Allen^a) den, die disen brieff ansehent lesent oder ho^erent lesen, kúnden wir dis nâchgenemten V^olrich Go^essler burger ze sant Gallen vnd Vrsula sin elichi || wirtinne Hainrichs Scherers sa^elgen wilunt elichi tohter vnd veriehent offenlich an disem brief fúr v´ns vnd v´nser erben, das wir baidú gemainlich || vnd ainmu^eteklich mit gůtem willen mit gůter vorbetrahtunge vnd mit vnser baider frúnd ra^vt reht vnd redlich verko^vfft vnd ains rehten red||lichen êwigen ko^vffs ze ko^vffenn geben habent fúr vns vnd vnser erben dem beschaiden Johansen dem Widmer o^vch burger ze sant Gallen vnd sinen erben, ob er enwa^er, den hof ze Mettendorf¹ gelegen mit hus mit hof mit akren mit wisen mit holtz mit velt mit wunne mit waidan mit stegen mit wegen mit wasser mit wasserrúnsen vnd gengen vnd mit allen rehten nútzen vnd gewonhaiten vnd mit allem dem, so von reht ald von gewonhait zů dem selben hof vnd darin geho^ert, also habent wir dem obgenanten Johansen Widmer den selben hof ze Mettendorf ze vrta^eti ze ko^vffenn geben vmb sehsthalb pfunt vnd vmb sehtzig pfunt pfenning gůter vnd gena^emer Costentzer múnse, dero wir gantzlich vnd gar nach allem vnserm willen von im gewert bezalt vnd vssgeriht worden sien mit gůtem barem gelt an den stetten, da wir vnsern wahsenden schaden mit verkomen haben vnd vnsern fromen vnd nutz geschaffet, der selb hof vnser baider lehen was von dem êrwirdigen gotzhus ze sant Gallen. Wir habent im o^vch den vorgeschriben hof ze Mettendorf ze ko^vffenn geben dafúr, das er reht lehen ist von dem erwirdigen gotzhus ze sant Gallen, vnd o^vch dafúr, das ab dem selben hof niht gât noch gan sol denn allain der kornzehende. Wir habent o^vch den vorgeschriben hof mit allen rehten vnd zůgeho^erden, als vor ist beschaiden, dem obgenemten Johansen Widmer v^fgeben vnd zů sinen handen brâht mit des erwirdigen vnsers gna^edigen herren abt Cůnen abt des gotzhus ze sant Gallen² hant, als reht sitte vnd gewonlich was vnd als es kraft vnd maht sol vnd mag haben. Vnd darvmb so habent wir vns baidú gemainlich vnd sunderlich willeklich vnd offenlich verzigen vnd verzihent vns mit disem brief gantzlich vnd gar fúr vns vnd fúr alle vnser erben gegen dem obgenemten Johansen Widmer vnd gegen allen sinen erben aller aigenschaft aller lehenschaft aller kuntschaft aller gewêr lút vnd brief alles rehtes gaistlichs vnd weltlichs gerihtz aller vordrung vnd ansprachen, so wir baidú gemainlich ald sunderlich ald vnser erben, ob wir ensint, an dem zů dem vnd von des vorgeschribenen hofes wegen vnd was darzů gehort ie gehattent oder hie nach iemer gehaben oder gewinnen mo^ehtint, vnd das wir noch vnser erben, ob wir ensint, noch ieman andre von vnser wegen noch an vnser stat den obgenanten Johansen Widmer noch kain sin erben noch nachkomen an dem vorgenemten hof noch an dehainen sinen zůgeho^erden niemer sumen irren bekúmberren noch darvmb ansprechen noch v^fftriben so^ellint noch wellent weder mit gaistlichem noch mit weltlichem geriht noch ân reht noch in kain wîse ân alle geua^erde. Och habent wir gelopt baidú vnuerschaidenlich mit vnsren trúwen vnd lobent mit disem brief fúr vns vnd fúr alle vnser erben, des obgenanten hofs ze Mettendorf mit allen rehten vnd zůgeho^erden vnd des ko^vffs reht wem ze sinne nach des landes reht vnd o^vch den obgenanten Johansen Widmer vnd alle sin erben vnd nâchkomen darvmb ze versprechenn vnd ze versta^enne vff gaistlichem vnd vff weltlichem geriht vnd an allen stetten gegen aller ma^englichem, wenn wâ oder wie dik sú des bedurffent ald darvmb von iemann angesprochen geschadgot ald v^fgetriben werdent mit dem rehten. Vnd ist dis alles beschehen vnd vollefu^ert reht vnd rêdlich mit allen den worten werken vnd geta^eten, so nach gewonhait vnd nâch reht darzů gehortent vnd notdurftig warent vnd als es kraft vnd maht sol vnd mag haben. Vnd des alles ze offemm waren vrkúnde vnd ze ainer sta^eter ewiger sicherhait aller vorgeschribner dinge so han ich der obgenant V^olrich Go^essler fúr mich vnd min erben min insigel offenlich gehenkt an disen brief, vnd won ich die obgenant Vrsula des obgenanten V^olrichs Go^esslers elichi wirtinne aigens insigels niht hatte, so han ich erbetten den beschaiden Othmarn Wildrich o^vch burger ze sant Gallen, das er sin insigel fúr mich gehenkt hat an disen brief, vnder das selb insigel ich mich vnd min erben willeklich gebunden han aller vorgeschribner dinge wâr ze lassenn vnd sta^et ze haltenn alles, das von mir da vorgeschriben stat an disem brief. Vnd ich der selb Othmar Wildrich vergich offenlich, das ich von ernstlicher bett der obgenanten Vrsulen des obgenanten V^olrichs Go^esslers elicher wirtinnen min insigel fúr si offenlich o^vch gehenkt han an disen brief mir vnd minen erben gantzlich vnscha^edlich. Dirr brief ist geben ze sant Gallen an sant Hylarius tag des hailgen byschoffs in dem iâre, do man von Cristus gebúrt zalte drúzehenhundert jâr vnd darnach in dem nún vnd ahtzigosten jâre.

Source Fulltext: Chartularium Sangallense X, Nr. 6303, S. 546-548.