Wir^a) Chůno von gottes gnaden abt vnd der conuent gemainlich dez gotzhus ze sant Gallen tu^en kunt vnd verie||hen offenlich mit disem brieue fúr v´ns vnd fúr alle v´nser nachkomen allen, die in sehent lesent oder ho^erent lesen, daz || wir ansehent vnd angesehen habent die getrúwen dankna^emen dienst, die v´ns vnd v´nserm vorgeschribenen gotzhus die || beschaiden fro^vw Catherina von Hûsen Hainrichs sa^elgen von Hûsen wilunt êlichi husfro^vw dik willeklich getân hat vnd noch wol getůn mag, vnd sunderlich daran, daz si durch ir vnd durch ir vordem selen nutz vnd hailes willen an sant Gallen múnster in der stat ze sant Gallen vnd an den buwe dez selben sant Gallen múnsters willeklich vnd frilich geben hat disú nachgeschribenen gu^eter vnd zehenden, die von vns vnd vnserm gotzhus ir reht lehen wârent, daz gu^etli ze Mutwille, daz gu^etli ze Búrrwalt vnd den zehenden ze Albreswille, die selben trúwe wir angesehen vnd erkent haben vnd habent der êgenanten fro Catherinen von Husen mit Bartholome Blarrers dez vorgeschribenen sant Gallen múnsters phlegers vnd buwmaisters gůtem willen vnd gunst ze ainem rehten lipgedinge vnd in lipgedinges wis vnd reht geben vnd gebent ir mit vrkúnd diz brieues reht vnd redlich die vorgeschribenen gu^eter vnd zehenden daz gu^etli ze Mûtwille, daz gu^etli ze Búrrwalt vnd den zehenden ze Albreswille mit so^elicher beschaidenhait vnd in dem rehten, daz die vorgenemt fro Catherina von Husen die vorgeschribenen gu^eter vnd zehenden mit allen rehten vnd mit aller zv^o geho^erde in lipgedinges wis vnd reht haben niessen besetzzen vnd entsetzzen sol, alle die wile si lebt vnd in lip ist, vnd wenne si danne erstirbet vnd enist von todes wegen, so sont danne die vorgeschribenen gu^eter vnd zehenden mit allen rehten nútzzen vnd gewonhaiten vnd mit aller zv^o geho^erde dem vorgenemten Bartholome Blarrer oder sinen nâchkomen, wele dann ie dez vorgedahten sant Gallen múnsters phleger vnd buwmaister ist, an dez selben múnsters stat dannenhin gantzlich vnd gar ledig sin vnd lôs, also daz enkain der vorgenanten fro Catherinen erben dannehin daran noch darzů enhain reht vordrung noch ansprachen niemer mêr haben noch gewinnen sont an gaistlichem noch an weltlichem geriht noch ân reht noch mit enkainer lay ander sache ân alle geua^erde. Bescha^ech o^vch, daz die vorgenemt fro Catherina von Hûsen bi ir leben an ir libes nôtdurft gebresten gewunni, daz got niht welle, so hât si friies vrlob vnd vollen gewalt, darnach, wenn si wil, der vorgeschribenen gu^eter vnd zehenden alz vil ze versetzzenn, alz si dann ie bedarf zv^o ir libes not, ân alle geua^erde, vnd súllent wir noch v´nser nächkomen noch der phleger vnd buwmaister dez vorgeschribenen sant Gallen múnsters noch nieman andre an v´nser stat noch von v´nsern wegen die vorgenemten fro Catherinen von Husen daran niht sumen noch ierren mit geriht noch ân reht ân alle geua^erde. Vnd ze vrkúnd der warhait aller der vorgeschribenen dinge vnd gedinge so habent wir abt Chůno vnd der conuent gemainlich dez vorgeschribenen gotzhus ze sant Gallen v´nser insigel vnd v´nsers conuentes insigel fúr v´ns vnd alle v´nser nächkomen gehenkt an disen brief. Darnach vergich ich Bartholome Blarrer phleger vnd buwmaister ze disen ziten dez vorgeschribenen sant Gallen múnsters ze sant Gallen ainer gantzzer warhait aller der dinge, so von mir an disem brief da vorgeschriben stant, vnd ze merer sicherhait der selben dinge so han ich o^vch min insigel gehenkt an disen brief. Der geben ist ze sant Gallen an sant Andres abent dez hailigen zwelfbotten in dem jar, do man zalt von Cristus gebúrt drúzehenhundert phunt^b), sibenzig jare vnd darnach in dem núnden jare.

Source Fulltext: Chartularium Sangallense IX, Nr. 5755, S. 428-429.