In gottes namen amen. Wir die reite vnde die burgere gemenlichen der stette Strasburg^a), Basel^b), Friburg¹, Costuntze^c), Zurich^d), Berne, Lindo^vwe^e)2, v´berlingen³, Rafensburg^f)4 vnde von sant Gallen tůnt kůnt allen den, die disen brief sehent lesent oder ho^erent lesen, das wir durch nûtz vnde friden vnseri, vnserre burgere vnde lute vnde des || landes gemenlichen^g) vns ze samene hant gemaht vnde gebunden mit dem eide, den wir dar vmbe getan hant, einander getruwelichen ze ratende vnde ze helfende hinnanfurder vntz zů sant Gerien^h) dag, so nû ze nehst komet, vnde von dannen ane vnderlas zwei gantz jare zů allen den criegen, so vns angevallent oderⁱ⁾ gewinnent, wo oder || in welichen weg vns die angeuallent, ane das, was iemanne, die nû zů dirre verbuntnisze geho^erent oder her nach dar in koment, es sint herren oder stette oder wer die sint, in den alten criegen vntz har geschehen ist, dar zů sol man nút beholfen sin, man túge es danne gerne, aber was crieges vnder vns uferstanden ist sider dem male, das || wir zům ersten vns zů einander verbunden vnde die ersten verbuntnisze machtent⁵, dar zů sullent wir einander geraten vnde beholfen sin mit solicher bescheidenheit, alse hienach gescriben stat. Were das dehein herre oder stat oder wer der ist, die nû in dirre uerbuntnisze sint oder har nach dar in koment mit der bescheidenheit, alse hie nach gescriben stat, von iemanne geschadiget wurdent in den vorgenanten ziln vnde das der . . rat der stette oder das merreteil des . . rates uffe den eit erkantent, das sie geschadiget werint wider dem rehten vnde das man in vnreht deti vnde das rehte von in versprechi, den sullent die andern herren vnde stette oder wer sie sint, die zů dirre verbuntnisze geho^erent oder har nach in dise selbe verbuntnisze enpfangen werdent, beholfen sin uffe den eit gelicher wis, alse in das vnreht oder schade widervarn weri. Doch sol der herre stat oder wer er ist, die zů dirre verbuntnisze geho^erent, die do geschadiget werdent, verbotscheften den nehsten herren stetten oder wer sie sint, die zů dirre verbuntnisze geho^erent, da der schade geschehen ist, vnde o^vch den herren stetten oder wer sie sint, die zů dirre verbuntnisze geho^erent, do die aller nehst gesessen sint, die den schaden hant getan, das sie geschadiget sint, vnde sullent danne die herren stette vnde die andern, die in dirre verbuntnisze denne sint vnde den es verbotscheftet wirt, alse do vorgescriben stat, vurderlichen vnde ane vúrzog uffe den eit die, ir dienere vnde helfere angriffen, die den schaden hant getan, das es gerihtet werdi da nach, alse es in gelegenlich ist, ane alle geuerde. Doch mag der herre oder die stat ienem vúrbotscheften, uffe die sie gemant sint, der den schaden getan het, das er widertúge den, die er geschadiget hette, obe sie wellent, vnde sol in das an irme eide noch an dirre verbuntnisze nit schaden. Widerteite er danne nit, so sullent sie uffe in beholfen sin, alse do vorgescriben stat, vnde sullent o^vch die herren stette oder wer sie sint, die zů dirre verbuntnisze geho^erent, den es vúrbotscheftet wirt, alse do vorgescriben stat, deheine der andern, die zů dirre verbuntnisze geho^erent, es sint herren oder stette oder wer sie sint, dar zů manen, sie erkennent danne uffe den eit, das sie es alleine nút betwingen enmůgent, vnde wenne sie das erkennent, so sollent sie ie die nehsten herren vnde stette vnde wer sie sint, die zů dirre verbuntnisze geho^erent, dar zů manen, vnde sullent die och furderlichen vnde ane vúrzog dar zů uffe den eit beholfen sin, alse da vorgescriben stat, ane alle geuerde. Wer o^vch, das ieman herren stetten oder wer sie sint, die zů dirre verbuntnisze geho^erent, deheinen schaden deite, den sol man in den vorgenanten stetten noch in den vestenen der herren oder wer sie sint, die zů dirre verbuntnisze geho^erent, keinen veilen ko^vf geben. Keme o^vch deheinre in gewalt herren stette oder wer sie werent, die in dirre verbuntnisze sint, der denheinen der selben herren stette oder wer sie sint, die in dise verbuntnisze geho^erent, geschadiget hette, den, sin dienere vnde sin helfere sol der herre die stat oder wer er ist, die in dirre verbuntnisze sint, in des gewalt sie koment, angriffen in alle wis, als in der schade geschehen weri, ane geuerde, da nach, so es in verkundet wirt von den, die da geschadiget sint. Geschehe o^vch, das ieman, er si herre ritter oder kneht oder wer er ist, deheinen schaden deti die in dirre verbuntnisze sint, es sint herren stette oder wer sie sint, vnde in verbotscheftet vurde, das sie widerdeitent, von den, die sie geschadiget hant oder von den, den es verbotscheftet wirt. Widerdeitent sie denne nit, uffe den vnde uffe die vnde uffe alle i^er dienere vnde helfere sol man beholfen sin, alse do vorgescriben stat, vnde wer sie enthaltet huset oder houet oder in ratet oder in hilfet mit worten oder mit wercken, uffe den vnde uffe die sol man beholfen sin uffe den eit gelicher wis alse uffe den, der den schaden het getan, vnde uffe alle die, so der rat erkennet, des er^k) billichen erkennen sol, alse dirre brief stat, zů den sie reht hant. Was crieges o^vch in den vorgenanten ziln uff erstundet vnde die wile dise verbuntnisze wert vnde von denheinen, der zů dirre verbuntnisze geho^eret, er si herre stat oder wer er ist, angegriffen oder befangen wurdi, den sol man alse lange beholfen sin, vntz der criek versůnet wirt. Es ist o^vch nemmelich beret, das dekein herre stat oder wer er ist, die zů dirre verbuntnisze geho^erent, deheinem kunige noch herren beholfen sullent sin von dirre verbuntnisze wegen, sie tůnt es denne gerne. Were aber, das deheine herre stat oder wer sie sint, die nû in dirre buntnisze sint oder her nach dar in koment, deheime kvnige oder herren dienen woltent, was den in dem dienste geschehi, dar zů sol man nit beholfen sin, man túge es denne gerne. Es mo^egent o^vch die von Strasburg^a), von Basel^b) vnde von Friburg^l) zů in enpfahen in dise verbuntnisze herren vnde stette oder wer sie sint, die in gesessen sint, die sie erkennent uffe i^er eide alle in i^eren reiten oder das merreteil vnder in, das sie zů dirre verbuntnisze nútz vnde gůt sint. Das selbe mo^egent vnde sullent o^vch tůn in gelicher wis die von Costuntz^m), von Zurichⁿ⁾, von Lindo^vwe^o) vnde von v´berlingen. Das selbe mo^egent o^vch tůn gelicher wis die von Zurichⁿ⁾ vnde die von Berne die vorgenanten. O^vch ist berette, das denheine, die zů dirre verbuntnisze gehorent, es sint herren stette oder wer sie sint, uffe die andern, die in dirre verbuntnisze sint, spise sol geben, vnde wer, das ieman deheinen, die zů dirre verbuntnisze geho^erent, es sint herren stette oder wer sie sint, schadigete oder spise wolt schicken den, die uffe sie zogetent oder schaden detent, das sullent die andern, die zů dirre verbuntnisze geho^erent, weren vnde wenden uffe den eit, als verre sie kv´nnent vnde múgent, ane geuerde, vnde sullent o^vch die herren vnde stette oder wer sie sint, hinderwert angriffen, die uffe sie gezoget sint oder spise hant geschicket. Doch sint die von Strasburg^a) nit schuldig von dirre verbuntnisze wegen iren herren den bischof von Strasburg^a) an zegriffende oder ze schadigende nitderthalp des Eckenbaches^p)6 in deheinen weg von dirre verbuntnisse wegen, sie tu^egent es danne gerne. Doch sollent wir die vorgenanten stette oder herren vnde stette oder wer sie sint, die hienach in dise verbuntnisze ko^ement, schuldig sin ze helfende den von Strasburg^a) den vorgenanten an allen stetten, als dise verbuntnisze vnde dirre brief stat. Es ensol o^vch den von Strasburg^a) nút schaden in dirre verbuntnisze, obe sie den nidern lantfriden lengernt vnde in haltent oder obe sie ietzúnt iemanne kein helfe schuldig werent ze tůnde oder harnach schuldig wurdent von des selben lantfriden wegen. In dirre verbuntnisze ist ein rich usgenommen, doch mit der bescheidenheit, wer das deheine, die zů dirre verbuntnisze geho^erent, es sint herren stette oder wer sie sint, geschadiget wurdent von herren stetten oder von iemanne, wer die werent, vnde das der . . rat der stette oder das merreteil des . . rates, der es billichen erkennen sol, uffe den eit erkennent, das sie geschadiget sint wider dem rehten oder das man sie drenge an i^eren rehten, den sol man uffe den eit beholfen sin in alle wis, als es in geschehen weri, vnde sol sie do wider nit schirmen deheines der vorgescriben oder nachgescriben dinge. Den von Strasburg^a), den von Basel^b) vnde den von Friburg sol o^vch in dirre verbuntnisze nit schaden, obe sie in den obern lantvriden^q) in Elsasze^r) koment. So habent die von Strasburg^a), die von Basel^b), die von Costuntz^t) i^ere herren die bischoffe vnde die von Friburg i^eren herren den grauen von Friburg usgenommen mit solicher bescheidenheit, das ie die stat wider i^eren herren nit beholfen wil^u) sin, es were danne, das die selben herren alle oder ethelicher vnder in helfere wolt sin wider die, die zů dirre verbuntnisze geho^erent, vnde welicher der selben herren helfer wolt sin, alse do vorgescriben stat, uffe den sol man beholfen sin, alse do vorgescriben stat, ane alle geuerde. Die von Friburg hant o^vch ieren herren sunderlingen in disen dingen usgenommen mit solicher bescheidenheit, wer das der selbe herre sines eides gemant wurde von des lantfriden wegen in Elsasze^r), den er gesworne het, uffe deheine, die in dirre verbuntnisze sint, es sint herren stette oder wer sie sint, das er uffe sie zogende wurde, so sol im dehein burger von Friburg oder den sie ze gebietende hant, dar zů beholfen sin, vnde sullent das die von Friburg verwarten vnde vúrsehen uffe den eit, alse verre sie kv´nnent vnde mo^egent, ane geuerde, vnde sullent doch die von Friburg den, die in dirre búntnisze nû oder her nach sint, beholfen sin uffe die, die uffe sie zogent. Wenne aber der vorgenante herre von Friburg von des lantfriden gezoge wider heim komet, dar vmbe sullent in die von Friburg nút angriffen. Wolte aber der selbe herre sunderliche geteite tůn uffe deheine, die zů dirre verbuntnisze geho^erent, so sollent in die von Friburg uf in beholfen sin an zegriffende ane alle geuerde. Die von Berne hant o^vch ir eitgenoszen vorbehebet, alse sie ienen mit eiden vor dirre verbuntnisze gebunden warent, ane alle geuerde. Die von Strasburg^a), von Basel^b) vnde von Friburg hant nemmelich vnde mit rehter gedinge uzgenommen an dirre verbuntnisze, das i^erre drier stette vorder verbuntnisze⁷ vúrgang sol haben vnde steite beliben mit allen den artickeln, alse die selbe buntnisze gescriben stat, vnde sol dise verbuntnisze ir in deheinen weg schade sin. Was herren oder stette oder wer sie sint hinnenfurder in dise verbuntnisze enpfangen werdent, die sullent brieue vnde insigel geben vnde o^vch sweren, dise verbuntnisze steite ze habende in alle wis, als hie vor gescriben stat, vnde sol man im^v) o^vch beholfen sin, als die selbe buntnisze stât, ane geuerde. Geschehe o^vch, das denheinen herren, die in dise verbuntnisze enpfangen wurdent, dehein schade oder criek anfiel in dirre verbuntnisze, alse do vorgescriben stat, das sol er dem . . rate der nehsten stette, der er gesessen ist, die in dirre verbuntnisze ist, die maht het in ze enpfahende oder enpfangen het, vúrbotscheften, vnde erkennet sich denne der selbe . . rate oder der merreteil des . . rates uffe den eit, das im vnreht si geschehen vnde wider dem rehten geschadiget, so sol man im beholfen sin in alle wis, alse do vorgescriben stat. Es ist o^vch berette, were das die burgere von Strasburg^a) eine buntnisze mahtent mit i^erme herren dem bischoffe von Strazburg^w), wurdent sie danne e gemant vmbe einen uszog von dem vorgenanten i^erme herren dem bischoffe von Strasburg^a) danne von uns den vorgenanten herren vnde stetten, so sollent sie im beholfen sin vnde sol in das an i^erme eide noch an dirre verbuntnisze nit schaden. Vnde sint o^vch vns die von Strazburg^x) von dirre verbuntnisze wegen nút schuldig anzegriffende oder ze schadigende die, es sint herren ritter oder kneht oder wer sie sint, die bi i^erme herren dem bischof von Strazburg^y) oder bi in uffe dem velde ligent, alle die wile sie uffe dem velde bi einander ligent. Wenne sie aber von dem velde wider heim koment, han wir herren vnde stette oder wer sie sint, die in dirre verbuntnisze nû oder hie nach sint, da nach sie gemant oder manent sie vmbe helfe, so sollent sie vns beholfen sin, alse dise verbuntnisze stat, ane alle geuerde. Gelicher wis sol man disen artickel verstane, obe die von Basel^b) vnde die von Costuntz^z) eine bintnisse deitent mit iren herren den bischoffen, die von Friburg mit i^erem herren dem grauen von Friburg. Das o^vch wir die vorgenanten herren vnde stette dest fridelicher vnde fruntlicher geleben mo^egent, so haben wir mit gemenem můt gemachet vnde beret, das dekein burger oder burgerin der vorgenanten herren vnde stette die andern bekumbern sollent danne die waren schuldener. Wolt aber deheine burger oder burgerin der vorgenanten herren vnde stette die andern zů rede setzen in der stat oder vnder dem herren, da die schuldener gesessen sint, vmbe denhenre hande sculde oder vmbe dehein ander sache, die sie mit in zeschaffende hant, den sol man rihten vnuerzogenlich. Lockent aber der schuldener der schulde oder der clage, dar vmbe er angesprochen wirt, vnde wil in der cleger erzugen, das sol er tůn mit biderben luten, die do bi sint gewesen, die vmbe die schulde oder vmbe die ansprache wissent, oder mit brieuen, die billichen helfen sullent vnde mo^egent, vnde sol man die o^vch ho^eren vnde dem cleger darnach rihten ane alle geuerde. Es ist o^vch beret, das dekein herre noch stat vnder vns den vorgenanten herren vnde stetten deheine herre vnde stat noch burger oder burgerin vnder vns angriffen sol noch bekumbern ane gerihte. Wande het ieman vnder vns herren vnde stetten burger oder burgerin mit dem andern v´t ze schaffende oder an ze sprechende, in welichen weg das were, das sullent sie tůn mit gerihte an den stetten, do in ienre, den sie do ansprechent, ze reht sol stan, vnde sol man in do rihten vnuerzogenlich, alse do vorgescriben stat. Doch ensol sich dehein herre noch stat oder wer er ist, der in dirre verbuntnisze ist, an nemen i^eren burger oder burgerin ze schirmende wider die andern die vorgenanten herren vnde stette burger oder burgerin von dekeines crieges noch angriffes wegen, der ieren burgern oder burgerin geschehe, e sie ir burger oder burgerin wurdent. Geschehe o^vch dehein angriffe vnder vns den vorgenanten herren vnde stetten ane gerihte, den sol der herre oder die stat, der burger oder burgerin den angriffe getan hant, solich haben, das sie widertůn, das sie ane gerihte getan hant. Wande ie der burger oder burgerin vnder vns herren vnde stetten sollent von den andern reht nemen an den stetten, do sie es ze reht tůn sollent, alse do vorgescriben stat. Vnde har vber so het dehein herre noch stat vnder vns herren vnde stetten dirre verbuntnisze maht, vber die andern ze erkennende von i^ers burgers oder burgerin wegen anders, wande do vorgescriben stat. Wir globent o^vch bi vnsern eiden, wenne ein . . rat abegat vnder vns den vorgenanten stetten, das ie der alte . . rat dem nuwen . . rat in den eit sol geben, dise verbuntnisze vnde disen brief steite ze habende vntz zů dem vorgenanten zil ane alle geuerde. Vnde durch das dis alles steite gantz vnde vnzerbrochen blibe, so han wir die . . reite vnde burgere der egenanten stette vnsere insigele vúr vns gehencket an disen brief. Vnde geschach dis vnde wart o^vch dirre brief gegeben an dem durnstag nach sant Gregorien dag in der vasten, do man zalte von gottes geburte drúzehen hundert jar, dar nach in dem núnden vnde zwentzigestem jare.

Source Fulltext: Chartularium Sangallense VI, Nr. 3383, S. 55-60.