Allen^b) den, die disen brief sehent oder ho^erent lesen, kúnd ich Claus der Simler vnderuogt ze Frowenuelt¹ vnd vergich offenlich mit disem brief, dz fúr mich || kament fúr gericht frow Vrsella Johans von Frowenuelt² seligen wilent eliche husfrow vnd alle irú kind knaben vnd o^vch tochtren vnd beuogtent || sich da die ietzgen(ant) frow Vrsella vnd irú kind vor gericht mit Hainrichen dem Ru^edlinger der selben fro^v Vrsellen elichen vatter. Dar nach do offnetent || die selb frow Vrsella vnd irú kind mit dem ietzgenanten irem vogt vnd mit irem fúrsprechen, das der hohwirdig fúrst apt Cůn ze sant Gallen³ von inen geledget vnd o^vch ko^vft hett an das gotzhus ze sant Gallen dis nachgeschriben lút Adelhaiden V^olrich des Brotpekken von Nidern Ra^etenberg⁴ elichen wirtinnen V^olrichs Degans von Geriswile⁵ tochter vnd V^olrichen vnd Cůnraten vnd Hansen vnd Růdolfen vnd V^olrichen vnd Hainrichen, Adelhaiden, Elsbethen vnd Katherinen der vorgenanten Adelh. Brotpekkinen elichen kind, die des obgenanten Johans von Frowenuelt lehen von dem obgenanten gotzhus gewesen wa^erint, vnd hettint dar vmb enphangen von dem obgenanten minem herren von sant Gallen zwai vnd zwaintzig phunt gůter vnd ga^eber haller, vnd batent mich erfarn an ainer vrtail, wie si die vorgenanten lút dem egenanten minem herren von sant Gallen vfgeben vnd senden so^elte, als es kraft hett nu vnd hie nach. Do fragt ich vrtail vmb, do ward ertailt mit gemainer vrtail, das si die selben lút vff senden so^elten bi ainem erbern man, der lehen von dem obgenanten gotzhus hett. Do santent die vorg(enant) fro^v Vrsella vnd irú kind die vorgenanten lút dem obgenanten minem herren von sant Gallen vff bi Cůnraten von Múnchwile⁶ vnd tatent das mit iren vnd mit des vorgenanten ir vogtes handen vnd mit allen den worten vnd geta^eten, so von recht vnd nach gewonhait dar zů vnd ze so^elichen sachen hort vnd o^vch ho^eren soft vnd als gericht vnd vrtail geben hatt. Vnd lobtent o^vch der obgenanten lúten recht wer ze sin an allen den stetten, da sin der obgenant min herr von sant Gallen oder das gotzhus notdurftig ist, vnd entzigent sich da gen dem selben minem herren vnd dem gotzhus ze sant Gallen aller lehenschaft alles rechten aller vordrung vnd ansprach, so si oder ir erben ze der obgenanten lúten lib vnd gůt ie gehatten oder hie nach iemer gehaben mo^echten. Vnd wenn die vorgenant frow Vrsella vnd irú kind mit ir na^echsten vattermag beuogtet werdent, bi dem so^elent si danne o^vch die vorgenanten lút dem obgenanten minem herren vnd dem gotzhus vfsenden, als es denn notdurftig ist. Dar vmb hant si dem obgenanten minem herren von sant Gallen ze búrgen geben Růdolfen von Wellenberg⁷, Cůntzen von Múnchwile, Hainrichen Ru^edlinger den vorgenanten vnd mich den obgenanten Clausen Simler mit dem gedinge, wa^ere das si dz nit volfůrten, als vorbeschaiden ist, das wir die vorgenanten búrgen danne giselschaft laisten so^elent ze Frowenuelt in der statt nach der statt recht vngefarlich, wenn wir von dem selben^c) minem herren ermant werdent ze hus ze hof mit botten mit briefen oder vnder o^vgen, vnd da von nit ze lassen, vntz dz es bschicht. Vnd des ze vrkúnd vnd ainer sta^eten warhait han ich der obgenant Claus Simler min insigel nach vrtail von des gerichtes wegen vnd o^vch in búrgen wis an disen brief gehenkt. Ich der vorgenant Hainr. Ru^edlinger vergih ainer warhait aller der ding, so an disem brief geschriben stant, vnd des ze vrkúnd henk ich min insigel in vogtes vnd in búrgen wis an disen brief. Wir die vorgenanten búrgen veriehen ainer warhait der ding, so von v´ns vor geschriben stant, vnd des ze noch meren sicherhait haben wir v´nsrú insigel o^vch gehenkt an disen brief. Der geben ist ze Frowenuelt an sant Thomas abent des hailen^d) zwelfbotten nach Cristus gebúrte tusent drúhundert vnd achtzig jaren vnd darnach in dem seschten^d) jare.

Source Fulltext: Chartularium Sangallense X, Nr. 6160, S. 357-358.