brieues versigelt mit vnser keyserlichen maiestat ingesiegel. Der geben ist zu Prage nach Cristus geburte dreyczenhundert jar, dor nach in dem funffvndsibenczigsten jare, am nehsten suntag nach sant Vrbans tage, vnser reiche in dem newnvndtczwenczigsten vnd des keysertums in dem eynvndczwenczigsten jaren.

Source Fulltext: Chartularium Sangallense IX, Nr. 5453, S. 126.