Allen den, die disen brief sehent, lesent oder ho^erent, tůn kunt ich Jacob der Sellose burger || ze sant Gallen vnd vergich fúr mich offenlich vnd fúr min erben vnd nachkomen alle ain || staette warhait der nach geschriben dinge. Wan ich klegt vor . . dem rat der stat ze sant || Gallen gen Cůnr. Kaltisen burger von sant Gallen, das er mich geschadeget hatte mit sinen worten in der sache, so ich mit Johans Jo^eni ze schaffend hatte vnd och habe, dar vmbe so habe ich gesworn ze den hailigen ainen gelerten aid willeclich vnd vmbetwungen vor . . dem selben rat der stat ze sant Gallen, das ich noch kain min erbe oder nachkome den vor genemten Cůnr. Kaltisen, sin erben oder nachkomen niemmer beswaere, bekreinke, mo^ege mit kainen dingen noch anspreche an gaistlichem oder weltlichem gerichte mit worten oder mit werken vmbe den vor geschriben schaden von sinen worten, alz ich cleigt von Johans Jo^eni sache wegen, vnd das ich vmbe die selben sache, alz da vor geschriben ist, sin gantze vnd luter frunt bin vnd sin wil, vnd habe dar vmbe enphangen von dem selben Cůnr. Kaltisen zehen phunt nún schillinge minder gaeber Cost(entzer) phenninge, der ich von ime gewert bin vnd an minen offen nutz komen sint. Ich habe och gesworn ze den hailigen ainen gelerten aid vnbetwungen vnd willeclich fúr mich, min erben vnd nachkomen, daz ich . . den rat der stat ze sant Gallen, die burger gemainlich vnd och die stat ze sant Gallen niemmer beswaere, bekreinke, gemo^e mit kainen dingen noch an gespreche an gaistlichem oder weltlichem gerichte mit worten oder mit werken von der sache wegen, so ich ze schaffend habe vnd hatte von Johans Jo^eni wegen, alz och da vor geschriben ist, wan . . der rat vnd die burger der stat ze sant Gallen ir mugen erzaiget vnd getan habent in der selben sache. Vnd das diz war sige vnd staete belibe, dar vmbe so gip ich Jacob der Sellose da vor genemte disen brief besigelten mit des ersamen mannes insigel hern Hainr. des Rappen lútpriester ze sant Laur(entzen)¹ in der stat ze sant Gallen, der durch min veste bette das an disen brief geleit vnd gehenket hat, wan ich aiges insigel nicht hatte. Diz beschach vnd wart dirre brief geben ze sant Gallen ze vsgaentem aprellen, do man zalt von gotes gebúrte drúzehen hundert iar, dar nach in dem drissegosten jar, da die ersamen lúte ze gegen waren, her Hainr. der Rappe vnd her Walther von A^elgo^e2, lútpriester ze sant Gallen, Eglolf von Niderndorf³, Růd. der vogt von Warthense⁴, Johans Nicolaus sun von Vrnaesschen⁵ vnd ander erber lúte genůge.

Source Fulltext: Chartularium Sangallense VI, Nr. 3412, S. 80-81.