Ich^a) Hainrich Rienolt statamman vnd V^olrich Schriber burgermaister vnd der rate gemainlich der stat || ze Lindow¹ veriehint mit vrkúnd dis briefs allen den, die in ansehent oder ho^erent lesen vnd den es notdurf||tig ist ze wissen nu vnd hienach, daz fúr v´ns vnd fúr offen rat der stat ze Lindow mit gůten sinnen || vnd gesundem libe vnbetwungenlich kament die erbern vnd beschaiden lúte Růdolf Rot burger ze sant Gallen der elter, V^eli von Múttwile², Marti von Mos³, Ru^edi Cúntz von Husen⁴, V^eli Haugg von Bůch⁵, V^eli Cůn vnd V^eli Clinger vnd swůrent da vor v´ns vnd vor offem rat willeklich mit bedauhtem můt vnd vnbetwungenlich ane allen argen list ainen aide liplich ze den hailgen mit vferhabnen handen vnd mit gelerten worten vnd sprachent, daz inen kunt vnd ze wissent wa^er, daz Adelhait, Conrat Berners seligen wilent elichú tochter Cůnratz von Gaissbergs⁶ seligen elichú husfrow, Ma^echthilt, Vrsula, Adelhait vnd Hainrich von Gaissberg der vorgeschribnen Adelhait Bernerinen elichú kind dem gotzhus ze sant Gallen mit lib mit gůt mit diensten vnd mit aller aigenschaft zů gehorten vnd dez selben gotzhus ze sant Gallen recht aigen wa^erint. Dez allez ze warem vnd offem vrkúnd so han ich Hainrich Rienolt der amman min aigen insigel vnd wir der bnrgermaister vnd der rat ze Lindow vorgenant v´nser stat insigel offenlich gehenkt an disen brief v´ns selb âne schaden. Der geben ist ze Lindow an dem fúnf vnd zwaintzigosten tag dez manodez maygen in dem iar, do man zalt von Cristus gebúrt drúzehenhvndert vnd achtzig iar, darnach in dem fúnften jar.

Source Fulltext: Chartularium Sangallense X, Nr. 6076, S. 254-255.