Wir der burgermaister der amman der ra^vt vnd alle burger gemainlich der statt ze Lindow¹ tůnd kund vnd veriehent || offenlich mit disem brief, das wir mit dem êrwirdigen fúrsten v´nserm gna^edigen herren Cůnen abt des gotzhus ze sant || Gallen² v´berain komen sind, daz wir in ze burger enpfangen ha^vnd, das er vnser burger sin sol fúnf jar die na^ehsten nach || enander na^vch dem tag, als dirr brief geben ist, mit solicher^a) bedingde, dz er vns a^ellú jar ze sant Martis tag ze stúr geben vnd rihten sol sehzig guldin, die gůt sind an dem gold vnd swa^er an der gewiht, vnd waz sto^ess vnd v´ns anga^vt, es si von vnser selbs wegen oder von vnser aidgenoz wegen, darinne sol er vns behulfen sin, es si mit raisent oder mit andren diensten, als wir in denne anlegen, an all geua^erde, vssgenomen die herschafft von O^esterrich. Wir súllent im o^vch behulfen sin vngeuarlich gen aller ma^engklich als ainem andern vnserm burger ze dem rehten. Wa^er o^vch, das in ieman anspra^ech, dem sol er rehtz gehorsam sin vor vnserm ra^vte hie ze Lindow vngeuarlich alz ain andrer vnser burger. Ez ist o^vch beredt, wa^er dz im burgreht nit fůgti, [da]s^b) mag er vns wol absagen, wenn er wil, mit semlichem gedingde, was stúran sich danne nit ergangen hettint vnd er nit geben hetti, die sol er vns denne o^vch gentzlich vsrihten vnd geben inrent den na^ehsten zwain manoden, die aller schierost koment nach dem absagent, ob er es absaiti. Wa^er och, daz der selb vor-genampt abt Cůn von todes wegen abgieng vnd sturbi, dz got lang wend, so sol vns darnach die na^ehst stúr von dem jar, als er denne abgangen ist, vff den na^ehsten sant Martis tag nach sinem tode veruallen sin. Vnd des alles ze offem vnd warem vrkúnd vnd sta^eten sicherhait geben wir dem vorg(enampten) vnserm herren abt Cůnen disen brief darv´ber besta^et vnd besigelt mit vnser statt ze Lindow gemainem insigel dem mindern. Diz beschah vnd ist dirr brief geben an dem na^ehsten zinstag nach sant Jacobs tag nach Cristi gebúrt^c) drúzehenhundert jar vnd vier vnd ahtzig jar.

Source Fulltext: Chartularium Sangallense X, Nr. 6031, S. 203.