Wir brůder Huge von Werdenberg commentvr des gotzhus von Waediswile¹ vnd aller der || conuente des selben gotzhus sant Johanser orden vergiehen vnd to^en kvnt allen den, die disen || brief sehent, lesent oder ho^erent, das wir mit gemainem rat vnd mit gůter betrachtunge vnd och || das es vns vnd vnserm gotzhus besser getan ist danne vermitten, geben vnd geben haben Nycolausen den jvngen Wolfegger Jacobs des Wolfeggers svn burgers ze Costentz, der vns vnd vnser gotzhus an gehorte vnd vnser vnd vnsers gotzhus was, dem erwirdigen herren von gotes genaden apt Hiltpolt abbt² des gotzhus von sant Gallen vnd och dem selben gotzhus vnd dem conuente des selben gotzhus, vnd hat der selbe von gotes genaden apt Hiltpolt an siner vnd an des selben gotzhus vnd och des selben conuentes ze sant Gallen stat vns vnd vnserm gotzhus ze Waediswile geben Jacob den Wolfegger burger ze Costentz des vor geschriben Nycolaus vatter, das der vnsers gotzhus ze Waediswile sin sol vnd an geho^eren sol in allem dem recht vnd aller gewonhait, als vns vnd vnsers^c) gotzhus an gehorte Nycolaus der jvnge Wolfegge da vor geschriben, vnd ist diz besehenen mit allen den worten vnd werken, so dar zv^o notdurf^d) was von recht ald von gewonhait. Vnd ze ainer staeter vnd gantzer warhait dar vmbe so geben wir brůder Huge von Werdenberg commentvr des vor geschriben gotzhus ze Waediswile disen brief besigelten mit vnserm vnd och mit des conuentes von Waediswile³ insigeln, dv baidv dar an hangent, ze ainer gantzer warhait aller der vor geschriben dinge. Diz beschach vnd wart dirre brief geben ze Waediswile, an der hailigen tag Fabiani vnd Sebastiani, do man zalt von gotes geburte druzehen hundert iar vnd dar nach in dem zwai vnd zwainzegesten jar.

Source Fulltext: Chartularium Sangallense V, Nr. 3149, S. 426-427.