Wir^a) Wenczlaw von gotes gnaden Romischer kunig zu allen zeiten merer des reichs || vnd kunig zu Beheim embieten dem burgermeister rate vnd burgern gemeinlichen || der stat zu sant Gallen vnsern vnd des reichs lieben getrewen vnser gnade vnd al||les gut. Lieben getrewen, vmb die gewonliche stewre, die ir vns vnd dem reiche alle jar vff sant Merteins tag pflichtig seit zu geben, heissen vnd gebieten wir euch ernstlich vnd vesticlich bey vnsern vnd des reichs hulden, das ir Hansen von Bodmen vnserm diener vnd lieben getrewen dieselbe stewre des jares, als man czelet nach Cristes geburt dreyczenhundert jare vnd newnvndachczig jare, vff sant Merteins tage in demselben jare genczlich richtet vnd beczalet. Wann so^b) das getan habt, so sagen wir euch von vnsern vnd des reichs wegen sulcher stewre desselben jares vff sant Merteins tag genczlich vnd gar quit ledig vnd loze. Mit vrkunt dicz briefs versigelt mit vnserr kuniglichen maiestat insigele. Der geben ist zu Prage nach Cristes geburt dreiczenhundert jar vnd dornach in dem sibenvndachczigisten jare, des montages in der crewczwochen, vnserr reiche des Beheimschen in dem viervndczweinczigisten vnd des Romischen in dem eyleften jaren.

Source Fulltext: Chartularium Sangallense X, Nr. 6185, S. 385.