Allen^a) den, die disen brief ansehent lesent oder ho^erent lesen, kúnde ich Johans Gna^epser burger ze sant Gallen vnd vergich || offenlich mit disem brief fúr mich vnd alle min erben von der anlegung wegen, alz mich die fúrsichtigen wisen der || burgermaister vnd die grossen ra^et der stat ze sant Gallen vmb hundert pfunt vnd vmb fúnfzig pfunt pfenning || gůter Costentzer múnse angelait hattent, inen die selben pfenning ze gebenn vnd ze rihtenn fúr den schaden vnd gebresten, so si vnd ir burger von minen wegen enpfangen hant von Cůnraten von Múnchwille¹, von Bertolt dem Zouinger sinem amman vnd von sinen helffern von der sto^esse vnd v^flo^eff wegen, als mich der selb Bertolt Zouinger mit lantgriht v^ftraib, das ich mit gůter vorbetrahtung offenlich vnd frilich vnd vnbetwungenlich nâch miner frúnde vnd ander erberr lút rât gelopt han mit miner trúw vnd darnach gesworn han ainen ait zů den hailgen mit gelêrten worten vnd mit v^fgehabnen vingern, also das ich noch kain min erben noch nâchkomen noch nieman andre von v´nsren wegen noch an v´nser stat die vorgedahten den burgermaister noch die ra^et noch die burger gemainlich der stat ze sant Gallen noch ir kainen besunder noch ir erben noch nâchkomen vmb die selben anlegung noch vmb die selben hundert pfunt vnd fúnfzig pfunt pfenning gůter Costentzer múnse, der ich si gewert han, noch von der selben pfenning vnd anlegung wegen niemer weder nu noch hienach so^ellint noch wellent ansprechen v^ftriben bekúmberren noch bekrenken noch in kain wîs beswa^eren weder mit gaistlichem noch mit weltlichem geriht noch ân reht noch in kain wîs ân alle geua^erde. Vnd han mich darüber verzigen vnd verzihe mich mit disem brief offenlich fúr mich vnd alle min erben alles rehten gaistlichs vnd weltlichs gerihtes aller vordrung vnd ansprachen aller helff vnd alles v^szugs, damit ich ald min erben ald ieman andre von v´nsren wegen ald an v´nser stat wider die vorgeschriben sach gantzlich oder an dehainem tail iemer kundint ald mo^ehtint komen oder getůn in dehain wîs, ân alle geua^erde. Vnd des alles ze offemm wâren vrkúnde vnd ze ainer sta^eten sicherhait aller vorgeschribnen dinge vnd vergiht so han ich der obgenant Johans Gna^epser min insigel fúr mich vnd alle min erben vnd nâchkomen offenlich gehenkt an disen brief. Der ist geben ze sant Gallen an dem na^ehsten fritag nâch sant Gallen tag in dem jâr, do man zalt von Cristus gebúrt drúzehenhundert jâr, sibentzig jâr vnd darnach in dem vierden jâre.

Source Fulltext: Chartularium Sangallense IX, Nr. 5420, S. 95-96.