Wir^a) Chůno von gottes gnâden abt dez gotzhus ze sant Gallen¹ tůn kunt vnd veriehen offenlich mit disem brieue allen, die in sehent lesent oder ho^erent || lesen, daz fúr vns kam ze sant Gallen an dem tag, alz dirre brief geben ist, do wir offenlich ze geriht sassent, die beschaiden fro^vw Katherina von Hûsen Hain||richs sa^elgen von Hûsen² wilunt elichi husfro^vw, vnd offenot da die selb Katherina von Husen mit fúrsprechen offenlich vor vns vnd dem geriht vnd sprach, daz si || mit gůter vorbetrahtung willeklich vnd frilich luterlich durch got vnd durch ir vnd ir vordem selen nutz vnd hailes willen disv´ nachgeschribenen gu^eter vnd zehenden, die von vns vnd vnserm gotzhus ir reht lehen wa^erint, daz gu^etli ze Mûtwille³, daz gu^etli ze Búrrwalt⁴ vnd den zehenden ze Albreswille⁵ mit allen rehten nútzzen vnd gewonhaiten vnd mit allem dem, so von reht ald von gewonhait darzů vnd darin geho^ert, ez sie genemptz oder vngenemptz gesůchtz oder vngesůchtz wissentz oder vnwissentz, reht vnd redlich gantzlich vnd gar geben vnd vertgen an sant Gallen múnster ze sant Gallen in der stat vnd an den buwe dez selben sant Gallen múnsters, vnd bat vns mit irem fúrsprechen eruarn an ainer vrtail, wie si daz tůn so^elt vnd mo^eht, alz reht wa^er vnd daz ez kraft hett vnd haben mo^eht nv vnd o^vch hie nach. Daz taten wir vnd ward ertailt mit gemainer vrtail, daz si ainen vogt nemen so^elt an dem ring, wen si wo^elt, vnd daz si danne mit ir vnd mit dez selben ir vogtes handen die vorgeschribenen gu^etli vnd zehenden mit allen rehten vnd mit aller zv^o geho^erde an vnser hant vf geben so^elt vnd vns die bitten ze lihenn Bartholome dem Blarrer phleger vnd buwmaister dez selben múnsters ze sant Gallen an dez selben múnsters stat vnd zv^o sinen handen. Do nam si ze vogt Hainricen Eberhart burger ze sant Gallen, vnd gab o^vch do die vorgenant Katherina von Husen offenlich vor vns vnd dem geriht willeklich frilich vnd vnbezwungenlich reht vnd redlich mit ir vnd mit dez vorgenanten Hainrices Eberhartz ir vogtes handen die vorgeschribenen gu^etli vnd zehenden mit allen rehten vnd mit aller zv^o geho^erde vf an vnser hant vnd batent vns die lihen ze rehtem lehen dem vorgenemten Bartholome dem Blarrer an dez selben sant Gallen múnsters stat vnd zv^o sinen handen vnd an den buw dez selben múnsters. Daz taten wir durch ir bet vnd lúhent dem vorgenemten Bartholome dem Blarrer vnd lihent im mit vrkúnd diz brieues reht vnd redlich die vorgeschribenen gu^etli vnd zehenden, daz gu^etli ze Mûtwille, daz gu^etli ze Búrrwalt vnd den zehenden ze Albreswille mit allen rehten vnd mit aller zv^o geho^erde ze rehtem lehen an den buw dez vorgeschribenen sant Gallen múnsters vnd zv^o dez selben múnsters handen. Vnd verzech sich o^vch do die vorgenant Katherina von Hûsen mit dem vorgedahtem irem vogt offenlich vor vns vnd dem geriht willeklich frilich vnd vnbezwungenlich vnd verziht sich mit disem brieue reht vnd redlich fúr sich vnd fúr alle ir erben der vorgeschribenen gu^etlin vnd zehenden mit aller zv^o geho^erde aller aigenschaft aller lehenschaft aller kuntschaft aller gewer lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so si oder ir erben an den zv^o den vnd von der vorgeschribenen gu^eter vnd zehenden wegen ie gehept hat ald hie nach iemer gehaben oder gewinnen mo^ehtint, vnd daz si noch ir erben, ob si enwa^er, noch nieman andre an iro stat noch von iro wegen den vorgenemten Bartholome den Blarrer noch dehain sin nachkomen noch daz vorgeschriben sant Gallen múnster an den vorgeschribenen gu^etlin vnd zehenden noch an dehainer iro zv^o geho^erde niemer súllent noch wellent an sprechen vf triben bekúmberren bekrenken noch in kain wis beswa^eren weder mit gaistlichem noch mit weltlichem geriht noch an reht noch mit enkainer lay ander sache ân alle geua^erde. Die vorgenemt Katherina von Hûsen lobt o^vch do mit ir trúwe vnd lobet mit disem brieue fúr sich vnd fúr alle ir erben, der vorgeschribenen gu^eter vnd zehenden mit aller zv^o geho^erde reht wer ze sinne nach dez landes reht vnd o^vch den vorgenemten buwmaister Bartholome den Blârrer vnd sin nachkomen darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wa vnd wie dik sv´ darumb an gesprochen geschadgot oder vf getriben werdent mit dem rehten. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd nôtdurftig warent vnd alz ez kraft vnd maht sol vnd mag han. Vnd ze vrkúnd der warhait aller der vorgeschribenen dinge vnd vergiht so haben wir abt Chůn abt dez gotzhus ze sant Gallen da vorgenemt vnser insigel gehenkt an disen brief. Darnach veriehent wir die vorgenemten Katherina von Hûsen vnd Hainrice Eberhart ir vogt in der vorgeschribenen sache ainer gantzzer warhait aller der dinge, so der erwirdig v´nser gna^ediger herre abt Chůn abt dez gotzhus ze sant Gallen da vorgenemt von v´ns da vor an disem brief veriehen hat, vnd ze merer sicherhait der selben dinge so han ich Hainrice Eberhart vogt da vorgenemt o^vch min insigel gehenkt an disen brief, vnder daz selb insigel ich die vorgenant Katherina von Husen mich willeklich gebunden han, won ich aigens insigels niht han, war vnd sta^et ze lassenn alles, daz von mir da vorgeschriben stat an disem brief. Der geben ist ze sant Gallen an sant Katherinen abent in dem jar, do man zalt von Cristus gebúrt drúzehenhundert jâr, sibenzig jâr vnd darnach in dem núnden jâre.

Source Fulltext: Chartularium Sangallense IX, Nr. 5753, S. 425-427.