Universis presencium inspectoribus Iohannes sacerdos dictus Hohspar de Sangans¹ salutem et noticiam subscriptorum. Recognosco et tenore presencium publice profiteor, quod ego domum et aream, que sita sunt in oppido Wesen² inter domos . . dicte Múlisteinin, relicte quondam Hainrici dicti Múlistein³ et Růdini dicti Elmer fratrumque suorum, monasterio Fabariensi pertinentia, ab antiquo cum omnibus suis iuribus et pertinentiis a reverendis dominis Eglolfo⁴ quondam abbate predicti monasterii et Hermanno⁵, eius successore, cum voluntate et assensu conventus ipsius monasterii recepi perpetuo possidenda sub hac condicione, quod ego premissa domum et aream et alia ad ipsam pertinencia sine voluntate expressa abbatis et conventus predicti monasterii vendere, obligare in toto vel in parte non debeo seu quoquomodo alienare per aliquod factum, ex quo dominis prelibatis et monasterio dicto in rebus prescriptis damnum aliquod potest generari. Et ut hec a me seu meis successoribus rata permaneant et inconvulsa, premissa omnia et singula tenore presencium professa coram honorabili domino . . iudice ecclesie Curiensis, cum sigillo iudicii Curiensis presentes litteras petii ac feci communiri in maius robur et evidentiam omnium premissorum. Nos^a) vero Iohannes de Luceria⁶ iudex prelibatus ad peticionem prescripti domini Iohannis sigillum iudicii sicut premittitur presentibus duximus appendendum in certitudinem et robur omnium premissorum. Datum in Curia anno domini M°CCC°XXX°, kl. iulii, indictione XIII^a.

Source Fulltext: UB der südl. Teile des Kantons St. Gallen II/7, Nr. 1312, S. 438.