Allen den, die disen brief sehent lesent oder ho^erent lesen, kúnd ich Haiden von Emptz¹ vnd vergich || des offenlich an disem brief fúr mich vnd alle min erben, das ich mit bedâhtem můt vnd mit gůter || vorbetrâhtung von des gůten gunstes vnd liebú wegen, so ich zů dem gotzhus ze sant Gallen hatt, || vnd lûterlich durch got dis nachgeschriben lút vnd gu^eter, du min recht aigen warent, V^olrich den Krumben vnd sinú kint, Me^atzinen von Brunnen vnd irú kint, Elsbethun Vo^egellinun vnd irú kint, das gůt ze Beltzenrúti², das Gaismat³, des Bo^eschers Bru^el³, das mat ze Stoka³ vnd das Hasen mat³, lûterlich willeklich vnd frilich gantzlich vnd gar mit allen rehten, so darzů geho^erent, ûf geben han vnd gib mit disem brief dem erwirdigen minem gena^edigen von gottes gnaden abt Herman abt des gotzhus ze sant Gallen⁴ an des selben gotzhus stat in dem rechten, das die^a) vorgeschoben lút vnd gu^eter hinnenhin iemer mê von ainem abt vnd dem gotzhus ze sant Gallen recht lehen sin sont vnd ich noch min erben noch min nachkomen fúrbass niemer mê zů den vorgeschriben lúten vnd gu^etern von aigenschaft enhain recht vordrung noch ansprach haben noch gewinnen sont mit gaistlichem noch mit weltlich gericht noch ân gericht, vnd han mich hierúber enzigen vnd enzihe mich mit disem brief fúr mich vnd alle min erben aller der recht, so ich hatt zů den vorgeschriben lúten vnd gu^eter von aigenschaft wegen. Vnd han dis alles getân vnd vollefu^ert, als ez kraft moht vnd solt han von reht vnd von gewonhait. Vnd des ze ainem waren vrkúnd vnd gantzer sicherhait der vorgeschriben dinge so han ich der vorgenemt Haiden von Emptz min insigel gehenkt an disen brief fúr mich vnd alle min erben vnd nachkomen. Dirre brief wart geben an dem na^ehsten donstag nach sant Gallen tag, in dem jar, do man zalt von gottes gebúrt drúzehenhundert jar vnd darnach in dem ain vnd fúnfzigosten jar.

Source Fulltext: Chartularium Sangallense VII, Nr. 4234, S. 143.