Wir Cůn von gottes gnaden abt des gotzhus ze sant Gallen¹, das ân alles mittel zů geho^ert dem stůl ze Ro^vm, tůnd || kund mit disem brief, dz fúr vns kam ze Wil² in vnser statt hútt diz tags, als dirre brief geben ist, der beschaiden kne||ht Hans Borhuser, den man nempt Waibel, vnd sprach, das er von v´ns vnd v´nserm vorgenanten gotzhus ze lehen hetti zwen || mutt kernen gůtes vnd vngeuarliches kernen Wiler mess ja^erliches vnd ewiges geltes vsser dem kornzehenden ze Mo^vggwille³, das selb kernen gelt er verko^vfft vnd ze ko^vffen geben hetti reht vnd redlichen dem beschaiden Hainrichen Halwig dem metzger burger ze Wil vnd Briden siner elichen husfrowen. Vnd do batt v´ns der selb Hans Borhuser, das wir das vorgenant kernen gelt von im vff na^emind vnd das lihent von vnser hand dem vorgenempten Hainrichen Halwig vnd Briden siner elichen husfrowen baiden gemainlich ze lehen vnd ze ainer rehten gemaind, won er in es och ze ko^vffenn geben hetti. Darvmb erhorten wir do gna^edklich sin bett, won si v´ns redlichen dunkt, vnd nament das vorgenant kernen gelt des vorgenanten messes vsser dem egenempten zehenden ze Mo^vggwille von im vff an vnser hand vnd lihen dz vorgenant kernen gelt dem egen(empten) Hainrichen Halwig vnd Briden siner elichen husfrowen baiden gemainlich vnd vnuerschaidenlich ze lehen vnd ze ainer rehten gemaind vnd in rehter gemaind wis vnd lihent in es och mit vrkund diz briefs. Vnd ist diz beschehen vnd vollfu^ert redlich vnd reht nah vnsers gotzhus gewonhait vnd reht, als es krafft vnd maht haben sol vnd mag nû vnd hie nah. Vnd ze warem vrkund habent wir abt Cůn da obgenampt vnser insigel offenlich gehenkt an disen brief. Der geben ist an sant Johans tag des To^vffers ze sunnwendi in dem jar, do man zalt von Cristi gebúrt drúzehenhundert jar vnd vier vnd ahtzig jar.

Source Fulltext: Chartularium Sangallense X, Nr. 6026, S. 201.