Ich^a) Johans Sto^ekli statamman ze Veltkirch¹ kúnd vnd vergich offenlich an disem brief allen den, die in ansehent oder ho^erent lesen, daz ich ze || gericht sass ze Veltkirch in der stat an dem na^echsten fritag nach mitter vasten von gnaden vnd gewaltz wegen dez edeln vnd ho^vcherbornen || mins gna^edigen herren gra^vff Růdolffs von Montfort² herr ze Veltkirch, do kam fúr mich vnd fúr offen verbannen gericht mit fúrsprechen der || erwirdig herr apt Kůn apt dez gotzhus ze sant Gallen³ vnd offnet vor gericht vnd klegt zů junkherr Wilhelmen von End⁴ frig vnd sprach also, er vnd sin gotzhus ze sant Gallen hettint ainen zehenden ze sant Margarethen⁵ ze Ho^echst⁶, in dem selben zehenden la^egint gu^eter, ez sigint wingarten aker oder ander gůt, die der selb junkherr Wilhelm von End nussi vnd welti im noch sinem gotzhus ze sant Gallen da von nit zehenden geben vnd hett im vnd dem gotzhus den zehenden also lang vorgetragen vnd nit gericht vnd hu^eb den zehenden dem gotzhus vor wider recht, vnd wissi nit, von wz rechtz wegen er in oder sin gotzhus an dem zehenden sumen so^ell, vnd begerti anders darvmb nit wan rechtz von dem egenanten junkherr Wilhelmen von End. Daz verantwrt do ze ma^vl der jetzgenant junkherr Wilhelm von End mit sinem fúrsprechen vnd bat im ze ervarent an ainer vrtail, sid dz der apt rechten weit vmb semlichú gu^eter vnd ob er sich nit billich stalti fúr gericht mit vollem gewalt vnd mit sinem cappittel, also wz darvmb recht vnd vrtail ga^ebi, dz o^vch dz hie nach kraft hett. Darvmb ward ertailt mit vrtail vnd ward o^vch dz daz mer, sid dz min herr der apt ain gefúrster apt vnd ain friger herr wa^er, daz er denn wol von dez gotzhus wegen vnd vmb dez gotzhus gu^eter rechten mo^echt a^vn sin cappittel, vnd waz im recht vnd vrtail ga^ebi, daz hett wol kraft fúr sich vnd fúr sin nachkomen. Vnd do dz also ertailt ward, do klegt aber der egenant min herr der apt von sant Gallen zů dem obgenanten junkherr Wilhelmen von End vmb den zehenden in aller wis, als vor geschriben vnd beschaiden ist. Dez verantwrt sich der selb junkherr Wilhelm von End mit sinem fúrsprechen vnd sprach, sú^b) wa^erint iro sto^ess komen vff her Johansen den jungen von Bodmen⁷ als vff ainen gemainen man nach der verainung, so die herren vnd die stett mit enander hettint, da bi weit er o^vch gern beliben nach dem, als sú v´ber ain komen wa^erint, vnd bat im ze ervarent an ainer vrtail, ob min herr der apt nit beliben so^elt nach dem, als sú v´ber ain komen wa^erint. Dez verantwrt sich der selb min herr der apt mit sinem fúrsprechen vnd sprach also, er logenti nit sú wa^erint der sto^ess komen vff den egenanten von Bodmen, also ob er ez tůn welt vnd gemain man darvmb sin weit, aber der selb von Bodmen hetti im dz ab geseit, dz er ez nit tůn welt. Vnd nach baider tail red vnd widerred do ward ertailt mit der meren vrtail, sid dz sú baidenthalb nit logentint, sú wa^erint der sto^ess komen vff den vorgenanten her Johansen von Bodmen, daz sú den baidenthalb bitten so^eltint, dz er sich der sach an neme vnd gemain man werdi vmb die sach, vnd sond daz baidenthalb an in werbent sin vngefa^vrlich hinnan von nu dem na^ehsten sunnentag v´ber sechs die na^echsten wochen, vnd mugent sú in den tagen den selben von Bodmen dez nit erbitten vnd dz er in daz ab seit, dz er vmb die sach nit gemain man werden wil, nach den selben sechs wochen sol denn ietwedra tail sin recht anderswa sůchen nach dem rechten a^vn all geverd. Dirr ding ze warem vrkúnd henk ich obgenanter Johans Sto^ekli statamman von dez gerichtz wegen, als ertailt ward, dz ich ez tůn so^elt, min aigen insigel an disen brief vnscha^edlich mir vnd minen erben. Geben vnd ertailt an dem obgenanten fritag im dem iar, do man zalt von Cristus gebúrt drúzehehen^c) hundert vnd achtzig iar, dar nach in dem fúnfften jar.

Source Fulltext: Chartularium Sangallense X, Nr. 6061, S. 239-240.