Ich^a) Jacob Růpreht, den man nemmet der Lo^ew, statamman ze sant Gallen¹ tůn kunt vnd vergich offenlich mit disem brieue allen, || die in sehent lesent oder ho^erent lesen, daz fúr mich kament ze sant Gallen an dem na^ehsten ma^entag vor sant Mathyas tag dez hai||ligen zwelfbotten, do ich an dez hailigen richs strasse offenlich ze geriht saz, die erbern wolbeschaiden Walther Kaltysen burger || ze sant Gallen, Vrsella sin elichi wirtinne vnd Elzbeth der selben Vrsellun elichi swester, Hainrich Arnoltz sa^elgen wilunt burgers ze sant Gallen elichen tohtren, vnd staltent sich da die selben Vrsella vnd Elzbeth ir swester mit dez obgenanten Walther Kaltysens gůtem willen vnd gunst mit vogt vnd mit fúrsprechen, alz reht waz vnd alz o^vch mit gemainer vrtail ertailt ward, vnd nament ze vogt v´ber diz sache Laurentzzen Arnolt iro anerbornen vogt vnd nament ze fúrsprechen Johansen Na^enggeswiller baid burger ze sant Gallen, der offenot an iro stat vnd von iro baider wegen offenlich vor mir an gemainem geriht vnd sprach, daz sv´ baid mit ainberem willen vnd mit gůter vorbetrahtung die vogtye ze Ainswille² v´ber dv´ gu^eter, die man nemmet der friien gu^eter, die aller ja^erlich giltet fúnf schilling vnd vier phenning gůter vnd gena^emer Costentzzer múnse vnd vier herbst hu^enr, die selb vogtye iro reht aigen wa^er, mit allen rehten nútzzen vnd gewonhaiten vnd mit aller zv^o geho^erde redlich vnd reht aines sta^eten ewigen ko^vffes verko^vft vnd ze ko^vffenn geben hettint dem erbern wolbeschaiden Johansen Ho^ern ze disen ziten burgermaister der stat ze sant Gallen vnd sinen erben, ob er enwa^er, vmb siben phunt phenning gůter vnd gena^emer Costentzzer múnse, der sv´ gantzlich von im gewert wa^erint vnd enphangen hettint vnd an iren offenn nutz bewendet. Vnd batent mich mit irem fúrsprechen eruarn an ainer vrtail, wie sv´ im die vorgeschribenen vogtye vnd gelt vertgen vnd zv^o sinen handen bringen so^eltint vnd mo^ehtint, alz reht wa^er vnd daz ez kraft hett vnd haben mo^eht nv vnd o^vch hie nach. Daz tet ich vnd ward mit rehter vrtail ertailt, daz der obgenant vogt Laurentz Arnolt die egenemten Vrsellun Kaltysinnen ze drin malen vsser dez gerihtes ring fu^eren so^elt vnd si fragen, ob si ez willeklich vnd gern ta^et vnd tůn wo^elt, vnd daz sv´ daz danne baid mit iro vnd mit dez selben iro vogtes handen offenlich an dez richs strasse zv^o dez obgenanten Johansen Ho^ern handen vertgen vnd vf geben so^eltint, vnd daz ez danne also wol kraft vnd maht hetti nach dem rehten. Also fůrt o^vch der selb vogt Laurentz Arnolt die egenemten Vrsellun Kaltysinnen ze drin malen vsser dez gerihtes ring vnd fragot si, alz ertailt waz, ob si ez willeklich vnd gern ta^et vnd tůn wo^elt. Der sait ze ieklichem mal bi sinem aide, daz si spra^ech, daz si ez vnbezwungenlich ta^et vnd willeklich vnd gern tůn wo^elt, vnd gabent o^vch do ze stette die vorgenemten Vrsella Kaltysnin vnd Elzbeth ir swester offenlich an dez richs strasse willeklich frilich vnd vnbezwungenlich mit iro vnd mit dez vorgenanten Laurencien Arnoltz iro vogtes handen die vorgeschribenen vogtye ze Ainswille v´ber dv´ gu^eter, die man nemmet der friien gu^eter, die aller ja^erlich giltet fúnf schilling vnd vier phenning der vorgeschribenen múnse vnd vier herbst hu^enr, mit allen rehten vnd mit aller zv^o geho^erde reht vnd redlich vf zv^o dez êgenemten Johansen Ho^ern handen mit allen den worten werken vnd geta^eten, so darzů gehortent ald ho^eren soltent vnd notdurftig warent vnd alz ez kraft vnd maht sol vnd mag han. Vnd verzigent sich o^vch do die vorgenemten Walther Kaltysen, Vrsella sin elichi wirtinne vnd Elzbeth ir swester mit dem vorgenanten irem vogt vnd verzihent sich mit disem brieue gantzlich vnd gar fúr sich vnd fúr alle iro erben der vorgeschribenen vogtye phenning vnd hu^enr geltes mit aller zv^o geho^erde aller aigenschaft aller kuntschaft aller gewer lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so sv´ oder iro erben an der zv^o der vnd von der vorgeschribenen vogtye vnd geltes wegen ie gehept hant ald hie nach iemer gehaben oder gewinnen mo^ehtint. Die vorgenemten Walther Kaltysen, Vrsella sin elichi wirtinne vnd Elzbeth ir swester lobtent o^vch mit iren trúwen fúr sich vnd fúr alle iro erben, der vorgeschribenen vogtye vnd geltes mit aller zv^o geho^erde vnd dez ko^vffes reht wer ze sinne nach dez landes reht vnd o^vch den vorgenanten Johansen Ho^ern vnd sin erben darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wa vnd wie dik sv´ darumb an gesprochen geschadgot vnd vf getriben werdent mit dem rehten. Vnd ze vrkúnd der warhait aller der vorgeschribenen dinge vnd vergiht so han ich Jacob Růpreht amman da vorgenemt von dez gerihtes wegen min insigel offenlich gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Darnach veriehent wir die vorgenemten Walther Kaltysen, Vrsella sin elichi wirtinne, Elzbeth ir swester, Laurentz Arnolt iro vogt in der vorgeschribenen sache vnd Johans Na^enggeswiller fúrsprech ainer gantzzer warhait aller der dinge, so von v´ns an disem brief da vorgeschriben stant. Vnd ze merer sicherhait der selben dinge so haben wir o^vch v´nserú insigel gehenkt an disen brief. Der geben ist ze sant Gallen an dem vorgeschribenen ma^entag in dem jar, do man zalt von Cristus gebúrt drúzehenhundert jar, ahtzig jar vnd darnach in dem sehsten jare.

Source Fulltext: Chartularium Sangallense X, Nr. 6128, S. 319-320.