Ich^a) Jacob Růpreht, den man nemmet der Lo^ew, statamman¹ ze sant Gallen tůn || kunt vnd vergich offenlich mit disem brief allen, die in ansehent lesent oder || ho^erent lesen, daz fúr mich kam ze sant Gallen in der stat an dem tag, alz || dirre brief geben ist, der beschaiden kneht Johans Stuntz burger ze Arbon² vnd offnot vnd veriach da offenlich vor mir fúr sich vnd alle sin erben von der vier mutt kernen ja^erliches geltes wegen, die fro^v Katherina V^olrich Sterneggs von Arbon êlichi husfro^vw hetti in phandes wise von dem gotzhus ze sant Gallen vsser dem hof ze Nidern Goldach³, die selben vier mutt kernen geltes vnd o^vch den phantschatz der selb Johans Stuntz redlich ko^vft hett von der obgenanten Katherinen Sternegginen, die selben vier mutt kernen geltes Johannes Wildrich der schriber von erlo^vbens vnd haissens wegen mines gna^edigen herren abt Chůnen abt dez gotzhus ze sant Gallen⁴ erlo^est hetti von der obgenanten Katherinen Sternegginen, dez selben ko^vffes si der selb Johans Stuntz willeklich erlassen hett vnd liess, vnd sait o^vch do ze stet der vorgenant Johans Stuntz offenlich vor mir fúr sich vnd alle sin erben die obgenanten Katherinen Sternegginen vnd Johannes Wildrich vnd alle iro erben von der vorgedahten vier mutt kernen geltes ko^vffes vnd phantschatzzes wegen gantzlich vnd gar quitt ledig vnd los mit vrkúnd diz briefs. Vnd ze vrkúnd der warhait aller der vorgeschribenen dinge vnd vergiht so han ich Jacob Růpreht amman da vorgenant ze ainer zúgnust aller vorgeschribenen dinge vnd vergiht min insigel offenlich gehenkt an disen brief. Der geben ist ze sant Gallen an sant Margarethen tag in dem jar, do man zalt von Cristus gebúrt drúzehenhundert jar, ahtzig jâr vnd darnach in dem ahtenden jâre.

Source Fulltext: Chartularium Sangallense X, Nr. 6278, S. 523.