Allen den, die disen brief an sehent, lesent oder ho^erent lesen, kúnden wir Berhtolt von Glôten vnd Růdolf || sin sun vnd veriehint offenlich an disem brief, daz wir mit gůter vorbetrahtung vnd mit wolbedahtem sinne || von v´nser not wegen Hansen den Herren von Hennowe vnd Cůnraten sinen sun, die baide v´ns von dem libe || ze aigen an gehortunt, vnd dú nachgescriben gu^eter, daz gůt genant dez Lo^effels gůt vnd daz gůt genant dez Rimispergers gůt, vnd^a) gu^eter Hans Herr von vns ze lehen hette, dú gu^eter v´nser lehen waren von dem gotzhus ze sant Gallen, reht vnd redelich habint verkoffet vnd ze koffen geben dem selben gothus^b) ze sant Gallen mit libe vnd mit gůt vmb vier pfund vnd vmb zwelf schilling pfenning alles gůter Costentzer múns, der pfenning wir gar vnd gantzlich gewert sient vnd die wir in v´nsern schinba^ern nutz habint bewendet vnd bekeret, vnd habint och dem vorgescriben gotzhus ze sant Gallen die vorgnanden lút vnd gu^eter ledeklich ze aigen vff gen vnd gebint sú och vff mit disem brief vnd habint och gelobt mit v´nseren trúwan, der vorgescribenun lúte vnd gu^eter reht wern ze sinne nah reht, wa sin daz gotzhus ze sant Gallen ald Hans Herre ald Cůnrat sin sun sin bedurfent ald notdúrftig sint vff gaistelichem ald vff weltelichem geriht, ân fúrzug, vnd entzihen v´ns mit disem brief aller reht, vordrung, ansprach, aigenschaft vnd lehenschaft, so wir ald v´nser erben zů den vorgenanden lúten ald gu^etern ie hettunt ald gewnnent ald wir hie dar zů immer han ald gewinnen mugint ald mo^ehtint von reht ald von gewonhait. Vnd ze merer sicherhait aller vorgescribener ding henken wir v´nserú insigel an disen brief. Der geben ist an dem na^ehsten ma^entag nah sant Hylarien tag, do von gottes gebúrt warent drútzehenhundert jare, dar nach in dem andern vnd fúnfzigosten jare.

Source Fulltext: Chartularium Sangallense VII, Nr. 4245, S. 153.