Wir graue Frider. von Toggenburg¹ kunden vnd veriehen allen dien, die disen gegenwurtigen brief || sehent oder ho^erent lesen, das wir die funphzig mutte kernen geltes, die vns gesezet sint vmb vnsern || dienst ab dien obern mulinen vnd vs dem houe ze Wila² fur sechzig march silbers Kostenzer gewicht von || dem erwirdigen herren in gotte H. von gotz genaden abte ze sant Gallen³ vnd von sinem gozhus, wider sunt geben ze lo^esen dem ieze genanden herren vnd sinem gozhus, swen wirs ermant werden mit dien ieze genanden sechzig marchen silbers, vnd bind vns dar zů vnd vnser erben. Dar zů ist o^vch gedinget, ist de ald beschicht es, dc der egenande erwirdige herre in gotte Heinr. von gotz genaden abt ze sant Gallen ald kein sin nakome vnseren sun graue Frider. phaffen⁴ beratet mit geistlichen gaben an einer kilchen oder an me kilchen zwenzig marchen geltes, de kuntlich ist, so sunt die vor genanden funphzig mutte kernen geltes ledig sin frilich vnd alleklich von vns vnd vnsern erben dem dike genanden herren vnd sinem gotzhus. Vnd de wir vnd vnser erben alles dis gedinge stete haben vnd behalten mit gůten trvwen, so gebent wir der dike genante graue Frider. von Toggenburg dem dike genanten erwirdigen herren Heinr. von gotz genaden abt ze sant Gallen, sinen nakomen vnd sinem gotzhus disen brief besigelt offenlich mit vnserm ingesigel ze einer steter vestnunge dir gedinge. Dir brief wart gegeben ze Windegga vf der burg⁵, do man zalte von gotz geburte druzehen hundert iar vnd dar nach in dem funphzehenden iare, an dem mentag in der phingst woche.

Source Fulltext: Chartularium Sangallense V, Nr. 2928, S. 280.