Wir^a) die priolin vnd der conuent gemainlich des gotzhuses ze sant Katherinen gelegen ze sant Gallen in || der vorstat¹ Predier ordens in Costentzer bystum veriehen vnd kúnden offenlich mit disem brief fúr v´ns vnd || v´nser nachkomen, won das hus hofstat vnd garte gelegen an vnserm conuent, das wilunt des Midensuns was, || vnd sunderlich das hindertail des selben huses v´ns vnd v´nserm conuent niht komenlich was noch fůgklich von des wegen, das es an v´ns vnd an v´nserm conuent gelegen was vnd in ander lúte hant was, darvmb so haben wir das selb hus alles das hinder vnd das vordertail hofstat vnd garten mit aller zůgeho^erde ainmu^etklich mit v´nsers obern vnd mit ander v´nser frúnde rât vnd vnderwisung mit bedâhtem můt durch v´nsern vnd v´nsers conuentes nutz von dem beschaidenn kneht Eglin Ba^echin ko^vfft ze v´nsern handen vmb fúnf vnd vierzig pfunt pfenning Costentzer múnse, vnd haben nu das vorgeschriben hindertail des selben huses, won v´ns das selb tail sunderlich vnfůgklich was, ab der hofstat gefu^ert vnd verko^vfft vmb zwelff pfunt vnd vmb fúnfzehen schilling pfenning der vorgeschribnen múnse. Vnd won v´ns des alles die êrsamen der burgermaister vnd der rât ze sant Gallen durch v´nser bett vnd durch v´nsers conuentes fromen vnd nutz gegunnen vnd erlo^vbt hant, darvmb so haben wir inen gelopt vnd haben v´ns vnd v´nser nâchkomen darzů gebunden vnd bindent v´ns mit disem brief, also das wir vnd v´nser nâchkomen das vorder hus hofstat hofraiti vnd garten den burgern vnd der stat ze sant Gallen aller ja^erklich sunderlich verwachen verdienen vnd verstúran so^ellin vnd wellen fúr zwai vnd drissig pfunt vnd fúnf schilling pfenning Costentzer múnse, alle die wîle das selb hus hofstat hofraiti vnd garte in v´nsern vnd v´nsers conuentes gewalt vnd handen stât. Wenn aber wir es verko^vfft vnd ainem, der o^vch burger ze sant Gallen ist, ze ko^vffenn geben haben, so sont wir vnd v´nser nâchkomen vnd v´nser conuent der vorgeschribnen gelúpt vnd buntnust gegen den selben burgern vnd der stat ze sant Gallen gantzlich ledig sin. Vnd des alles, so hie vorgeschriben stat, ze offemm wâren vrkúnde vnd sta^eter sicherhait geben wir die vorgedahten die priolin vnd der conuent gemainlich des vorgedahten gotzhus ze sant Katherinen den vorgedahten burgern vnd der stat ze sant Gallen disen brief mit v´nserm vnd v´nsers conuentes insigel besigelt fúr v´ns vnd v´nser nâchkomen. Dirre brief ist geben ze sant Gallen an dem na^ehsten zinstag vor sant Mychels tag in dem iâr, do von Cristus gebúrt warent drúzehenhundert jâr vnd darnach in dem ain vnd ahtzigosten jâre.

Source Fulltext: Chartularium Sangallense IX, Nr. 5867, S. 531-532.