Wir^a) Geori von gottes gnâden abt¹ vnd der conuent gemainlich des gotzhus ze sant Gallen sant Benedicten ordens in Costentzer bystům, das ân alles mittel zůgeho^ert dem stůl ze Ro^vme, veriehen vnd tu^en kunt mit || disem brief fúr v´ns vnd fúr alle v´nser nâchkomen allen, die in sehent lesent oder ho^erent lesen, das wir mit gůter vorbetrahtung ainhellklich vnd mit rât v´nser frúnd v´nsers gotzhus dienstlúten vnd ander v´nsers gotzhus lieben getrúwen || mit den fromen wîsen lúten dem burgermaister dem amman dem rât vnd mit den burgern gemainlich armen vnd richen der stat ze sant Gallen lieplich vnd frúntlich v´berain komen sien vmb die sto^esse vnd misshellung, so wir mit || inen vnd si mit v´ns vntz her vff disen húttigen tag, als dirre brief ist geben, mit an ander gehept hânt, als hie nâch geschriben stât. Des êrsten das die selben burger vnd ir nâchkomen ia^erlich ie ze sant Johans tag des To^vffers ze súngihten vnd ze sant Johans tag ze wihenna^ehten ainen rât an v´ns vnd v´nser nâchkomen vordren vnd von v´ns nemen sont, vnd das o^vch wir inen ainen rât geben vnd erlo^vben so^ellint, als von alter vntz her sitt vnd gewonlich gewesen ist, ân alle geua^erde, vnd das der selb rât vmb enkain sach rihten sol, die fúr ainen amman geho^ert. Es sol o^vch ain amman vss dem rât nit gân, wenn si von aines herren vnd von des gotzhus wegen ze sant Gallen rêden wênt, ez sie dann, das si ze den ziten mit ainem hêrren ze sant Gallen sto^essig sien vnd si von der selben sto^esse wegen rêden wellent, darvmb mag ain rât ainen amman wol haissen v^s gân, vntz das die rêd vnd die frâg vollefu^ert wirt, ân geua^erd. Wa^er aber, das in dem rât vmb dehain sach gerêtt wurd, die ainem herren vnd dem gotzhus ze sant Gallen zů gehorti, das mag ain amman in dem rât wol versprechen, dúhti aber den amman, das es im ze ha^eftig war, so mag er das fúr v´ns vorbenemten abt Georien vnd fúr v´nser nâchkomen bringen. Es sol o^vch ain rât von v´nser vorbenemten abt Georien noch von v´nser nâchkomen hofgesind noch von v´nsren herren ze closter noch von ir gesind noch von pfaffen noch von schůlern niht rihten, won das si bi den gesetztan belîben sont, als wir vnd die selben burger darvmb vormals mit anander v´berain komen sint. Es sol o^vch der rât enkainem v´nsers gotzhus wib noch man fúr si nit gebieten, die ir burger nit sint, ez wa^er dann, das si fra^eueltint in den gerihten ze sant Gallen. Es sol o^vch ma^enlich, er sie burger oder nit, vmb gelegen gůt vmb êrb vnd vmb êrbschaft von dem andern reht nemen vor dem amman, da er hin geho^ert, als von alter vntz her reht sitte vnd gewonlich gewesen ist, vnd sont das der rât noch die burger ze sant Gallen nit sumen. Was aber ieman zů dem andern ze sprechenn hât von geltschulde wegen, da mag ie der man reht vmb nemen vnd sůchen, als vntz her sitt vnd gewonlich gewesen ist. Es mag o^vch ain amman ainen sinen frúnd oder gesellen, welen er wil, der des râtes ist, bitten, das er v´nser vnd v´nsers gotzhus reht in dem rât vordre an siner stat in aller der wîs, als ob er selb da sa^ess, vnd sont o^vch der rât noch die burger das nit sûmen. Wir vorbenemter abt Geori vnd v´nser nâchkomen so^ellin o^vch den selben burgern ze sant Gallen ainen statamman geben, wen wir wênt, der ain êrber man ist vnd burger ze sant Gallen ist, vnd sol o^vch der rihten, als von alter vntz her sitt vnd gewonlich gewesen ist. Wa^er o^vch, das wir vorgenemter abt Geori ald v´nser na^echkomen selber vff der pfallentz ze sant Gallen niht rihten wo^eltint ald mo^ehtint, so so^ellin wir ainem probst ze sant Gallen oder ainem v´nser herren des cappittels, welhem wir wellint, enphelhen ze rihtenn vff der pfallentz an v´nser stat, als dik es notdurftig ist, ze gelicher wîs, als ob wir selber ald v´nser nâchkomen da rihtin, ân allain vmb rehtú lêhen. Es sont o^vch die selben burger ze sant Gallen enkain v´nsers gotzhus wib noch man ze burger nit enpfâhen, won die dannanhin ze sant Gallen in der stat hablich bi inen sitzent mit hûsro^vchi, als von alter vntz her sitt vnd gewonlich gewesen ist. Wa^er aber, das v´ns vorbenemten abt Georien ald v´nser nâchkomen oder v´nser amptlút dúhti, das dehainer mit hûsro^vchi dannanhin nit sa^ess, den si ze burger enpfangen hânt oder noch ze burger enpfâhent, als vorgeschriben stât, wâ wir dann ald v´nser nâchkomen oder dehain v´nser amptman swêrent ainen gelêrten ait ze den haiigen vnd zwên êrber man mit im, die im des helffent, das der sin burgreht niht gehalten hab, als vorgeschriben stât, so sont die selben burger dannanhin des selben lip noch gůt vor v´ns noch vor v´nsren nâchkomen nit schirmen, ân êdel lút, die mugent sitzen, nâch dem so si burger werdent, wâ es in fůgklich ist. Es sont o^vch a^ellú sunder gu^eter, die inwendig den vier crútzen ze sant Gallen gelegen sint, mit stúran mit diensten vnd mit allen gewonhaiten belîben, als sú abt Herman sa^elig² v´nser vorvar brâht hât vntz an sinen tod, ân geua^erde. Wa^er o^vch, das dehain burger ze sant Gallen sin gůt, ez sie lantgůt oder sundergůt, das vssrent den vier crútzen ze sant Gallen gelegen ist, selber buwen wo^elt oder von im lîhen, vnd den dúhti, das vff sinú gu^eter mêr stúran gelait wa^erint, dann er da von billich geben so^elt, so so^ellin wir vorgenemter abt Geori oder v´nser nâchkomen ald v´nser amptlút drie der na^ehsten nâchgebûren nemen, si sient burger oder nit, vnd so^ellin o^vch wir vnd die burger ze sant Gallen die selben darzů bringen, das si das tu^egent, vnd sont die drie das gůt besehen vnd sont darnâch swêren gelert ait ze den hailgen, wie si dunk, das man das gůt besetzen mo^eht v´ber die zins, die v´ns vnd v´nserm gotzhus darv^s gânt, vnd was si darvmb gemainlich oder der mêrtail vnder inen sprechent, des sont si den dritten pfenning von dem gůt ze stúr geben, vnd sol o^vch des v´ns vnd v´nser nâchkomen von dem selben gůt benu^egen. Es sont o^vch die burger ze sant Gallen dú múnsmâl vnd dú gewiht, dú zů der múns geho^erent, vnd die frônwâg ze sant Gallen v´nserm múnsmaister în antw´urten, vnd sol o^vch der die frônwâg ald als ma^enig wâg sú notdurftig sint, henken an die stêtt, da si dunkt, das es inen notdurftig sie vnd aller fůgklichost, vnd sol o^vch der múnsmaister a^ellú gewiht besehen vnd v´berslahen, als dik es notdurftig ist, vnd sont o^vch dú gewiht belîben bi dem lo^vn, als von alter vntz her sitt vnd gewonlich gewesen ist. Es sont o^vch die múller, die die vier múlinan hânt vor Hu^esstor³, fúr ainen hofamman ze geriht gân, als es von alter her ko^ernen ist vmb die sachen, so die selben vier múlinan antreffent. Es sont o^vch alle pfister ze sant Gallen ze den selben vier múlinan maln vnd varn, als von alter her sitt vnd gewonlich gewesen ist. Die selben burger ze sant Gallen hânt o^vch gewalt, die múlistat vnd die múli vor Spîser tor⁴ ze buwenn hinnanhin, wenn sie wêllent, vnd sont v´ns vnd v´nsren nâchkomen vnd v´nserm gotzhus von nu sant Gallen tag dem na^ehsten v´ber ain jâr vnd dannanhin ja^erlich vnd êweklich da von geben vnd rihten, als von der selben múli von alter sitt vnd gewonlich gewesen ist, ân allen fúrzug, si bûwen die múli oder nit. Si sont o^vch ainen erbern man ir burger ir râthus ze sant Gallen vnuerzogenlich haissen enpfâhen von v´ns vorbenemten abt Georien, als gewonlich ist ze sant Gallen húser ze enpfâhenn, vnd wenn der, der es enpfangen hât, abstirbt, als dik das beschiht, so sont si es ainen andern ir burger haissen enpfâhen, vnd so^ellin o^vch wir ald v´nser nâchkomen im das selb râthus lihen in aller der wîs, als vorgeschriben stât. Es sol o^vch ain bûmaister v´nsers múnsters ze sant Gallen den schopf von der kilchen ze sant Laurencien⁵ hin v^f vntz an das hoftúrli besorgen vnd des pflegen, vnd was im da von vorbestan mag v´ber das, des der selb schopf notdurftig ist, das sol er lêgen vnd geben an v´nsers múnsters bûw. Bescha^eh o^vch, das dehain wib oder man ze sant Gallen ainander ze gemainder nemen woltint, das sont si tůn vor ainem allichen geriht, vnd sont o^vch die, die dann da anander ze gemainder nement, die gemaind dannanhin niessen, als reht ist, wer aber das nit ta^et, zů dem so^ellin wir vnd v´nser nâchkomen v´nsers rehten wartent sin. Bescha^ech o^vch, das dehain v´nsers gotzhus wib oder man in den spittal ze sant Gallen ka^emi in sinem todbett vnd da absturb, die so^ellin wir vorbenemter abt Geori vnd v´nser nâchkomen vnd v´nser amptlút êrben in gelîcher wîs, als ob si hie vss wa^erint ab gestorben. Was o^vch der selb spittal dienstlút hât, es sient wib oder man oder noch innement, die v´nsers gotzhus sint vnd die in dem spittal absterbent, die so^ellint o^vch wir vorbenemter abt Geori v´nser nâchkomen vnd v´nser amptlút êrben an dem, so si lânt, ze gelicher wîs, als ob si hie vss abgestorben wa^erint. Bescha^eh o^vch, das dehain fro^vw oder man, die v´nsers gotzhus sint, ir varent gůt in den spittal geben woltint, das mugent si tůn, doch also das die spittalmaister, die dann maister vnd pfleger sint, v´ns vorbenemten abt Georien vnd v´nsren nachkomen mit iren trúwen an aines geswornen aides stat loben sont, das si noch nieman von iren noch von des selben spittals wegen dem selben, der dann das gůt in den spittal geben hât, noch sinen erben noch niemann von sinen wegen gantzlich noch an enkainem tail weder bi sinem leben noch nâch sinem tod widergeben noch widerkeren sont, won das es dem spittal ru^eweklich vnd vnanspra^echig belîben sol. Bescha^eh o^vch, das dehain wib oder man, die v´nsers gotzhus sint, sin varent gůt in den spittal ga^eb vnd o^vch selber in den spittal damit ka^em vnd darinne absturb, den so^ellin wir abt Geori da vorgenemt v´nser nâchkomen vnd v´nser amptlút êrben an dem, so er lât nâch sinem tod v´ber das, das er in den spittal vormals brâht vnd geben hât, in gelicher wîs, als ob er hie vss ab gestorben wa^er. Es mugent o^vch die spittalmaister den selben, die in den spittal komen sint, es sient fro^vwan oder man, si habint ir gůt dahin geben oder nit, vrlob geben vnd o^vch sú vrlob nemen, wenn sú wellent vnd inen fůgklich ist, vnd doch also, das das gůt, das in den spittal geben ist, dem spittal ru^eweklich beliben sol. Es sont o^vch die spittalmaister ainem ielichen, den si in den spittal enpfâhen wênt, ez sient fro^vwan oder man, sagen, wie si in in den spittal enpfâhen sont, als vorgeschriben stât. Es ist o^vch sunderlich v^s bedingot vnd berêtt, was wir vnd v´nser gotzhus ze sant Gallen gegen den vorgedâhten burgern vnd der stat ze sant Gallen vnd o^vch die selben burger vnd die stat ze sant Gallen gegen v´ns vnd v´nserm gotzhus ander reht frîhait vnd gůter gewonhait habent, ân dú stuk, dú hie vor an disem brief verschriben stânt, das wir dabi vnd darvmb gegen anander belîben vnd bestân so^ellint, als von alter vntz her reht sitte vnd gewonlich gewesen ist, ân alle geua^erde. Vnd ze offnem wâren vrkúnd vnd sta^eter sicherhait diser vorgeschribnen rîhtung vnd aller der stuk, so hie vor an disem brief verschriben stânt, so haben wir abt Geori da vorgenemt vnd der conuent gemainlich des gotzhus ze sant Gallen v´nser vnd v´nsers conuentes insigel fúr v´ns vnd fúr alle v´nser nâchkomen offenlich gehenkt an disen brief. Dis beschach vnd wart dirre brief geben ze sant Gallen in der stat an dem na^ehsten samstag vor sant Vrbanus tag in dem jâr, do man zalt von Cristus gebúrt drúzehenhundert jâr, sibentzig jâr vnd darnach in dem dritten jâre.

Source Fulltext: Chartularium Sangallense IX, Nr. 5356, S. 27-30.